25 აპრილს, ოზურგეთის მუნიციპალიტეტის საკრებულოს სხდომა გაიმართა. დეპუტატთა აბსოლუტურ უმრავლესობასა და მასმედიის წარმომადგენლებს, საკრებულოს თავმჯდომარემ, ალეკო მამეშვილმა დღის წესრიგით გათვალისწინებული 12 საკითხი გააცნო.
პირველი საკითხზე _ “ოზურგეთის მუნიციპალიტეტის 2012 წლის ბიუჯეტის დამტკიცების შესახებ”, “ოზურგეთის მუნიციპალიტეტის საკრებულოს 2011 წლის დეკემბრის #49 დადგენილებაში ცვლილების შეტანის შესახებ” _ ოზურგეთის მუნიციპალიტეტის საკრებულოს დადგენილების დამტკიცების თაობაზე, საფინანსო სამსახურის უფროსმა, ლია ქათამიძემ ისაუბრა. სხდომის ოფიციალური მსვლელობისას, საკრებულოს ოპოზიციონერმა დეპუტატმა ლელა ნაცვალაძემ მოითხოვა პასუხი კითხვაზე, რატომ სთხოვენ საშვს ადმინისტრაციულ შენობაში შემოსვლისას ხალხის მიერ არჩეულ დეპუტატს, თუ ეს მხოლოდ ლელა ნაცვალაძის მიმართ ვრცელდება, მამეშვილმა განაცხადა, რომ ეს არ შეიძლებოდა მომხდარიყო: “თუმცა, დღის წესრიგის მერვე ნომრად გათვალისწინებულია საკითხი მოქალაქეთა მიღების წესის შესახებ” _ თქვა თავმჯდომარემ და ნაცვალაძეს მოთმინება ურჩია.
_ ასე შორს რატომ გადასწიეთ, უფრო ადრე უნდა გაგვეხილა, _ არ ცხრებოდა ნაცვალაძე, თუმცა, დღის წესრიგი არ შეცვლილა.
ლია ქათამიძემ თქვა, რომ საბიუჯეტო ცვლილებები აუცილებლობიდან გამომდინარე მოხდა, რადგან მუნიციპალიტეტში შემოსულია სოციალურად შეჭირვებული მოსახლეობის 950 განცხადება, დაკმაყოფილებულია _ 536, დანარჩენი კი სასწრაფო რეაგირებას საჭიროებს: _ ამიტომ, უნდა გაიზარდოს ასეთ მოქალაქეთა სამედიცინო მომსახურების პროგრამა 15 000 ლარით, რადგან ამ ეტაპზე ვერ ხერხდება საშემოსავლო ნაწილის მნიშვნელოვანი ზრდა.
2012 წლის მონაცემებით, ბიუჯეტში მობილიზებულია შემოსავალი არასაბაზრო წესით გაყიდული საქონლიდან და მომსახურებიდან _ 12000 ლარი. აღნიშნული შემოსავლიდან უნდა დაფინანსდეს: გაჭირვებულ მოქალაქეთა სამედიცინო მომსახურების პროგრამა _ 8600 ლარით; საცხენოსნო კლუბი მარულა _ 2000 ლარით. სახანძრო დაცვის სამსახური _ 14000 ლარით. ქათამიძემ თქვა, აგრეთვე, რომ რეგიონში გასახორციელებელი პროექტების ფონდიდან, მერია-ლაითურის დამაკავშირებელ გზაზე ახალი ხიდის მშენებლობის მიზნით, გამოიყო 550 000 ლარი, ხოლო საპროექტო-სახარჯთაღრიცხვო და ექსპერტიზის თანხა უნდა განისაზღვროს 45 000 ლარით.
ამირან გირკელიძემ 2012 წლის სახელმწიფო შესყიდვების გეგმაში ცვლილებებისა და დამატებების შეტანის შესახებ ისაუბრა. სწრაფ ტემპში განიხილეს დანარჩენი საკითხებიც.
მათ შორის, ხმაური გამოიწვია მერვე საკითხმა _ “ოზურგეთის მუნიციპალიტეტის წარმომადგენლობით და აღმასრულებელ ორგანოში მოქალაქეთა მიღების წესის დამტკიცების შესახებ” _ ოზურგეთის მუნიციპალიტეტის საკრებულოს დადგენილების დამტკიცების თაობაზე. ალეკო მამეშვილმა თქვა, რომ ამ წესის შემოღებას მოქალაქეთა უკმაყოფილება არ გამოუწვევია, არ შემოსულა მათი მხრიდან განცხადება, რომ ვინმე უკმაყოფილო ყოფილიყო: _ არავის ეზღუდება შენობაში შემოსვლა, უბრალოდ, საშვთა სისტემით მოწესრიგდა მოქალაქეთა მოძრაობა და უფრო დროულად და თანმიმდევრულად ხდება მომსახურება, _ მიაჩნია მამეშვილს.
ოზურგეთის მუნიციპალიტეტის გამგებელმა, ილია ვაშაყმაძემ მოიწონა საშვთა სისტემის ეფექტურობა, რის შემდეგაც, თურმე, მას მშვიდი მუშაობის საშუალება მიეცა: _ ადრე ქალები ერთმანეთს თმებში ექაჩებოდნენ, ჩემი რიგი იყო და გამგებელთან რატომ შემასწარიო, ახლა კი მსგავსი რამ არ ხდება, _ დააკონკრეტა მან საშვთა სისტემის დადებითი მხარე.
ლელა ნაცვალაძემ, საკუთარ დაჟინებულ კითხვას, რატომ სთხოვენ არჩეულ დეპუტატს საშვს, რაკი კონკრეტულად ვერ უპასუხეს, თავადვე გასცა პასუხი, ეს მხოლოდ ჩემთვის მოიგონეს, დანარჩენ დეპუტატებს არ ეხებათო. იურისტმა თამაზ ტრაპაიძემ განაცხადა, რომ “საშვთა სისტემა არ უნდა ეხებოდეს დეპუტატებს, რადგან ისინი “საკუთარ სახლში” არიან. ამ ნორმატიულ აქტში მითითებული უნდა იყოს ეს ყოველივე, რადგან აქ არჩეულ დეპუტატს მინისტრზე უფრო მაღალი რანგი აქვს”. ალეკო მამეშვილი დაეთანხმა ტრაპაიძეს, თუმცა, შენიშნა, რომ უმჯობესი იქნებოდა, განხილვის დროს გამოეთქვა აღნიშნული მოსაზრება.
ოპოზიციონერმა დეპუტატმა, ლელა ნაცვალაძემ მორიგი მწვავე კითხვა დასვა “ოზურგეთული ვარსკვლავთცვენის” შესახებ: _ ვინ გადაწყვიტა, აქ გაიხსნას ვასილ ჩიგოგიძის ვარსკვლავი, რა დამსახურება აქვს მას ასეთი და განა არ არის ცნობილი, რა უქნა მან ოზურგეთის თეატრს?
მამეშვილმა განმარტა, რომ არსებობს რეგალიები, რომელიც გააჩნიათ იმ ადამიანებს, რომელთა ვარსკვლავიც იხსნება, თუმცა, გადაწყვეტილებას კულტურის სამინისტრო იღებსო.
_ სამინისტრო იმის საფუძველზე მიიღებდა გადაწყვეტილებას, რასაც თქვენ წარუდგენთ, _ არ ცხრებოდა ნაცვალაძე.
მიუხედავად მწვავე პოლემიკისა, ამ კითხვაზე ამომწურავი პასუხი ვერც ნაცვალაძემ მიიღო და ვერც საკრებულო დარბაზმა.
