ბაკურიანი საქართველოში სამთო-კლიმატური კურორტია და საერთაშორისო მნიშვნელობის სამთო-სათხილამურო ცენტრია. ისტორიის თანახმად 1932 წელს გაიხსნა პირველი სათხილამურო ბაზა. ბაკურიანიდან კოხტაგორის მთაზე (1,3 კმ) და ცხრაწყაროს უღელტეხილზე (3,5 კმ) გაყვანილია საბაგირო გზები, აგებულია სათხილამურო ტრამპლინები.
კურორტის მთავარი ფაქტორებია: მთის ჰავა, მზის ხანგრძლივი ნათება (2052 სთ წელიწადში) და ულტრაიისფერი სხივების მაღალი რადიაცია.
სამედიცინო ჩვენება: ლიმფადენიტი, სასუნთქ ორგანოთა ქრონიკული არატუბერკულოზური დაავადებანი, სისხლნაკლებობა.
ადგილობრივების თქმით, კურორტი მეტ მიხედვას საჭიროებს. ბაკურიანში ყოფნის დროს გვითხრეს, რომ წინა წლებთან შედარებით წელს ნაკლებად იყო დამსვენებელი.
"გურია ნიუსმა "ბაკურიანში რამდენიმე ადამიანი ჩაწერა.
"სიმართლე, რომ ვთქვა, არავის მოეწონება. კომუნისტების დროიდან დავდივარ ბაკურიანში. თან ვვაჭრობ და თან ვისვენებ. ვაშლი, მსხალი ჩამომაქვს და ვყიდი. წინათ უფრო მეტი ადამიანი ისვენებდა კურორტზე. ახლა ეს რიცხვი შემცირებულია. ჩემი აზრით 90% მოკლებულია ბაკურიანს, ბორჯომს და სხვა კურორტებს. უცხოეთიდან ჩამოსულები უფრო არიან ბაკურიანში, ვიდრე ჩვენებურები. ეს იმიტომ ხდება, რომ დასვენების ფული და საშუალება არ აქვთ. ძალიან ცუდი მდგომარეობაა. სანამდე ხელისუფლებაში მოვლენ, ყველას ახსოვს ხალხი და შემდეგ, როდესაც ადგილებს გაინაღდებენ, ავიწყდებათ. ასეთია რეალობა.." – ამბობს სულიკო ზერეკიძე.
"თოვლი აღარ არის და ახლა ვისვენებთ. დავისვენეთ ხალხისგან. თოვლი რომ არ არის, ხალხი არ მოდის ბაკურიანში. თოვლი იყო, მაგრამ არც იმდენი დამსვენებელი მოვიდა, როგორც წინა წლებში დადიოდნენ. 76 წლის კაცი ვარ და იმედს ვიტოვებ, რომ შიდა გზები მოწესრიგდება. პრემიერ-მინისტრი გამოვიდა სიტყვით და თქვა მივხედავთ კურორტსო. ჩვენც მაგის იმედი გვაქვს. არ მინდა უმადური აღმოვჩნდე, კარგი საქმეებიც კეთდება, მაგრამ ცოტა ჩქარი ტემპი არის საჭირო. კარგი იქნება გაზის საფასური თუ დაიკლებს. ასევე წყლის და შუქის გადასახადი დიდია და არაფერი გვრჩება ადგილობრივებს. რადგან ყველაფერი ძვირდება, დამსვენებლებს არ მოსწონთ ახალი ფასები და აღარ მოდიან დასასვენებლად." – გვითხრა ნოდარ ანტონოვმა.
73 წლის მარო გრიგარაშვილი ბაკურიანში ხშირად დადის.
"ბაკურიანში ძალიან კარგი ხალხი ცხოვრობს. ახლა იები ჩამოვიტანე და ყველა გავყიდე. ცოტა ხნით დავისვენებ კურორტზე და მერე ისევ ხაშურში წავალ, ახალ ყვავილებს დავკრეფ და ისევ ჩამოვალ." – თქვა ჩვენთან საუბრის დროს მარო გრიგარაშვილმა.
"არ იყო კარგი სეზონი. თოვლი აღარ მოდის, როგორც წინა წლებში მოდიოდა. ადგილობრივი მცხოვრებლებისთვის არაფერი კეთდება. რადგან დამსვენებლები არ იყო, ვერ გავყიდე მურაბები, კომპოტები. მხოლოდ ის ხალხი ჩამოვიდა, ვისთვისაც აუცილებელია ბაკურიანის ჰაერი ზამთარში." – გვითხრა ადგილობრივმა მკვიდრმა.
“80 წელია ვცხოვრობ ბაკურიანში. ბაკურიანს სერიოზული მიხედვა და უფრო მეტი პოპულარიზაცია სჭირდება. ოლიმპიური თამაშებისთვის სხვადასხვა ქვეყნიდან ჩამოდიოდნენ სპორტსმენები და აქ ემზადებოდნენ. ახლა ასე არ ხდება. ბევრი რამ გაკეთდა, მაგრამ ეს არ არის საკმარისი. იჩეხება ხე-ტყე და ეს მთავარი პრობლემაა. ეს ყველაფერი კანონიერად ხდება და ხალხს შეშა აქვს ზამთარში, მაგრამ გაზი რომ გაიაფდეს, ტყე გადარჩება. ეს არის ბაკურიანში მცხოვრები ყველა ადამიანის ოცნება. ტყე ნადგურდება და აქედან გამომდინარე კარგი იქნება ჩვენს თხოვნას თუ გაითვალისწინებს ხელისუფლება." – ამბობს "გურია ნიუსთან" საუბრის დროს ადგილობრივი მცხოვრები ილია მარქაფოვი.
ყველაზე მეტად ბაკურიანით ახალგაზრდები არიან კმაყოფილები.
"პარასკევს ამოვედით და კვირას ისევ დავბრუნდებით თბილისში. აქ ბევრი გასართობია ჩვენთვის, რამდენიმე რესტორანი არის, სადაც მუსიკალური ბენდი უკრავს.. ერთი რაც გვინდა, რომ ყოველთვის თოვლი იყო ბაკურიანში", – გვითხრა თბილისიდან ჩამოსულმა 25 წლის ახალგაზრდამ.
ბაკურიანში ყოფნის დროს, ყოფილი პრემიერ-მინისტრის, ბიძინა ივანიშვილის სახლი გარედან გადვიღეთ. როგორც ადგილობრივებმა ჩვენთან საუბრის დროს თქვეს, ივანიშვილი ამ ბოლო დროს ნაკლებად სტუმრობს კურორტს.
"უფრო მეტად ბიძინა ივანიშვილის შვილები დადიოდნენ, როდესაც თოვლი მოდიოდა. წელს არ შეგვიმჩნევია, ეტყობა ივანიშვილს არ სცალია დასასვენებლად."- გვითხრეს ბაკურიანში.
