როგორც იქნა, "ევგრაფ შევარდნაძის" სახელობის სტადიონზე მოსულმა ფეხბურთის ქომაგმა კარის ბადეში "აფართხალებული" ბურთი იხილა, მაგრამ გატანილი გოლით ლანჩხუთლებმა ვერა და სტუმრებმა კი გაიხარეს.
"გურია" საკმაოდ ძლიერ მეტოქეს და სატურნირო ცხრილის სამეულის ბინადარ გორის "დილას" მასპინძლობდა და საქმეს ისეთი პირი უჩანდა ზედიზედ მეოთხე ლანჩხუთურ მატჩში უგოლო ფრით დაკმაყოფილდებოდა. ის იყო ტრიბუნაზე ვიღაცამ დაიჩივლა, რა გახდა ერთი გოლი მაინც გვენახა, ჯანდაბას ჩვენებს თუ ვერ გააქვს, სხვამ მაინც გაიტანოსო და ჯარიმაც დაინიშნა „გურიას“ საჯარიმოს მისადგომებთან. იქედან დარტყმული ბურთი ცოცხალმა კედელმა კი უკუაგდო, მაგრამ გორელთა ხელმეორე ჩაწოდებისას ივარგა შეცვლაზე შესულმა ისლამ მაშუკოვმა და მასპინძელთათვის ჩვეულ შედეგს ცივი შხაპი გადაასხა.
დარჩენილ წუთებში თამაშის გადარჩენა წარმოუდგენელი აღმოჩნდა, „გურიამ“ მეორე წრეში პირველი შინაური მარცხი იწვნია და ეს მაშინ, როცა მას ახალი თავკაცი, თემურ მახარაძე წვრთნიდა.
სამწუხაროდ მახარაძის დებიუტი უიღბლო გამოდგა და ფრის შემთხვევაში ამას არავინ იტყოდა. ძნელია მარცხშიც ის დავადანაშაულოდ, უბრალოდ 2 დღეში სასწაულის მოხდენა ბევრისმნახველ მწვრთნელსაც კი არ შეეძლო.
თავად შეხვედრა, ძალიან ცუდი საცქერი გამოდგა, მწირი მომენტებით, ნელი ტემპით და უაზრო ბურთაობით. „გურიას“ ხომ თავისი ჭირდა, „დილაც“ ვერ იყო დიდი ვერაფერი და ფრეც ლოგიკური შედეგი იქნებოდა. ისე კი სტუმრებს გოლამდე ორჯერ მართებდათ გატანა, მასპინძლებს კი ერთხელ. გორელთა შანსებს ჯერ პირველ ტაიმში ცარიელ კართან დაუხვდა გამყრელიძე, ხოლო მეორე ტაიმის ბოლოსკენ იოვანოვიჩმა აიღო ურთულესი ბურთი.
მასპინძელთაგან გატანა შეეძლო შეცვლაზე შემოსულ პანამელ დანიელ კარლოსს. ეს ეგზოტიკური ვარცხნილობის მქონე ჯანიანი მოიერიშე კარგად ჩაერთო შეხვედრაში და სადებიუტო შეხვბედრაშივე შეეძლო გატანა, მაგრამ მუჯრიშვილს პირისპირ ვერ აჯობა.
მოკლედ "გურიას" კრიზისი უკვე თვალნათელია და სატურნირო ცხრილშიც იგრძნობა ეს ყველაფერი. ამ ტურში როგორც თერჯოლის "საპოვნელამ" , ასევე მარტვილის "მერანმა" ფრედ ითამაშეს და კონკურენტ "გურიასთან" სამი ქულაღა აშორებთ. მომავალ ტურში ეს გუნდები თერჯოლაში შეხვდებიან ერთმანეთს, გურულებს კი ქობულეთში, ბათუმის "დინამოსთან" სტუმრობა ელით.
გურია: იოვანოვიჩი, ჩადუნელი, კილაძე (46. კარლოსი), პატერსონი, ნოზაძე, ზაზულია, მოროზენკო, ალავერდაშვილი, ნუნესი, კახელიშვილი (68. შტანდერი. 89. ჟუნიორი), გამყრელიძე
სათადარიგოები: იმერლიშვილი, ბენეტი, გუჯაბიძე
მთავარი მწვრთნელი: თემურ მახარაძე
დილა: მუჯრიშვილი, სამხარაძე, კვირკველია, ბაგაევი, ხურცილავა, ნონიკაშვილი (75. წიქარიძე), ფალავანდიშვილი, ძარია (73. მაშუკოვი), ღონღაძე, მოდებაძე, მარცვალაძე (82. ჩელებაძე)
სათადარიგოები: ლეგაშვილი, ქარქუზაშვილი, გამცემლიძე, თექთურმანიძე
მთავარი მწვრთნელი: უჩა სოსიაშვილი
გაფრთხილება: ბაგაევი (48)
არბიტრი: ლ. სილაგავა
