მას შემდეგ რაც "გურიამ" ახალი მწვრთნელით და ახალი გუნდით დაიწყო საქართველოს საფეხბურთო ჩემპიონატის მეორე წრე, წაგების გემო ნაგემი არ ქონდა. და აი, ეს მომენტიც დადგა. წაგება საკმაოდ მტკივნეული გამოდგა, თბილისის "საბურთალომ" ყველა კომპონენტში დაჯაბნა მეტოქე და დიდი ანგარიშით მოგებისთვის წამები დააკლდა.
"საბურთალო" წინა ტურში სამტრედიაში შერცხვა და იქაურ გუნდთან 2:8 დამარცხდა. ამ სირცხვილის შემდეგ კლუბის მესვეურებმა მწვრთნელი სასწრაფოდ შეცვალეს და ესპანელ სპეციალისტს პაბლო ფრანკო მარტინს უხმეს. მანაც კარგად დაგეშა ახალი შეგირდები და შედეგმაც არ დააყოვნა.
საგულისხმოა, რომ „გურიამ“ პირველი ტაიმი ასე თუ ისე გაძლო, მაგრამ ლამისაა გასახდელში მიმავალმა გაუშვა დასანანი გოლო. ბოლო წუთზე ხარაიშვილმა ანგარიში გახსნა. საერთოდ ამ ახალაგაზრდა ფორვარდმა ამ გოლს კიდევ ორიც მოაყოლა და ჰეთთრიკი გაჩარხა.
სტუმართათვის ცივი შხაპის ეფექტი გამოდგა მეორე გოლი, რომელიც შესვენებიდან ოთხიოდ წუთში გავიდა და ხარაიშვილმა ამ ჯერზე პენალტით იხეირა. ერთი გაბრძოლება გაიბრძოლეს დემიდოვის შეგირდებმა და ზაზულიამ 65 – ე წუთზე ანგარიში მინიმუმამდე დაიყვანა, მაგრამ ხარაიშვილი ასე არ ფიქრობდა და ორიოდ წუთში სტატუს – ქვო აღადგინა.
მალე ამას კიდევ ერთი გოლიც მოყვა და ხორხელმა ყველა შეკითხვას წერტილი დაუსვა. ეგ არის მხოლოდ, რომ სულ ბოლოს მოროზენკომ ანგარიშს ოდნავ სოლიდურობა შემატა და დიდი ანგარიშის სტატუსი გააუქმა.
აღსანიშნავია, რომ ცნობილი საბუკმეიკერო კანტორებიდან, ეს შეხვედრა მხოლოდ bet365 – მა შეიტანა სათამაშო ნუსხაში და მცირედი უპირატესობა "გურიას" მიანიჭა, მაგრამ შედეგი ისეთი იყო, "გატეხვას" რომ ეძახიან აზარტული მოთამაშეები.
ტურის სხვა შედეგები ასეთია:
საპოვნელა – შუქურა 2:0;
მერანი – სამტრედია 2:3;
ბათუმი – ცხინვალი 2:0;
კოლხეთი – ტორპედო 2:0;
ზუგდიდი – დინამო 2:3;
დილა – ჩიხურა 1:1.
