„ქართული ოცნება – დემოკრატიული საქართველოს“ ყრილობა 14 მაისს გაიმართება. ყრილობაზე აირჩევა პარტიის თავმჯდომარე და დამტკიცდება პარტიის პოლიტიკური საბჭოს ახალი შემადგენლობა. თუმცა, როგორც გვითხრეს, ყრილობაზე არ დასახელდება დეპუტატობის სავარაუდო კანდიდატები, რომლებზეც მსჯელობა ახლაც მიმდინარეობს.
„გურია ნიუსის“ ინფორმაციით, „ქართული ოცნება“ გურიაში წარსადგენი კანდიდატებიდან მხოლოდ ოზურგეთზეა ჩამოყალიბებული _ მმართველი ძალა გურიის მთავარ ქალაქში შინაგან საქმეთა მინისტრის მოადგილის, არჩილ თალაკვაძის წარდგენას გეგმავს, რომელიც, როგორც ამბობენ, ბიძინა ივანიშვილის ფავორიტია.
რაც შეეხება ჩოხატაურს და ლანჩხუთს _ წინა არჩევნებისგან განსხვავებით, ოლქების ახალი გადანაწილების გამო, ერთი კანდიდატი უნდა დასახელდეს, რაც არც ისე ადვილია. როგორც ჩოხატაურელები, ასევე, ლანჩხუთელები წინასწარ აანონსებენ, რომ მეზობელი მუნიციპალიტეტის მკვიდრს ხმას არ მისცემენ.
ამიტომაც, როგორც გვეუბნებიან, „ოცნება“ ბევრს ფიქრობს. თუკი იმას გავითვალისწინებთ, რომ ლანჩხუთი ტერიტორიულად და ამომრჩევლის რაოდენობითაც ჩოხატაურზე დიდია, კანდიდატი ლანჩხუთიდან უნდა შეარჩიონ, რაზეც, როგორც კულუარებში ამბობენ, „ოცნება“ უკვე მუშაობს.
„გურია ნიუსისთვის“ მიწოდებული ექსკლუზიური ინფორმაციით, ლანჩხუთისა და ჩოხატაურის მაჟორიტარად „ოცნებაში“ ოთხი კანდიდატურა განიხილება _ გურიის ყოფილი გუბერნატორი გიორგი ჩხაიძე, რომელიც წარმოშობით ლანჩხუთიდანაა; ასევე ლანჩხუთელი, ბიზნესმენი ბადრი წილოსანი; კიდევ ერთი ლანჩხუთელი ბიზნესმენი სოსო ჩხაიძე, რომელიც „ნაციონალური მოძრაობის“ ყოფილი წევრის, დეპუტატ მარიკა ვერულაშვილის ქმარია და ჩოხატაურის მაჟორიტარი დეპუტატი თემურ ჭკუასელი.
გიორგი ჩხაიძესთან ინფორმაციის გადამოწმება შეუძლებელი აღმოჩნდა _ ყოფილი გუბერნატორი ქვეყანაში არ იმყოფება. ჩვენ ვერც სოსო ჩხაიძესთან დაკავშირება შევძელით. როგორც გვითხრეს, ისიც ქვეყნის გარეთ, გერმანიაში იმყოფება. ბადრი წილოსანი ჩვენს სატელეფონო ზარებს არ პასუხობს.
რაც შეეხება თემურ ჭკუასელს, იგი „გურია ნიუსთან“ საუბრისას არ უარყოფს, რომ მისი კანდიდატურა განხილვის სტადიაშია.
„თუ მთხოვეს, მიუხედავად იმისა, რომ დიდი სურვილი არ მაქვს, უარს არ ვიტყვი, მაგრამ ჯერ ეს თხოვნა არ ყოფილა. ჩემი დედულეთი ლანჩხუთშია და სიმართლე რომ გითხრათ, ლანჩხუთში უფრო კარგად მიცნობენ, ვიდრე ჩოხატაური მიცნობდა 2012 წელს. არის ის მომენტიც, რომ მე თავად შემიძლია ვითხოვო კანდიდატად დაყენება, რადგან ჩემი წარსული, ურთიერთობები მაძლევს ამის თქმის საფუძველს, თუმცა ამას არ გავაკეთებ“, _ აღნიშნა ჭკუასელმა „გურია ნიუსთან“ საუბრისას.
მისივე თქმით, ამ საკითხზე ბიძინა ივანიშვილთან არ უსაუბრია:
_ როცა ბიძინა ვნახე, ერთადერთი, რითაც დაინტერესდა, ის იყო, ვიყავი თუ არა ჯანზე, _ დასძინა თემურ ჭკუასელმა.
ჩოხატაურის მაჟორიტარი დეპუტატი, რომელიც „ქართული ოცნების“ პოლიტსაბჭოს წევრიცაა ამბობს, რომ ამ ეტაპზე პარტია კულისებში მუშაობს:
_ კულისებში მუშაობაში ვგულისხმობ იმას, რომ ეს ინფორმაცია პრესისთვის არაა საჯარო. მხოლოდ ის შემიძლია გითხრათ, რომ მეც და სხვა ლიდერებსაც პარტიაში მიგვაქვს სხვადასხვა ადამიანების შესახებ ინფორმაცია, რეკომენდაციებს ვუწევთ ახალ სახეებს, _ გვითხრა ჭკუასელმა.
ყოფილი პრემიერ-მინისტრის, ბიძინა ივანიშვილის მეგობარი დეპუტატი ამბობს, რომ ივანიშვილი „ქართულ ოცნებას“ წელსაც დააფინანსებს:
_ ბიძინა ივანიშვილი „ქართულ ოცნებას“ რაღაც დოზით დააფინანსებს. ამის გარდა, „ქართული ოცნება“ და ასევე, ის პარტიები, რომელსაც ბარიერი გადალახული აქვთ დაფინასებას ბიუჯეტიდანაც მიიღებენ. ასევე, მე ვიცი ძალიან ბევრი ბიზნესმენი, რომლებიც მზად არიან ჩვენი პარტიის დასაფინანსებლად, _ აღნიშნავს ჭკუასელი.
მისივე თქმით, კანდიდატებზე მსჯელობა პოლიტსაბჭოზე ჯერ არ ჰქონიათ და გვარებზე საუბარიც ნაადრევია.
„ქართული ოცნების“ პრესსამსახურის ინფორმაციით პოლიტიკურ სიაზე მუშაობა აქტურ ფაზაშია და კომენტარები მას შემდეგ გაკეთდება, რაც მუშაობა დასრულდება.
