დღეს ლანჩხუთის მუნიციპალიტეტის სააქტო დარბაზში, გაიმართა სახელმწიფო პროგრამის "აწარმოე საქართველოში" მეორე ეტაპის პრეზენტაცია. ამ შეხვედრას ესწრებოდნენ მცირე ბიზნესით დაინტერესებული პირები, ხოლო უშუალოდ პროგრამის არსსა და მიზნებზე საქართველოს ეკონომიკის სამინისტროს მეწარმეობის განვითარების სააგენტოს წარმომადგენლებმა, ირინა გიორგაძემ და თეონა ბაბუნაშვილმა ისაუბრეს.
პროგრამის შესახებ სტუმარი ქალბატონებისგან საკმაოდ ვრცელი ინფორმაცია კი მიიღეს დაინტერესებულმა პირებმა, მაგრამ კითხვა-პასუხის რეჟიმში გადასულმა პროცესმა, მოულოდნელად საკმაოდ მწვავე ხასიათი მიიღო.
ყველაფერი მას შემდეგ დაიწყო, რაც ადგილობრივი მედიის წარმომადგენელმა ჟურნალისტმა სტუმრებს კითხვა დაუსვა – ეს პროგრამა სახელმწიფოსაა თუ რომელიმე პოლიტიკურ პარტიასთან ასოცირდებაო?
"ლანჩხუთის სინამდვილეში ეს პროგრამა რატომღაც "ერთიან ნაციონალურ მოძრაობასთან" ასოცირდება. ამასთან დაკავშირებით გარკვეული ინცინდენტიც მოხდა. თქვენი ბანერი "ნაციონალური მოძრაობის" ოფისის თავზე იყო გაკრული, რომელიც მალე ჩამოვიღეთ(!!!) და ესეც გარკვეული ინცინდენტია, რასაც პრესაშიც მოყვა გამოხმაურება. მე ვიქნები მეორე ჟურნალისტი, ვინც ამასთან დაკავშირებით კალამს აიღებს ხელში და ვისაც საჭიროა, მიაწვდის ინფორმაციას. ეს ძალიან სერიოზული პროგრამაა და უნდა იცოდეს საზოგადოებამ ვისი წყალობაა " -თქვა ჟურნალისტმა, რომელმაც ნივთმტკიცების სახით სტუმრებს ფოტო მიაწოდა, სადაც აღნიშნული ბანერია გამოსახული.
თემა შეხვედრაზე მოგვიანებით მისულმა ნუგზარ ცინცაძემ გააგრძელა და საკმაოდ მწვავედაც.
"ეს თქვენი გამოყოფილი თანხები პირდაპირ "ნაციონალური მოძრაობის" ოფისის გავლით რიგდებოდა. თქვენ ამას ყურადღებას არ აქცევთ?! თუნდაც "ქართული ოცნების" ოფისზე განთავსებულიყო ეს ბანერი, იმასაც გავაპროტესტებდით. თქვენ ეკონომიკის სამინისტროს წარმომადგენლები ხომ ხართ? ჰოდა, გადაეცით თქვენს მინისტრს ჩემგან – ეს ბანერები იქ განათავსოს, სადაც საჭიროა, თორემ აქამდე 200 მინისტრი მოსულა და წასულა, ლანჩხუთელებს ბევრი წაგვიყვანია და მოგვიყვანია. მე ამ სიტყვების არ მეშინია, ამას ვამბობ მე, ნუგზარ ცინცაძე" – აღშფოთება ვერ დამალა ა(ა)იპ "ტექსერვისის" დირექტორის მოადგილემ.
ცინცაძის კითხვას უპასუხა ამ პროგრამის გურიის რეგიონში განმახორციელებელი ქვეკონტრაქტორი ორგანიზაციის, შპს "ჯი-ემ-სი-ჯის" ხელმძღვანელმა მაია შინშიაშვილმა, რომელმაც განაცხადა, რომ ბანერი მალევე ჩამოიხსნა.
"უი, უკვე არ არის?! თქვენ ჩამოიღეთ? თქვენ გააპროტესტეთ? ოჯახაშენებულებო, თქვენთან კადრების ფილტრაცია არ ხდება? საიდან ნიშნავთ ამ ადამიანებს? კი ბატონო, პოლიტიკური ნიშნითაც ინიშნებიან ადამიანები, მაგრამ ვინ გყავთ, ვის ნიშნავთ რაიონებში, არ აკონტროლებთ ამას?! თქვენც გაგიშვებენ მაგ სამსახურიდან, რატომ იცით?! იმიტომ რომ ბანერებს "ნაციონალების" ოფისებზე კიდებთ" – ხმამაღალი ტონით მიმართა ცინცაძემ სტუმრებს.
"ჩვენ არ მოვსულვართ ბანერზე სასაუბროდ. აქ იმისთვის ვართ, რომ წარმოგიდგინოთ პროგრამა. ჩვენ ამასთან დაკავშირებით საქმის კურსში არ ვართ, თან ასეთი ტექნიკური დეტალები საჯარო განხილვის თემა არ არის. როგორც ვიცით, ეს ბანერი უკვე ჩამოხსნილია და ჯობს იმ სიკეთეებზე ვისაუბროთ, რაც ამ პროგრამამ უნდა მოუტანოს რიგით ადამიანებს" – სიტუაციის განმუხტვა ასე სცადეს მეწარმეობის განვითარების სააგენტოს წარმომადგენლებმა და თან ნუგზარ ცინცაძეს ტონის დაწევა ურჩიეს.
ბანერთან დაკავშირებით ატეხილ აჟიოტაჟზე ინფორმაცია გააკეთა მაია შინშიაშვილმაც – "ჩვენ აქ იმიტომ ვართ, პროგრამის შესახებ მოსახლეობას ინფორმაცია მივაწოდოთ. ბანერის გაკვრას მოყოლოლი გაუგებრობა გამოიწვია იმან, რომ ნაციონალური მოძრაობის ლანჩხუთის ოფისი არის იმ კორპუსის ერთ ერთ სართულზე, სადაც ჩვენი ოფისი მდებარეობს".
სხვათა შორის ამ პრეზენტაციამდე რამდენიმე საათით ადრე საკუთარი განცხადების საფუძველზე თანამდებოიბა დატოვა "ჯი-ემ-სი-ჯის" გურიის რეგიონული ოფისის ხელმძღვანელმა, დავით გოგუაძემ. მისი სამსახურიდან წასვლის ოფიციალურ მიზეზად პირადი განცხადება სახელდება, თუმცა ჩვენი ინფორმაციით, სწორედ ბანერზე ატეხილ აჟიოტაჟს შეეწირა დავით გოგუაძის თანამდებობა, რომელიც ექს-გამგებლისა და "ნაციონალური მოძრაობის" ლანჩხუთის ორგანიზაციის ერთ-ერთი ლიდერის, გია გოგუაძის შვილია.
