ჩვენი წყაროს ცნობით, ტაკიძის გამოშვება მოახლოებულ არჩევნებს უკავშირდება _ გამოსვლის შემდეგ, მან, მინიმუმ, 2 000 ხმა უნდა შეუგროვოს ხელისუფლებას.
როგორც ამბობენ, სახელისუფლებო პარტიას ნატანებში, სადაც გიორგი ტაკიძე ცხოვრობს, საკმაოდ სერიოზული პრობლემები აქვს და ყოფილი გამგებლის დახმარება სწორედ აქ ჭირდებათ.
ადგილობრივი თვითმმართველობის არჩევნებში, ნატანების თემში, სადაც გიორგი ტაკიძე “ერთიანი ნაციონალური მოძრაობის” სიით მაჟორიტარად იყრიდა კენჭს, ყოფილ გამგებელს საკმაოდ მაღალი მაჩვენებელი ჰქონდა. ამის გათვალისწინებით, სულაც არაა გამორიცხული, წყაროს მიერ მოწოდებული ინფორმაცია რეალური იყოს.
პარალელურად, “გურია ნიუსისთვის” ცნობილი გახდა, რომ ოზურგეთის სოფლის რწმუნებულებმა გიორგი ტაკიძისთვის 50-50 ლარი შეაგროვეს, თითქოსდა მისთვის დაბადების დღის აღსანიშნავად.
ჩვენ დავუკავშირდით რამდენიმე რწმუნებულს, რომელთაგან ერთმა დაგვიდასტურა ეს ინფორმაცია, მეორემ კი გვითხრა, რომ თანხა მხოლოდ იმიტომ ვერ დადო, ამის ეკონომიური საშუალება არ ჰქონდა.
“გურია ნიუსი” ყველა ამ ინფორმაციის გადასამოწმებლად გიორგი ტაკიძის ოჯახის წევრებს დაუკავშირდა.
გოჩა ტაკიძე, გია ტაკიძის ძმა.
_ ბატონო გოჩა, ჩვენი ინფორმაციით, თქვენი ძმა, გია ტაკიძე მაისში გამოვა ციხიდან თქვენ რა ინფორმაციას ფლობთ ამასთან დაკავშირებით?
_ ნამდვილად არ ვიცი…
_ ბატონო გოჩა, ჩვენი წყარო ამბობს, რომ მისი ციხიდან გამოსვლა არჩევნებს უკავშირდება _ მან საპარლამენტო არჩევნებზე ნაციონალებს 2 000 ხმა უნდა მოუგროვოს. ისიც ითქვა, რომ ხელისუფლებამ დაბადების დღე გადაუხადა.
_ არაფერი არ ვიცი. არჩევნებთან დაკავშირებით არაფერი არ ვიცი.
_ როდის ჰქონდა გიას დაბადების დღე?
_ 22 აპრილს.
_ გავრცელდა ინფორმაცია, რომ ოზურგეთის მუნიციპალიტეტის სოფლების რწმუნებულებმა, სამსახურის უფროსებმა, გამგებლის მოადგილეებმა ხელფასზე 50 ლარი დადეს გიას დასახმარებლად.
_ არ ვიცი არაფერი. მე არავისთან არ მაქვს ურთიერთობა ხელისუფლების წარმომადგენლებთან, რომ რაიმე ინფორმაცია მქონდეს.
_ ვის აქვს ურთიერთობა, ვინ გვეტყვის? დედას ან გიას მეუღლეს არ ეცოდინება?
_ დედაჩემს ხომ არ ეცოდინება? არაფერი არ იცის დედაჩემმა, საიდან უნდა იცოდეს?
_ ანუ თქვენ ოჯახის წევრებს ხელისუფლების წარმომადგენლებთან არანაირი საუბარი ან მოლაპარაკება არ გქონიათ?
_ ჩვენ? არანაირი.
_ როდის გამოდის თქვენი ძმა ციხიდან?
_ არ ვიცი. მისჯილი აქვს 2 წელიწადნახევარი. არც არჩევნებთან და არც გამოსვლასთან დაკავშირებით არაფერი არ ვიცი. რომ გამოვიდეს, კი გვინდა, მაგრამ არ ვიცი და რა გითხრათ?
“გურია ნიუსი” ამ სატელეფონო საუბრის შემდეგ გია ტაკიძის მეუღლეს ქეთევან სეფერთელაძის საკუთარ სახლში შეხვდა, რომელმაც ხმები გია ტაკიძის გათავისუფლების შესახებ არც უარყო და არც დაადასტურა.
_ ქალბატონო ქეთევან, ჩვენი ინფორმაციით, გია ტაკიძე მაისის თვეში ციხიდან გამოდის. ფლობთ თუ არა ამასთან დაკავშირებით რაიმე ინფორმაციას?
