1984 თუ 85 წელია და ინსტიტუტიდან ჩამოსული ვარ ოზურგეთში, ჩემს მშობლიურ სკოლაში საშეფო გასვლაზე. ძ
ველებს ემახსოვრება ეს დრო და სიტუაცია, კომკავშირი, შეფობა სკოლებსა თუ ბაღებზე და ა.შ. გვახლავს მთელი სტომატოლოგიური ფაკულტეტის კომკავშირის ბიურო, საშეფო სექტორის ხ-ლი და მოკლედ ჩამოსული ვართ საქეიფოდ, თან საქმეშიც გვეთვლება. შედგა სკოლის სააქტო დარბაზში შეხვედრა მოსწავლეებთან, კომკავშირის მდივანი ცხონებული ნიკუშა მახარაძე იყო, გაიმართა კონცერტი და ბოლოს ბანკეტი, როგორც ყოველთვის.
სუფრის ერთ თავში ცხონებული ჰამლეტი დოლიძე ზის, მეორე თავში იური ჯიჯიეშვილი, არის გნიასი და გურული იუმორის ფეიერვერკი.
დგება ჰამლეტი და ყვება ანეკდოტს: გურული ჩადის თბილისში სიძესთან, რომელიც ძალიან მაგარი პლასტიკური ქირურგია, პროფესორი, მეცნიერი და ვაფშემც მაგარი კაცი. ეამაყება გურულს ასეთი სიძე და ცივ ნიავს არ უშვებს მისკენ.
ხარობს სიმამრი ქალიშვილით, სიძით და შვილიშვილებით. ერთ დღესაც სიძემ შესთავაზა, სამეცნიერო კონფერენცია ტარდება, უცხოელები არიან ჩამოსულები, ახალი რამეები იქნება და თუ სურვილი გაქვს, წამოდი და ბევრ საინტერესოს გაიგებო.
წავიდა გურული კონფერეციაზე, ზის დარბაზში ჩაგალსტუკებული და უსმენს გამომსვლელებს გაკვირვებული.
ადგა ინგლისელი და ყვება, რომ ფილტვი გადაუნერგეს პაციენტს, რომელიც სიმსივნით იყო ავად და მოარჩინეს _ ხანგრძლივი ტაში.
გამოვიდა იაპონელი და მოყვა, როგორ გადაუნერგეს ორივე ფეხი მუხლს ქვევით პაციენტს, რომელიც ეხლა კაბარეს მოცეკვავეა _ უფრო ხანგრძლივი ტაში.
დადგა ფრანგის რიგი და ყვება, რომ უბედური შემთხვევის გამო დასაჭურისებულ მამაკაცს გადაუნერგეს ავარიაში გარდაცვლილი კაცის სასქესო ორგანო და ამის შემდეგ საჭურისის სქესობრივი ცხოვრება იმდენად შეიცვალა, რომ ახალი კაზანოვა გახდა _ ამაზე ხომ თლად გადაირია დარბაზი, მქუხარე ტაში და ხანგრძლივი ოვაციები.
უცებ ჩვენი გურული წევს ხელს და ითხოვს სიტყვას: ნამეტანი კაი, რომ ფილტვი გადანერგეთ და კაძახი მორჩა, იგიც ნამეტანი კაი, რომ ინვალიდმა ცეკვა დეიწყო, მარა ახლა სხვისი იმით ჩემს ქსენიას რაფერ გევეკარო, იგი ამიხსენით ვინცხამო!
გია სიხარულიძე
