ქალაქ ლანჩხუთში, ჟორდანიას ქუჩის ცენტრალურ მონაკვეთზე, ე. წ. "იმერეთის ბაზრობასა" და აჯანყებული გურულის ძეგლს შორის არსებულ მონაკვეთზე ასფალტის საფარი არა ერთ ადგილასაა დაზიანებული და შესაკეთებელია. გაჩენილი ორმოები დისკომფორტს უქმნის როგორც ქვეითად მოსიარულეებს, ასევე, ავტომანქანების მძღოლებსაც. აღნიშნულ ტერიტორიაზე განსაკუთრებით გაძნელებულია მოძრაობა წვიმიან ამინდში, როცა ორმოები წყლით ივსება.
ქალაქის ეს მონაკვეთი საკმაოდ გადატვირთულია _ აქ თავს იყრის სოფლებიდან თუ მეზობელი რაიონებიდან ჩამოსული მიკროავტობუსები, არის ტაქსების გაჩერება და რამდენიმე მარკეტი. აქვე, იბარებენ თხილს და ყიდიან ბოსტნეულს.
"ორმოების გამო, წვიმიან ამინდში სულ წყალი დგას, რის გამოც, ფეხით მოსიარულეებს ორმაგი პრობლემა გვექმნება. ზოგი მანქანა ჩერდება მაღაზიებთან, ზოგიც _ მიდის, აქეთ ტაქსების გაჩერებაა, იქით _ მიკროავტობუსების… ირგვლივ სრული ქაოსია და როგორმე უნდა მოახერხო ამ არეულობაში გზა მშვიდობიანად გაიკვლიო, ან მანქანა არ დაგეჯახოს, ან გუბეში არ ჩავარდე. ეს კი ნამდვილად ძნელია. ტაქსები, ავტობუსები, მაღაზიები _ ყველაფერი ერთადაა თავმოყრილი. არც მძღოლები არიან კარგ დღეში, ისინიც წვალობენ, ცდილობენ მანქანა ორმოსაც ააცდინონ და ადამიანსაც არ დაეჯახონ", _ ამბობენ მოქალაქეები, რომლებსაც დარსა თუ ავდარში, ფეხითა თუ მანქანით, ხშირად უწევთ ქალაქის ამ მონაკვეთში გადაადგილება.
როგორც ირკვევა, ქალაქის რეაბილიტაციის პროექტის ფარგლებში, რომლის ღირებულება 708 888 ლარია, სამ წელზეა გაწერილი და ქალაქის ცენტრის სრულ რეკონსტრუქციას ითვალისწინებს, ზემონახსენები ტერიტორიის მიმდებარედ არსებული ბორდიურის რეკონსტრუქცია იგეგმება. პროექტის მიხედვით, იქ დარგული პალმიდან ერთი ქალაქის ცენტრის სხვა მონაკვეთში უნდა გადაიტანონ, ხოლო დანარჩენის ირგვლივ ხელოვნური ბორცვები მოეწყობა.
"ბორდიური შენარჩუნდება, თუმცა, სხვა ფორმით, რის შემდეგაც მანქანების პარკირებისთვის ადგილი გამოთავისუფლდება. ბუნებრივია, როცა ამ ტერიტორიის რეკონსტრუქცია მოხდება, მიმდებარე ტერიტორიასაც მიექცევა ყურადღება და იქ გაჩენილი ორმოების ამოვსება მოხდება", _ გვითხრა ლანჩხუთის მუნიციპალიტეტის გამგეობის ინფრასტრუქტურისა და არქიტექტურის სამსახურის უფროსმა ლევან ჩხაიძემ.