_ ვინ გითხრათ? მე არ მაქვს ეგ ინფორმაცია და თქვენ საიდან გაიგეთ? არანაირი ინფორმაცია არ გვაქვს. ღმერთმაც ქნას და გამოვიდეს, მაგას რა ჯობს?
_ ამბობენ, რომ ის 2 000 საარჩევნო ხმის სანაცვლოდ გამოდის და ხელისუფლებამ მას დაბადების დღეც კი გადაუხადა.
_ არა, არა, არანაირი მსგავსი რამ არ ყოფილა. არც კი მაქვს იმედი, რომ რაიმე იქნება. ღმერთმაც ქნას, რომ გამართლეს ეგ ინფორმაცია და გია სახლში მალე მოვიდოდეს.
_ ხელისუფლების წარმომადგენლებმა, სოფლების რწმუნებულებმა და სამსახურის უფროსებმა 50 ლარი შეაგროვეს გიასთვის…
_ პატიმრის ანგარიში ყველამ იცის და ვისაც უნდა რაიმე დახმარება, რიცხავს. თუ დახმარების სახით გიას თანხა ჩაურიცხეს მეგობრებმა, მგონი, არ უნდა იყოს საპრობლემო. ეს მგონი სალაპარაკოც არ არის. ის ინფორმაცია, რომ გია გამოდის, მე არ მაქვს და თქვენ თუ გაქვთ და მართალია, გამახარებთ.
_ ხომ არ გახსოვთ, გიამ წინა არჩევნებში რამდენი ხმა მოუტანა სახელისუფლებო პარტიას ნატანებიდან?
_ საკმაოდ ბევრი. რამდენადაც ვიცი, 73 პროცენტით მოიგო, ზუსტად არ მახსოვს, მაგრამ მაღალი მაჩვენებლით რომ მოიგო, ეგ ვიცი.
_ ანუ თქვენ არ უარყოფთ ამ ინფორმაციებს?
_ არ უარვყოფ. უბრალოდ, არ ვიცი. თუ მასე იქნება და გია გამოვა, მაგაზე მეტი სასიხარულო ჩემთვის ნამდვილად არაფერი იქნება.
შეგახსენებთ, რომ სამთვიანი დაძაბული მოლაპარაკებების შემდეგ, 2011 წლის 22 დეკემბერს ოზურგეთის ყოფილ გამგებელს გიორგი ტაკიძესა და პროკურატურას შორის საპროცესო გარიგება შედგა _ ტაკიძემ ბრალი სრულად აღიარა და საპროცესო გარიგებების გრძელ ნუსხას კიდევ ერთი საქმე შეემატა.
ბოლო პროცესი ერთადერთი გამონაკლისი იყო, რომელზეც გიორგი ტაკიძემ განცხადება გააკეთა _ მანამდე იგი დუმილის უფლებას ინარჩუნებდა. მას შემდეგ, რაც მოსამართლე ლელა ნოზაძემ ჰკითხა, რა გარემოებაში დათანხმდა ის საპროცესო გარიგებას, ხომ არ იყო მასზე რაიმე სახის ზეწოლა ან შანტაჟი, ტაკიძემ უპასუხა: “შუამდგომლობას ვეთანხმები და ვაცხადებ, რომ ნებაყოფლობით დავთანხმდი საპროცესო გარიგებას, ჩემს მიმართ რაიმე ზეწოლას, იძულებას ან შანტაჟს ადგილი არ ჰქონია.”
ოზურგეთის მუნიციპალიტეტის გამგებელი გიორგი ტაკიძე, საქართველოს მთავარი პროკურატურის ანტიკორუფციული დეპარტამენტის თანამშრომლებმა საკუთარ სახლში, 4 აგვისტოს, დილის საათებში აიყვანეს. ოფიციალური ინფორმაციით, მას დიდი ოდენობით ქრთამის აღება და 180 000 ლარის მითვისებაში თანამონაწილეობა ედება ბრალად. ქრთამის მიღების სანაცვლო, როგორც ამას დასუფთავების სამსახურის ყოფილი ხელმძღვანელი, მერაბ კურდღელაშვილი აღიარებით ჩვენებაში ამბობს, 1 100 000 ლარის მომსახურების შესყიდვაზე ხელშეკრულების გაფორმების ლობირება იყო. ამ ყველაფრის გათვალისწინებით, გიორგი ტაკიძეს ბრალი 338-ე მუხლით წაუყენეს.
22 დეკემბერს გამართულ სასამართლოს სხდომაზე მან აღიარა დიდი ოდენობით ქრთამის აღება.
მიუხედავად ამ აღიარებითი ჩვენებისა, პროკურატურა მის მიმართ არც ისე ლოიალური აღმოჩნდა _ ყოფილ გამგებელს სასჯელის ზომად 2 წელი და 6 თვე შეეფარდა, საპროცესო შეთანხმების თანხად კი 25 000 ლარი განესაზღვრა.
