როგორც გაჟღერდა, სამომავლოდ ლანჩუთში, ქალაქის ცენტრალურ სკვერში საზოგადოებრი ტუალეტის აღდგენა იგეგმება, რომელიც 20012 წელს "საქართველოს გაერთიანებული წყალმომარაგების კომპანიის" მიერ აშენდა. მაშინ წყალმომარაგების კომპანიამ ქვეყნის მასშტაბით 33 ასეთი ობიექტი ააშენა, რისთვისაც ორი მილიონ 300 ათას ლარამდე გაიხარჯა, უშუალოდ ლანჩხუშში კი საზოგადოებრივი ტუალეტის მშენებლობას 48 ათას ლარამდე მოხმარდა.
თავის დროზე ობიექტები საკმაოდ კეთილმოწყობილი გახლდათ და შეზღუდული შესაძლებლობების პირებზეც იყო გათვლილი, თუმცა მას ერთი დღეც კი არ უმუშავია, ისე გაჩანაგდა ქონება. სამწუხაროდ, არც ვინმეს მოსვლია აზრად, რომ მას გაფრთხილებოდა და დაზიანებისგან დაეცვა.
ჩვენი ინფორმაციით, ამ ეტაპზე მუნიციპალეტეტის ხელმძღვანელობას ამ ობიექტის რეაბილიტაციასთან დაკავშირებით მხოლოდ ჩანაფიქრი აქვს და კონკრეტულად საიდან და რა თანხა გაიხარჯება აღდგენითი სამუშაოებისთვის უცნობია, ჯერჯერობით მხოლოდ ისაა დაზუსტებით ცნობილი, რომ აღდგენის შემდგომ შენობა შემდგომი მოვლა-პატრონობისთვის ა(ა)იპ „ლანჩხუთი-სერვისს“ გადაეცემა.
გამგეობის ქონების მართვის, ეკონომიკისა და სოფლის მეურნეობის განვითარები მართვის სამსახურის უფროსის, გოგი ფაცურიას თქმით, საზოგადოებრივი ტუალეტის აღსადგენად, იქ არსებული სიტუაციიდან გამომდინარე, საკმაო ხარჯები იქნება გასაწევი.
„შენობა და იქ არსებული ქონება ძლიერაა დაზიანებული, თანაც იქვე ღია სცენა არსებობს, რაც გარკვეულ უხერხულობებს ქმნის. ალბათ, რაღაც გამმიჯნავი უნდა გაკეთდეს სცენასა და საპირფარეშოს შორის. ამ დროისთვის დაზუსტებიტ მხოლოდ იმის თქმა შემიძლია, რომ რეაბილიტაციის შემდგომ ობიექტი „ლანჩხუთი-სერვისს“ გადაცემა“, -გვითხრა ფაცურიამ.
გამგეობის ინფრასტრუქტურისა და არქიტექტურის სამსახურშიც არ აქვთ ჯერჯერობით, ზუსტი მონაცემი თუ საიდან და რა თანხები მოხმარდება საზოგადოებრივი ტუალეტის რეაბილიტაციას.
"ამ ეტაპზე მხოლოდ საუბრები მიდის, მხოლოდ ის შეგვიძლია გითხრათ, რომ ამ შენობის აღდგენა არ არის იმ 708 888 ლარში გათვალისწინებული, რომელიც ქალაქის ცენტრის რეაბილიტაციისთვისაა გამიზნული", -გვითხრეს ინფრასტრუქტურის სამსახურში.
საგულისხმოა, რომ გარდა ფინანსების მოძიებისა, ადგილობრივ აღმასრულებელ ხელისუფლებას სავარაუდოდ, საკრებულოს წევრებისგანაც მოუწევთ თანხმობის მიღება, რომ არსებულ ტერიტორიაზე საზოგადოებრივმა ტუალეტმა ფუნქციონირება შესძლოს.
საქმე ისაა, რომ სწორედ დეპუტატთა ნაწილს გაუმართლებლად მიაჩნდა ქალაქის ცენტრალურ სკვერში, იქ, სადაც ადრე სასაფლაო ყოფილა, საზოგადოებრივი ტუალეტის ამოქმედება. მას შემდეგ, რაც წყალმომარაგების კომპანიის ახალი მენეჯმენტის თანახმად აღნიშნული ობიექტი 20015 წლის დასაწყისში მუნიციპალიტეტის ბალანსზე გადმოვიდა, ადგილობრივი ხელმძღვანელობა დაინტერესებული იყო იგი აუქციონის წესით გაესხვისებინა, თუმცა მაშინ უმრავლესობის დეპუტატთა ნაწილი ამის წინააღმდეგი წავიდა, რადგან, მათი აზრით, მიუღებელი და დაუშვებელი იყო სასაფლაოს ადგილზე საპირფარეშო ამოქმედებულიყო. ამ წინააღმდეგობის ფონზე ობიექტი საპრივატიზაციო ნუსხიდან მოიხსნა.
ერთ-ერთი მათგანი, ვინაც ცენტრალურ პარკში საზოგადოებრივი ტუალეტის ამოქმედებას ეწინააღმდეგებოდა, საკრებულოს სოციალურ საკითხთა კომისიის თავმჯდომარე, ქალბატონი ია ჩხაიძეა, რომელიც დღესაც ძველ პოზიციაზე რჩება და მიიჩნევს, რომ არსებულ ტერიტორიაზე საზოგადოებრივი ტუალეტის მუშაობა დაუშვებელია.
"მე ამას ვეწინააღმდეგებოდი და დღესაც ვეწინააღმდეგები. ვთვლი, რომ იქ არ იქნება და შეუძლებელია იყოს საზოგადოებრივი ტუალეტი. ეს არის ჩვენი ქალაქის ისტორიული ნაწილი, აქ იყო ეკლესია, სასაფლაო, დღეს კი ჩვენი ახალგაზდობის ძირითადი თავშეყრის ნაწილია. დაუშვებლად მიმაჩნია, რომ თუნდაც ერთი მეტრი მოაკლდეს ამ პარკს", -გვითხრა ჩხაიძემ.
შეძლებს თუ არა ადგილობრივი აღმასრულებელი ხელისუფლება ჩანაფიქრის განხორციელებას საზოგადოებრივ ტუალეტთან დაკავშირებით, ამას დრო აჩვენებს, თუმცა ფაქტია, რომ მსგავსი ობიექტის არსებობა ქალაქის სინამდვილეში აუცილებლობას წარმოადგენს.
