ახლახან ოზურგეთის პირველი საჯარო სკოლის (ადრინდელიქ. მახარაძის #1 ქალთა საშუალო) 1955 წლის კურსდამთავრებულებმა, სკოლის დამთავრების 60 წლის იუბილე იზეიმეს.
"ბევრი ადამიანი, სამწუხაროდ, 60 წელსაც ვერ ცოცხლობს. ჩვენ კი სკოლის დამთავრებიდან მე-60 წელი აღვნიშნეთ და ამ იშვიათი მეგობრობის და სიყვარულის ნიშნად, დავთქვით, რომ თუ უფალი ინებებს ჩვენს სიცოცხლეს, 2020 წლის შემოდგომაზე სკოლის დამთავრების 65-ე წლისთავს ვიზეიმებთ. ახლანდელი ჩვენი შეხვედრა მაინც განსხვავებული იყო, რადგან ჩვენი იშვიათი მეგობრობის და ორგანიზებულობის თავკაცები, ჩვენი კლასელები ცოცხლები აღარ არიან. ამიტომ იყო ბევრი ტკივილი, თუმცა ბევრი სასიამოვნო მოგონება და სიხარულიც," _გვითხრა ქალბატონმა ლია ჩავლეშვილმა, რომელიც ახლა 78 წლისაა და რედაქციაში თავად გვესტუმრა.
მან გვიამბო, როგორ განსაკუთრებული წარმატებით სწავლობდნენ, რა დიდი სიყვარულით შთააგონებდა მათ კლასის ხელმძღვანელი, არაჩვეულებრივი პედაგოგი ნინა გოგუაძე სამშობლოსა და ერთმანეთის სიყვარულს. რომ არცერთი კერძო რეპეტიტორთან არ მომზადებულა, მაგრამ უმეტესობამ უმაღლესი სასწავლებელი დაამთავრა, ორი მათგანი კი მეცნიერებათა დოქტორი გახდა. 60 წლის იუბილეც საქართველოს ტექნიკური უნივერსიტეტის პროფესორ იზო როყვას ოჯახში აღნიშნეს. სია კლასის ორგანიზატორმა მერცია ხოხლენკომ წაიკითხა… მერე ზოგი ბავშვური სიანცეც გაიხსენეს: დასვენებაზე როგორ მოპარეს ტაშტი ეროვნებით რუს, ძალიან საყვარელ დაშას და როგორ უმღერეს და უცეკვეს…
ქალბატონ ლია ჩავლეშვილს უხარია და ეამაყება, რომ მათი მეგობრობა და სიყვარული არ განსხვავდებოდა დედმამიშვილური სიყვარულისგან და სურს, მომავალ თაობებსაც ასე უყვარდეთ ერთმანეთი.
დიდხანს სიცოცხლეს და ბედნიერებას ვუსურვებთ ამ იშვიათი თაობის უბერებელ ადამიანებს, რომელთა ცხოვრება ამ წუთისოფელში სამაგალითოა თითოეული ჩვენგანისთვის.
