მიმდინარე წელს, სოფლის მხარდაჭერის პროგრამის ფარგლებში, ლანჩხუთის მუნიციპალიტეტისთვის გამოყოფილი თანხების განაწილების თაობაზე დეპუტატებმა საკრებულოს ბოლო სხდომაზე იმსჯელეს. საკითხი სხდომაზე განსახილველად გამგეობის ინფრასტრუქტურისა და არქიტექტურის სამსახურის უფროსმა, ლევან ჩხაიძემ წარმოადგინა, რასაც დეპუტატთა მხრიდან არაერთი კრიტიკული განაცხადი მოჰყვა.
"მოსახლეობასთან შეხვედრებზე მისული აღმასრულებელი ხელისუფლების წარმომადგენლები ხალხს ეუბნებოდნენ, რომ ამ თუ იმ პროექტის გახორციელება ვერ მოხდება პროგრამის ფარგლებში და რასაც ჩვენ გირჩევთ, ის ჩაწერეთ პირველ რიგშიო. მოსახლეობა სხვას ითხოვდა, თუმცა, აღმოჩნდა, რომ სხვა რამ წერია ოქმში", _ აღნიშნა საკრებულოს მაჟორიტარ დეპუტატთა ნაწილმა.
როგორც გაირკვა, მოსახლეობა, ძირითადად, გზების მოხრეშვას ითხოვდა, თუმცა, შეხვედრის ოქმებში გზებზე რკინა-ბეტონის დაგებაა მითითებული.
საკრებულოს ოპოზიციონერმა დეპუტატმა ნონა მურვანიძემ ჩოჩხათის ადმინისტრაციული ერთეულში არსებულ მდგომარეობაზე გააკეთა აქცენტი: "ხელთ მაქვს ჩოჩხათის ხუთივე სოფლის ოქმი, რომელიც ხელმოწერილია. თუმცა, სოფლისთვის გამოყოფილი თანხის გრაფა ღიადაა დატოვებული. ეს რას ნიშნავს?! ერთიც, მოსახლეობა გზის შეკეთებას, მოხრეშვას ითხოვს, მაგრამ აქ წერია, რომ რკინა-ბეტონი დაიგება. ეს არავის უთხოვია, რადგან ყველამ იცის, რომ ამით მხოლოდ ერთი პატარა მონაკვეთი გაკეთდება, დანარჩენი კი ისევ გაუკეთებელი დარჩება".
ნინოშვილის ადმინისტრაციული ერთეულის მაჟორიტარი დეპუტატი დავით ჩხარტიშვილი დაინტერესდა ვინ უშლიდათ ხელს: "სოფლის მოსახლეობა გზის მოხრეშვას ითხოვს, მაინტერესებს, ვინ გვიშლის ხელს _ ცენტრალური თუ ადგილობრივი ხელისუფლება?"
გამგებელმა ზაზა ურუშაძემ დეპუტატებს განუმარტა, რომ გზების მოხრეშვაში გახარჯული ფული, საბოლოოდ, წყალში გადაყრილი გამოდის და ამიტომაც შეიცვალა ეს წესი:
"თუ თქვენ გინდათ, ჩაწერეთ, გავაგზავნოთ და თუ დაამტკიცეს, ხომ კარგი", _ თქვა ურუშაძემ.
საკრებულოს ინფრასტრუქტურის კომისიის თავმჯდომარე ბესიკ ტაბიძე საკუთარ გამოსვლაში სხვებზე მეტად კრიტიკული ჩანდა: "საკრებულოს სხდომამდე ჩვენ ინფრასტრუქტურის კომისიის სხდომა გვქონდა, რომელსაც 13 სოფლის მაჟორიტარი ესწრებოდა და ამ ხალხმა გულისტკივილი გამოხატა, რომ ოქმებში ბოლომდე არ იყო გათვალისწინებული მოსახლეობის ინტერესი. თბილისში, ვიღაც კაბინეტში რომ ზის და ჰალსტუხი ახრჩობს, იმან საიდან იცის, აკეთში ან ჩოჩხათში რა უნდა მოსახლეობას?! გადაწყვიტეს, გზების მოხრეშვა არ შეიძლება სოფლის პროგრამიდანო. აბა, მოხრეშეთ ერთი ნინოშვილის გზა და ნახავთ, თუ წაიღებს წყალი. ასე არ შეიძლება _ რას ქვია წყალში გადაყრილი ფული?!
ისიც კარგად მოსაკითხია, რამდენად ხარისხიანად ასრულებს ტენდერში გამარჯვებული ფირმა სამუშაოებს. ხელისუფლებას ნინოშვილის მემორიალურ მუზეუმში სარეაბილიტაციო სამუშაოების მიმდინარეობასთან დაკავშირებით მადლობა მინდა გადავუხადო, თუმცა, სამუშაოებს ტენდერში გამარჯვებული ქობულეთელი კაცი ახორციელებს და მუშებიც იქაური მოიყვანა. აქაურები ამას ვერ გააკეთებდნენ? კი, ბატონო, მოიგოს ტენდერი სხვა რაიონის მკვიდრმა, მაგრამ ადგილობრივი მუშახელი არ უნდა დაასაქმო მაინც?" _ აღშფოთება ვერ დამალა ტაბიძემ, თუმცა, გამგებელმა ყველა დაამშვიდა, რომ მკაცრად შემოწმდება გახორციელებული ინფრასტრუქტურული პროექტები და თუ სადმე პრობლემა აღმოჩნდება, იგი სასწრაფო წესით აღმოიფხვრება:
"არავის დავინდობთ და ყველა გახორციელებულ პროექტს მკაცრად შევამოწმებთ. რა თქმა უნდა, ამაში თქვენი, დეპუტატების თანადგომაცაა საჭირო. სოფლის პროგრამებთან დაკავშირებით მე საუბარი მქონდა შესაბამის უწყებებთან და იმ სოფლებში, სადაც დაჩქარებული წესითაა გასახორციელებელი სამუშაოები, ტენდერის გარეშე, ერთ პირთან მოლაპარაკების საფუძველზე ვივლით, თუ, რა თქმა უნდა, ამის აუცილებლობას დავასაბუთებთ", _ დასძინა ურუშაძემ.
