დღეს, სასჯელაღსრულების, პრობაციისა და იურიდიული დახმარების საკითხთა სამინისტროს წინ “სამოქალაქო სოლიდარობის კამპანიამ”, “თბილისი ამქარმა,” ივანე ჯავახიშვილისა და ილიას უნივერსიტეტის სტუდენტურმა მოძრაობამ, “ახალგაზრდა იურისტთა ასოციაციამ” და “საერთაშორისო გამჭვირვალობა – საქართველომ” გამართეს აქცია სახელწოდებით _ “შეწყდეს ციხეებში წამება და მკვლელობა”, “მოვითხოვთ საქმის გამოძიებას” _ აქციის მონაწილეები გლდანის #18 საპყრობილეში პატიმარ ზურაბ დელიანიძის გარდაცვალების ფაქტს გმობდნენ. პატიმრის გარდაცვალების ოფიციალურ მიზეზად აღნიშნული უწყება გულის შეტევას ასახელებს, ოჯახი ამ ვერსიას არ ეთანხმება. მათი მოთხოვნით, გარდაცვლილს წუხელ ალტერნატიული ექსპერტიზა ჩაუტარდა.
აქციის ორგანიზატორებმა მინისტრ ხათუნა კალმახელიძესთან მედიის წარმომადგენლებთან ერთად მოითხოვეს შეხვედრა. უწყების ერთ-ერთი თანამშრომელი, რომელიც ადმინისტრაციის ხელმძღვანელად გაგვეცნო, შეგვპირდა, რომ გაარკვევდა, რამდენ ხანში შეძლებდა მინისტრი ორგანიზატორებთან და ჟურნალისტებთან შეხვედრას. სამინისტროს დაცვამ ყველა მედიასაშუალებას მისცა შენობაში შესვლის უფლება, გამონაკლისი მხოლოდ “მე-9 არხი” იყო, რომელსაც უთხრეს, რომ ისინი ვერ შევიდოდნენ შენობაში _ მიზეზი არავის დაუკონკრეტებია. მედია საშუალების წარმომადგენლებმა ეს ფაქტი გააპროტესტეს და დაცვას განუცხადეს, რომ თუ “მე-9 არხს” არ შეუშვებდნენ შენობაში, მაშინ ისინიც გავიდოდნენ შენობიდან. დაცვამ სადღაც გადარეკა, რის შემდეგაც კოლეგებს მუშაობის საშუალება მისცეს.
“ადმინისტრატორი”, რომელიც აქციის ორგანიზატორებს მინისტრთან შუამავლობას შეპირდა, ისე “დაიკარგა”, რომ პასუხის გამცემი აღარავინ დარჩა. მისაღებში კი გაგვიმარტეს, თუ განცხადებას არ დაწერთ, მინისტრს ვერ შეხვდებითო. თუმცა, ხათუნა კალმახელიძესთან შეხვედრა არც განცხადების დაწერის შემდეგ მოხერხდა…
აქციის ერთ-ერთი ორგანიზატორი, ჟურნალისტი შორენა შავერდაშვილი სასჯელაღსრულების, პრობაციისა და იურიდიული დახმარების საკითხთა სამინისტროს პრესსამსახურის ხელმძღვანელს თეა სუხიშვილს დაუკავშირდა, რომელმაც განაცხადა რომ მინისტრი კალმახელიძე არ იყო სამსახურში.
_ რამდენად დამაჯერებლად მიგაჩნიათ პრესსამსახურის განცხადება, რომ კალმახელიძე არ იმყოფება შენობაში?
_ ჩემთვის ძალიან არადამაჯერებლად ჟღერს. ვიცი, რამდენიმე საათის წინ მინისტრი აქ იყო, ამ შენობაში, სადაც მან ოფიციალური კომენტარი მისცა პირველ არხს. არ მგონია, ერთ საათში აორთქლებულიყო.
საია-ს აღმასრულებელი დირექტორი, ეკა ფოფხაძე: “პასუხს, რომ კალმახელიძე სამსახურში არ არის, დამაჯერებლობა აკლია. შეეძლოთ თავიდანვე ეთქვათ, როგორც კი მოვედით. ეს ვერსია მხოლოდ რამდენიმე საათის შემდეგ გაჩნდა”.
წერილის პასუხის მოლოდინში, სამინისტროს კანცელარიაში დავრეკეთ, სადაც ვცადეთ გაგვერკვია, მიგვიღებდა თუ არა მინისტრი ხათუნა კალმახელიძე მედიის წარმომადგენლებსა და აქციის ორგანიზატორებს.
შემდეგ მისაღებში ასეთი საუბარი წარიმართა:
_ თქვენთან მისაღებში წერილი დავტოვეთ, მინისტრთან შეხვედრასთან დაკავშირებით. პასუხი როდისთვის გვეცოდინება?
_ დღეს დაწერეთ ხომ განცხადება?
_ დიახ.
_ არ ვიცი, ქალბატონო როდის გეცოდინებათ. ახლა დაწერეთ განცხადება, ამიტომ ვერ გეტყვით დაზუსტებით. მოითმინეთ, გოგონა რომელიც საშვთა ბიუროშია, ის გეტყვით შეხვედრა თუ მოხდება.
ორსაათიანი ლოდინის შემდეგ, მისაღებში განგვიცხადეს, რომ პასუხს წერილობითი ფორმით იმ მისამართებზე მივიღებდით, რომელიც მითითებული გვქონდა.
“გურია ნიუსმა” კონკრეტული ფაქტის შეფასება ახალგაზრდა იურისტთა ასოციაციის იურისტს, ნათია კაციტაძეს თხოვა:
_ ვინაიდან დიდი საზოგადოებრივი ინტერესი არსებობს ამ საკითხთან დაკავშირებით, პასუხი, ახლა სამუშაო საათები ამოიწურა და ოფიციალურად მოგწერთ პასუხსო, უპასუხისმგებლო განცხადებაა. თუ ოფიციალური განცხადება გაავრცელეს, საჭირო იყო ჟურნალისტებსა და აქციაზე მყოფ მოქალაქეებს შეხვედროდნენ და იმ კითხვებზე რაც არსებობს, ოფიციალური პასუხი გაეცათ.
_ “გურია ნიუსის” წერილი სამინისტროში გვიან შევიდა. ალბათ, მათი მხრიდან პასუხი იქნება, რომ სამუშაო საათები ამოიწურა.
_ ვინაიდან ამ აქციის შესახებ ინფორმირებული იყო საზოგადოებაც და მინისტრის აპარატიც, საჭირო იყო ადეკვატური რეაგირება ჰქონოდათ. იმის თქმა, ოფიციალურად მოგვმართეთ და ოფიციალურ პასუხს მოგცემთო, არის ძალიან ფორმალური დამოკიდებულება ამ საკითხისადმი და არ არის სწორი.
“გურია ნიუსმა” რამდენიმესაათიანი მცდელობის მიუხედავად, მაინც ვერ გაარკვია, რატომ არ მიეცათ აქციის ორგანიზატორებსა და მედიის წარმომადგენლებს მინისტრთან შეხვედრის უფლება. ერთი უწყებიდან ორი სხვადასხვა პასუხი მივიღეთ: პირველი _ პრესსამსახურის განცხადებით, მინისტრი შენობაში არ იყო, მეორე _ კანცელარიის განმარტებით, წერილი მინისტრთან შეხვედრასთან დაკავშირებით გვიან შევიდა, რაზეც პასუხს სავარაუდოდ, ორშაბათს მივიღებთ.
