ევროპის სახალხო პარტიის საპატიო თავმჯდომარის ჯოზეფ დოულის მიერ გავრცელებულმა განცხადებამ, რომელიც საქართველოს მოქალაქეებისთვის ევროკავშირის ქვეყნებში უვიზო მიმოსვლის მიღებას ეხებოდა, ქართულ პოლიტიკურ სივრცეში დიდი გამოხმაურება გამოიწვია. მმართველმა გუნდმა "ნაციონალური მოძრაობა" ქვეყნისთვის მტრულ ქმედებებში დაადანაშაულა. პარლამენტის საგარეო ურთიერთობათა კომიტეტის თავმჯდომარის თედო ჯაფარიძის განცხადებით, "ეს არ არის პირველი შემთხვევა, როდესაც ქართული ოპოზიციური ძალა, კერძოდ კი "ერთიანი ნაციონალური მოძრაობა" თავის პარტნიორებს სახალხო პარტიიდან არასწორ, ცალმხრივ ინფორმაციას აწვდის ჩვენს ქვეყანაში არსებულ მდგომარეობაზე. მსგავსი ქმედება ხშირად უხერხულ მდგომარეობაშიც კი აგდებს სახალხო პარტიის წარმომადგენლებს.
…ბატონ დაულის არ შეუძლია გავლენა მოახდინოს ევროპარლამენტის გადაწყვეტილებაზე. ჩვენი ინფორმაციით, ევროპის სახალხო პარტია მხარს უჭერს გადაწყვეტილებას საქართველოს ევროპასთან უვიზო რეჟიმის შესახებ. ამდენად, ბატონი დაულის განცხადება მხოლოდ მისი სუბიექტური აზრია."-განაცხადა ჯაფარიძემ.
როგორ აისახება ვიზალიბერალიზაციის გადაწყვეტილება საქართველოს მოქალაქეებზე, ამ თემაზე დეტალურად საუბრობს იუსტიციის მინისტრი თეა წულუკიანი.
"ეს არ ნიშნავს, რომ ჩვენ შევალთ ევროკავშირის ქვეყანაში და იქ დავსახლდებით, რომ ჩვენ გვეძლევა უფლება შევიდეთ უვიზოდ ევროკავშირის რომელიმე ქვეყანაში და იქ დავრჩეთ სამუშაოდ,"- აცხადებს მინისტრი
მან ასევე განმარტება გააკეთა იმ პირებისთვის, რომლებიც იმყოფებიან ევროპაში და არ აქვთ მოწესრიგებული სავიზო დოკუმენტაცია.
"პირველი ნაბიჯი ალბათ იქნებოდა ის, რომ მათ იმ ქვეყანაში, სადაც არიან, სასწრაფოდ გადადგან ნაბიჯები იმისთვის, რომ თავიანთი სიტუაციის რეგულარიზაცია, ანუ დაკანონება მოახდინონ,"-აღნიშნავს წულუკიანი.
"დემოკრატიული მოძრაობის" ლიდერის ნინო ბურჯანაძის განცხადებით ვერცერთ შემთხვევაში ზაფხულში უვიზო მიმოსვლა ვერ იქნება.
"ჩვენ უნდა ვუთხრათ მოსახლეობას -კიდეც რომ იყოს მიღებული პოლიტიკური გადაწყვეტილება საქართველოს მოსახლეობისათვის შენგენის ზონაში უვიზო მიმოსვლასთან დაკავშირებით, მას სჭირდება 28 სახელწიფოს პარლამენტების მიერ რატიფიცირება,რაცძალიან მნიშვნელოვანწილად გაიწელება და ვერცერთ შემთხვევაში ვერ იქნება რამდენიმე თვეში მიღებული გადაწყვეტილება. ეს სიმართლე თუ არ ვთქვით, ეს რამდენიმე თვეც გავა და ყველანი დავინახავთ, რომ რასაც მე ვამბობ სწორედ ეს არის სიმართლე და არა ის, რასაც ხელისუფლება გვეუბნება" – აცხადებს ბურჯანაძე.
საქართველოს თავდაცვის მინისტრი თინა ხიდაშელი ფეისბუქის საშუალებით გამოეხმაურა ამ მოვლენას. ხიდაშელი "ნაციონალურ მოძრაობას" ადანაშაულებს იმაში, რომ უცხოელი პოლიტიკოსები ქვეყნისთვის არასასურველ განცხადებებს ავრცელებენ.
"სულ მუდამ საკუთარ ქვეყნას როგორ უნდა ებრძოდე, არჩევანს უწუნებდე, განვითარების პერსპექტივის წართმევას ცდილობდე
იმის მიუხედავად როგორ მოინდომებთ, როგორ იმავნებლებთ, ვიზა-ლიბერალიზაციაც იქნება, ვარშავის სამიტიც წარმატებული იქნება და ქვეყანაც უკეთესი გვექნება.
ეს ჩვენი ყველას ქვეყანაა, თქვენიც, თქვენი შვილებიც აქ იზრდებიან და მათ მეგობრებიც ამ სიკეთის მოსარგებლე უნდა გახდნენ.
რა ვერ აპატიეთ ასეთი საკუთარ სამშობლოს."-წერს თინა ხიდაშელი.
