გასული წლის ბოლოს, ჩოხატაურის მუნიციპალიტეტის საკრებულოს თავმჯდომარის ზაალ მამალაძის მიერ, საკრებულოს სხდომაზე გაჟღერებული იდეა, ჩოხატაურში პროფესიული განათლების კერა აღდგენის შესახებ, გახორციელების საწყის სტადიაშია.
ჩოხატაურის მუნიციპალიტეტის სოფელ ქვემოერკეთში, ყოფილი ტექნიკუმის შენობა სპეციალისტებმა უკვე შეამოწმეს და როგორც გვითხრეს, მალე სამხარაულის ექსპერტიზის დასკვნა ცნობილი გახდება. იმ შემთხვევაში, თუკი შენობის ვარგისიანობა დადგინდება, ერკეთში პროფესიული სასწავლებელი აღდგენის საკითხების მოგვარება დაიწყება, რომელსაც სასწავლო ბაზა გორაბერეჟოულში ექნება.
საკითხის მოგვარებაში აქტიურად არის ჩართული ჩოხატაურის მუნიციპალიტეტის მაჟორიტარი დეპუტატი საქართველოს პარლამენტში თემურ ჭკუასელი:
_ როგორც კი ეს ინიციატივა გაჟღერდა, ძალიან დამაინტერესა. საკრებულოდან ყველაფერი გამოვაგზავნინე და მაშინვე განათლების სამინისტროში, ქეთევან ნატრიაშვილთან მივიტანე _ ადამიანთან, რომელსაც ეს საკითხები ეხება. იქ საინტერესო რამ მოხდა ბიუჯეტთან დაკავშირებით _ მითხრეს, რომ ან ამ საკითხის განხილვა და მასზე მუშაობა დაგვეწყო ან გაგვეგრძელებინა სოფელ გუთურის სკოლის დაპროექტება. თუმცა, აღმოჩნდა, რომ გუთურის სკოლის პროექტისს მომზადება დაწყებული იყო. გავბრაზდი _ რა როგორ წამომცდებოდა, სკოლის პროექტი შევაჩაროთ,-მეთქი. ვუთხარი, რომ ორივე უნდა გაგვეკეთებინა და ასეც მოხდა.
რამდენადაც ვიცი, ექსპერტთა ჯგუფი უკვე ჩამოვიდა. ამ დროს წამოგვეშველა პრემიერის განცხადება, რომ გვჭირდება პროფესიული დარგების განვითარება და პროფესიული მუშახელი. აბსოლუტურად ყველგან მუშაობენ უცხოელები. აგრონომები არ გვყავს, ტრაქტორისტები არ გვყავს. ამ ფონზე, აუცილებელია გორაბერეჟოულის ტექნიკუმის აღდგენა და ეს ყველას დავუმტკიცე არა ერთხელ. ახლა, გვირაბის ბოლოს გამოჩდა სინათლეც _ გერმანიიდან შემოვიდა გრანტი, რომლის ნაწილი პირდაპირ ამ სფეროსთვის არის განკუთვნილი. რა თქმა უნდა, ამ შანს ხელიდან არ გავუშვებ! მით უმეტეს, აქ საუბარია ორი სოფლის გაცოცხლებაზე, ადამიანების დასაქმებაზე, ახალგაზრდების სწავლაზე. არც ერთხელ არ მიმიტოვებია ეს თემა. მეტსაც გეტყვით _ ჩვენთან აშენდა ხილის გადამამუშავებელი საწარმო, ასკანაში დიდი კომპლექსი შენდება, სადაც მარანიც იქნება, მუზეუმიც… მივიყვანე კომპანიის ხელმძღვანელი ზურაბ ჩხაიძე ქეთევან ნატრიაშვილთან, რომელმაც პირდაპირ უთხრა, რომ გორაბერეჟოულის ტექნიკუმის კურსდამთავრებულების გარკვეულ ნაწილს აუცილებლად დაასაქმებს. ამით იმის თქმა მინდა, რომ ბიზნესსაც სჭირდება მუშახელი. ჰესების მშენებლობა მიმდინარეობს, ზოგიც ახლა უნდა დაიწყოს _ თუკი ტექნიკუმი აღდგება და პროფესიულ განათლებას მისცემს ადამიანებს, ადგილობრივ კადრებს სამუშაო გამოუჩნდებათ და ეს ძალიან მნიშვნელოვანი საკითხია, _ აღნიშნა თემურ ჭკუასელმა "გურია ნიუსთან" საუბრისას.
ჩოხატაურის საკრებულოს თავმჯდომარემ ზაალ მამალაძემ ტექნიკუმის აღდგენასთან დაკავშირებით წერილები უკვე გაუგზავნა პრემიერ-მინისტრს, განათლების, სოფლის მეურნეობის, ენერგეტიკის მინისტრებს და როგორც თავად გვითხრა, საკითხი დაძრულია:
_ განათლების სამინისტროს წარმომადგენლები უკვე იყვნენ ჩამოსულები და დეტალურად შეისწავლეს შენობები. ასევე, სამინისტროს წერილის საფუძველზე, მოვიწვიეთ სამხარაულის ექსპერტიზის ბიუროს წარმომადგენლები, რომლებმაც უნდა დაწერონ დასკვნა ერკეთში არსებული შენობის მდგრადობასთან დაკავშირებით. დასკვნა რამდენიმე დღეში გახდება ცნობილი და თუკი ყველაფერი დადებითად გადაწყდა, იწყება მეორე ეტაპი, რაც დაპროექტებას და პროფესიული ტექნიკუმის დაფუძნების შესახებ მოლაპარაკებას ითვალისწინებს _ პროფილის განსაზღვრა უნდა მოხდეს. ვფიქრობთ, ეს იქნება ფართო პროფილის სასწავლებელი, რომლის ძირითადი მიმართულება სოფლის მეურნეობა გახდება, მაგრამ იქნება ენერგეტიკის, სატყეოს და მსუბუქი მრეწველობის დარგებიც, რომლის აუცილებლობაზე ცოტა ხნის წინ პრემიერმა ვრცლად ისაუბრა, _ აღნიშნა ჩვენთან საუბრისას ჩოხატაურის მუნიციპალიტეტის საკრებულოს თავმჯდომარემ.
ზაალ მამალაძის თქმით, ოთხსართულიანი სასწავლო კორპუსის აღდგენასთან ერთად, მიმდინარეობს მუშაობა საცხოვრებელი კორპუსის აღდგენაზე:
_ ორივე შენობის მდგრადობის დასკვნას დადებენ სპეციალისტები და ამის შემდეგ, უფრო დეტალურად შეგვეძლება საუბარი. სასწავლო კორპუსზე საცხოვრებელი კორპუსის მიბმა აუცილებელია, რაც იმას ნიშნავს, რომ სასწავლებელი მხოლოდ ჩოხატაურელებისთვის არ იქნება და ეს კომპლექსი რეგიონის სასწავლო ცენტრი გახდება, _ გვითხრა ზაალ მამალაძემ.
