“ჩვენ ოპოზიციასთან კონსტრუქციულად ვთანამშრომლობთ”

მიუხედავად იმისა, რომ “გურია ნიუსთან” საუბარში ოპოზიციონერი დეპუტატები 2011 წლის ბიუჯეტის პროექტს უნდობლობას უცხადებენ, არ არის გამორიცხული, ოზურგეთის მუნიციპალიტეტის საკრებულომ 2011 წლის ბიუჯეტი ახალი წლის დადგომამდე რამდენიმე საათით ადრე მიიღოს და დაამტკიცოს.
ამ თემაზე “გურია ნიუსის” შეკითხვებს ოზურგეთის მუნიციპალიტეტის საკრებულოს თავმჯდომარე ალეკო მამეშვილი პასუხობს.
_ ბატონო ალეკო, ოზურგეთის მუნიციპალიტეტის საკრებულოს ოპოზიციონერი წევრები ამბობენ, რომ უნდობლობას უცხადებენ 2011 წლის ბიუჯეტის პროექტს. თემურ სალუქვაძის თქმით, ეს ბიუჯეტი არის წინა წლების ბიუჯეტების ტრადიციული გაგრძელება მცირეოდენი ცვლილებებით.
_ უკვე ერთი თვეა, რაც საკრებულოში მიმდინარეობს 2011 წლის ბიუჯეტის პროექტზე მუშაობა. ჩავატარეთ 3 საჯარო შეხვედრა და პარალელურად, კომისიებში აქტიურად ხდებოდა მისი განხილვა. ყველა კომისიამ მოამზადა საკუთარი დასკვნა. ნებისმიერ დაინტერესებულ პირს, მით უმეტეს, საკრებულოს წევრს, შეეძლო მონაწილეობა მიეღო მის დაგეგმვაში და წარმოედგინა საკუთარი მოსაზრებები. ყოველივე აქედან გამომდინარე, ჩემთვის გაუგებარია, რატომ აცხადებს ამას ბატონი თემური.
_ “ძვირადღირებული ხელისუფლება” ჴ ასე დაახასიათეს ოპოზიციის წარმომადგენლებმა მმართველი ძალა. თქვენი აზრით, სწორია, როცა 7 835 00 ლარიდან 2 418 400 ლარი ხელისუფლების სახელფასო ფონდს ხმარდება?
_ ერთია, მონაწილეობდე ბიუჯეტის ფორმირების პროცესში და მეორეა, შეგეძლოს მისი სწორი ანალიზი. თუ გადავხედავთ 2010 წლის ბიუჯეტს და შევადარებთ მას 2011 წლის ბიუჯეტს, დავინახავთ, რომ ხარჯები შემცირებულია 19,6 პროცენტით. აქედან გამომდინარე, მსგავსი შეფასება მართებულად არ მიმაჩნია.
_ ერთ-ერთმა ოპოზიციონერმა, ლელა ნაცვალაძემ ჩვენთან საუბრისას თქვა, რომ ხელისუფლება ცდილობს, ის ორგანიზაციები დააფინანსოს მსუყედ, საიდანაც “ატკატი” კეთდება.
_ აბსურდული ბრალდებაა. მე პირადად შევხვდი ყველა მხარჯველ სუბიექტს, გავეცანი მათ მიერ წარმოდგენილ საბიუჯეტო განაცხადებს. გვქონდა საქმიანი შეხვედრები და ვფიქრობ, რომ ბიუჯეტის თითოეული თეთრი მიზნობრივად იქნება გახარჯული.
_ ითვალისწინებთ თუ არა ბიუჯეტის პროექტის შედგენის დროს ოპოზიციონერი დეპუტატების აზრს?
_ ჩვენ ოპოზიციასთან კონსტრუქციულად ვთანამშრომლობთ. თუკი მათ მიერ წარმოდგენილი საკითხები იქნება შესაბამის ჩარჩოში მოქცეული და რეალურად განხორციელებადი, მოხდება მათი გათვალისწინება. მაგალითისთვის მინდა აღვნიშნო ქალაქის განაშენიანების გეგმის შემუშავება, რომელიც ბატონი თემურ სალუქვაძის ინიციატივაც იყო და ერთობლივი მსჯელობის შედეგად მივედით საერთო გადაწყვეტილებამდე. მომავალი წლიდან დაიწყება ამ პროექტის ეტაპობრივი გახორციელება.
_ შვიდი თვეა, რაც თქვენ ოზურგეთის მუნიციპალიტეტის საკრებულოს თავმჯდომარე ხართ. იქნებ, დაგვისახელოთ სამი მიღწევა და სამი საქმე, რომელიც გინდოდათ გაგეკეთებინათ და ვერ გააკეთეთ.
_ მიუხედავად იმისა, რომ  7 თვე არც ისე დიდი დროა, ვფიქრობ, რომ მე და ახალმა საკრებულომ უკვე შევძელით გარკვეული სამუშაოს შესრულება, მოსახლეობის ინტერესებიდან გამომდინარე. ძნელია გამოვყოთ სამი გასაკეთებელი ან გაუკეთებელი საქმე. იმას არ ვამბობთ, რომ ყველაფერი მოგვარებულია. თუმცა, ჩვენს მიერ წამოწყებული თუ ინიცირებული ყველა საკითხი გავახორციელეთ ან გახორციელების პროცესშია. ეს ყველაფერი უწყვეტი პროცესია და პერმანენტულად მიმდინარეობს.