აპრილიდან, მთელი ქვეყნის მასშტაბით, უმაღლესი კლასის არტისტების მონაწილეობით კულტურული ღონისძიებების სერია განხორციელდება, – ამის შესახებ საქართველოს პრემიერ-მინისტრმა მთავრობის სხდომაზე განაცხადა.
გიორგი კვირიკაშვილის განმარტებით, მთავრობა განიხილავს რესურსების გამოყოფის საკითხს კულტურული ღონისძიებების დასაფინანსებლად.
"დღეს განვიხილავთ რესურსების გამოყოფას, რომელიც ტურიზმის წახალისებას ისახავს მიზნად. ეს არის მთელი ქვეყნის მასშტაბით კულტურული ღონისძიებების სერიის დაფინანსება, რომელიც გულისხმობს მსოფლიოს უმაღლესი კლასის არტისტების ჩამოყვანას საქართველოში და მათი და ქართველი შემსრულებლების მონაწილეობით კულტურული ღონისძიებების დაფინანსებას. ეს ხელს შეუწყობს საქართველოს, როგორც რეგიონის მნიშვნელოვან კულტურულ ცენტრად ჩამოყალიბებას," – აღნიშნა პრემიერმა.
პრემიერ-მინისტრის ამ განცხადების შემდეგ, მთავრობის კანცელარიის უფროსის მოადგილემ, ნინო კობახიძემ სოციალურ ქსელში დაწერა, რომ ერთ-ერთი ვარსკვლავი, რომელიც საქართველოს ესტუმრება რობი ვილიამსია.
"რობი ვილიამსთან, ისევე როგორც სხვა ბევრ ვარსკვლავთან, მიმდინარეობს მოლაპარაკებები თბილისსა და ბათუმში კონცერტების გასამართად (ყველასათვის ხელმისაწვდომ ფასად) აღნიშნულთან დაკავშირებით უახლოეს დღეებში კულტურის სამინისტრო გააკეთებს განცხადებას", _ წერს კობახიძე.
"გურია ნიუსი" კულტურის სამინისტრის დაუკავშირდა, სადაც აცხადებენ, რომ მთავრობის სხდომის დასრულებისთანავე მინისტრი მიხეილ გიორგაძე ამ საკითხთან დაკავშირებით კომენტარს გააკეთებს.
რაც შეეხება მსოფლიო დონის ვარსკვლავების ვინაობას, რომლებთანც მოლაპარაკებები მიმდინარეობს, ამის შესახებ დაწვრილებით რამდენიმე დრეში გახდება ცნობილი.
