ქალაქ ოზურგეთის მუნიციპალიტეტის საკრებულოს დეპუტატმა ლევან მგელაძემ საკრებულოს თავმჯდომარეს გელა კობალაძეს წერილობით მიმართა. მგელაძე კომისიის შექმნას ითხოვს, რომელიც შეისწავლის და დაადგენს ყოფილი "სავაჭრო ცენტრის" რეალურ საბაზრო ღირებულებას.
"ქალაქ ოზურგეთის მუნიციპალიტეტის მერიის მიერ ყოფილი შპს "სავაჭრო ცენტრის" ტერიტორია და შენობა-ნაგებობები აუქციონის წესით გაიცა იჯარით. პირადად მე, მივესალმები ინვესტორებისა და ინვესტიციების მოზიდვას ახალი სამუშაო ადგილების შესაქმნელად და ქალაქის ბიუჯეტის შესავსებად. აუქციონის ჩატარების წინა პირობაა აუქციონზე გასატანი ქონების შეფასება და საბაზრო ღირებულების დადგენა. ექსპერტებთან კონსულტაციების შემდეგ მიმაჩნია, რომ ქალაქ ოზურგეთის მუნიციპალიტეტის მერიის მიერ გამოცხადებულ გამარტივებულ ელექტრონულ ტენდერში (SPA150017794 _ ქალაქ ოზურგეთის მუნიციპალიტეტის ბალანსზე არსებული ქონების აუდიტორული შემოწმებისა და შესაბამისი დასკვნის მომზადების მომსახურების შესყიდვა) გამარჯვებული აუდიტორის მიერ არასრულფასოვნად იქნა შესწავლილი და შეფასებული ზემოთ აღნიშნული ობიექტი. აქედან გამომდინარე, მიმაჩნია, რომ ქალაქის ბიუჯეტის შემოსავლები საგრძნობლად შემცირდა.
მოვითხოვ, შეიქმნას კომისია და მოწვეული იქნას კომპეტენტური აუდიტორი ან აუდიტორთა ჯგუფი, რათა დადგინდეს ზემოთ აღნიშნული ობიექტის რეალური საბაზრო ღირებულება," _ ნათქვამია ლევან მგელაძის წერილში.
მგელაძეს ასევე წერილობით უპასუხა ქალაქ ოზურგეთის მუნიციპალიტეტის საკრებულოს თავმჯდომარემ, გელა კობალაძემ: "ქალაქ ოზურგეთის მუნიციპალიტეტის საკრებულოს რეგლამენტის დამტკიცების შესახებ" _ ქალაქ ოზურგეთის მუნიციპალიტეტის საკრებულოს 2014 წლის 2 აგვისტოს #1 დადგენილებით დამტკიცებული რეგლამენტის 34-ე მუხლის მე-2 პუნქტის თანახმად, დროებითი სამუშაო ჯგუფები იქმნება საკრებულოს უფლებამოსილებას მიკუთვნებულ ცალკეულ საკითხთა შესწავლის მიზნით, ასევე საქართველოს ორგანული კანონის "ადგილობრივი თვითმმართველობის კოდექსის" 54-ე მუხლის 1 ნაწილის "გ.ვ" ქვეპუნქტის შესაბამისად, მუნიციპალიტეტის მერის უფლებამოსილებას მიეკუთვნება საფინანსო-საბიუჯეტო სფეროში შესყიდვების განხორციელება საქართველოს კანონმდებლობით დადგენილი წესით. გამომდინარე აქედან, ქალაქ ოზურგეთის მუნიციპალიტეტის საკრებულოს ბიურომ 2016 წლის 4 მარტის #6 საოქმო გადაწყვეტილებით მიიჩნია, რომ თქვენს მიერ დასმული საკითხი არ მიეკუთვნება საკრებულოს უფლებამოსილებას, რადგან კანონი იმპერატიულად მიუთითებს, რომ დროებითი სამუშაო ჯგუფი იქმნება მხოლოდ საკრებულოს უფლებამოსილების მიკუთვნებულ ცალკეულ საკითხთა შესწავლის მიზნით".
ლევან მგელაძე საკრებულოს თავმჯდომარის განცხადებას არ ეთანხმება: "პასუხით განცვიფრებული ვარ, რომ თითქოს, ეს საკითხი ჩვენს კომპეტენციაში არ შედის! მაშინ, მაგალითით გეტყვით _ აწ განსვენებულმა კახა ბენდუქიძემ შეისყიდა ეკონომიკის სამინისტროდან ანასეულის ინსტიტუტის შენობა. ამ საკითხთან დაკავშირებით, შეიქმნა დროებითი სამუშაო ჯგუფი და განვიხილეთ. პირდაპირ ვიტყვი, რომ ამ კუთხით კიდევ ვაკლებთ ბიუჯეტს თანხას. ერთად ვიბრძოლოთ ამ ქალაქის ინტერესებისთვის. რაღაცნაირად "თეთრი ყვავივით" გამოვდივარ _ მინდა, საკრებულოში ეს საკითხი დარეგულირდეს, მაგრამ უარს ვიღებ ყველაფერზე. კიდევ ერთხელ მოგწერთ წერილს და მერე სხვას ზომებს მივმართავ", _ თქვა საკრებულოს სხდომაზე ლევან მგელაძემ.
გელა კობალაძის თქმით, მან თავისი სათქმელი წერილობით უკვე გაუგზავნა ლევან მგელაძეს და ამ საკითხთან დაკავშირებით კომენტარს აღარ გააკეთებს.
