ქართული ფეხბურთის ყოფილი მესაჭე მერაბ ჟორდანია რომ საქართველოშიც აპირებს ფეხის მოკიდებას, ეს ამბავი ახალი არავისთვისაა _ ჰოლანდიური “ვიტესის” ქართველი მეპატრონე არ მალავდა, რომ მეგობრებთან ერთად თბილისის “დინამოს” დაბრუნება სურდა, თუმცა ქართული ფეხბურთის ფლაგმანს უკვე ჰყავს ახალი მეპატრონე _ კლუბს ბადრი პატარკაციშვილის ოჯახიდან ბიზნესმენი რომან ფიფია გადაიფორმებს. ცნობილია ის ფაქტიც, რომ ჟორდანიას საყვარელ ქართულ კლუბად ლანჩხუთის “გურია” მიიჩნევა. ის არასდროს მალავს, რომ ყველაზე მეტად სწორედ “გურიას” ქომაგობს. ჩვენ ჯერ კიდევ თვეების წინათაც ვწერდით, რომ მსოფლიო საფეხბურთო წრეებში გავლენიანი ქართველი მოხელე საქართველოში საფეხბურთო სკოლის გახსნას აპირებდა. კულუარული ინფორმაციით, ის აქცენტს დასავლეთ საქართველოზე გააკეთებს და სავარაუდო ნავსაყუდელად რამდენჯერმე გრიგოლეთის საწვრთნელი ბაზა დასახელდა.
რას ნიშნავს საფეხბურთო აკადემიის გახსნა? ქართული გამოცემის გავრცელებული ინფორმაციით, ეს აპრობირებული მეთოდია, რომელსაც უფრო ბობოლა კლუბები მიმართავენ, თუმცა, არც “ვიტესის” გაქანების გუნდები ერიდებიან. რა თქმა უნდა, ეს ყველაფერი “ვიტესის” ქართველ პრეზიდენტ მერაბ ჟორდანიას მეშვეობით მოხდება. და თუ გეგმა გახორციელდება, აკადემიაში ჰოლანდიელი მწვრთნელები იმუშავებენ ჴ ამ აკადემიის საუკეთესო ტალანტები კი პირდაპირ არნემულ კლუბში წავლენ (საუკეთესოები ლონდონის “ჩელსიშიც” მოხვდებიან _ ჟორდანია-აბრამოვიჩის მეგობრობაზე უკვე ღიად საუბრობენ და იმასაც ამბობენ, რომ ჰოლანდიური კლუბი ჟორდანიამ რუსი მილიარდერის ფულით იყიდა. რედ.).
“საქართველოში აკადემიის გახსნა ჩვენს გეგმებშია” ჴ ციტირებს “ვიტესის” ტექნიკური დირექტორის ტედ ვან ლიუვენის კომენტარს ჰოლანდიური მედია.
ამის პარალელურად მეტად დამაინტრიგებელია ლანჩხუთში ბავშვთა საფეხბურთო სკოლის გახსნა. რა თქმა უნდა, ჯერჯერობით, სანამ ჟორდანია გადაწყვეტილებას არ მიიღებს, ლანჩხუთში ამაზე კონკრეტულ კომენტარს არ და ვერც გააკეთებენ. თუმცა, ის ფაქტი, რომ საფეხბურთო სკოლა იქმნება, რა თქმა უნდა, გავრცელებულ ინფორმაციებს ინტრიგას აშკარად მატებს.
რაც შეეხება ლანჩხუთის საფეხბურთო სკოლას, მას გურიის რეგიონული ფეხბურთის ფედერაციის და ლანჩხუთის “გურიის” ყოფილი თავკაცი დურმიშხან ჩხაიძე რომ ხელმძღვანელობს, უკვე გაუწყეთ. ცნობისა და დამატებითი ინტრიგისთვის: ჩხაიძე მერაბ ჟორდანიას გუნდის წევრად მიიჩნევა, იგი ხელმძღვანელობდა მის საარჩევნო კამპანიას საპარლამენტო არჩევნების დროს, ხოლო როცა ჟორდანია დაიჭირეს, გურული ფეხბურთის მესაჭე ერთ-ერთი იყო, ერთადერთი თუ არა, სფფ-ს პატიმარ თავკაცს ღიად რომ იცავდა. ჩხაიძე ამის გამო ასევე ღიად დაუპირისპირდა ჟორდანიას შემცვლელ ნოდარ ახალკაცს.
აი, რას ამბობს დურმიშხან ჩხაიძე ახალშექმნილ სკოლაზე, მის პერსპექტივებსა და სამომავლო გეგმებზე:
_ ჩვენი სკოლა, რომელიც ფუნქციონირებას 2011 წლის პირველი იანვრიდან დაიწყებს, საქართველოში გამორჩეული ექნება. მეტიც, მას ანალოგი არ ექნება, თუ არ ჩავთვლით, დიდი ტრადიციების მქონე თბილისის 35-ე საფეხბურთო სკოლას. სკოლაში მოხდება არსებული საფეხბურთო რესურსის თავმოყრა.
_ სად გექნებათ ოფისი და რამდენად მართალია ინფორმაცია, რომ საფეხბურთო მწვრთნელების უმრავლესობა უადგილოდ დარჩება?
_ ყოფილი მანქანათმშენებლობის კოლეჯის ფართი გადმოგვეცემა, სადაც არის კორპუსები და საფეხბურთო მოედანი. ასევე, 2 დარბაზი. ჩვენს დაქვემდებარებაში იქნება ყოფილი ინტერნატის სტადიონი, ჩიბათის სპორტული კომპლექსი, ქალაქში არსებული ყველა ხელოვნურსაფარიანი მოედანი. ანუ, ფაქტობრივად, მთელ რაიონს მოვედებით. რაც შეეხება მწვრთნელებს, ჩვენთან ერთი აუცილებელი და უპირველესი პრინციპია _ აქ მხოლოდ ლიცენზირებული მწვრთნელები იმუშავებენ!
_ ასეთი ლანჩხუთში რამდენია? თქვენი სკოლისთვის საკმარისი იქნება?
_ როგორც ვიცი, ამჟამად 7 ლიცენზირებული მწვრთნელი გვყავს, 3 გადის სწავლებას. ეს კი სავსებით საკმარისია. აქედან ერთს სკოლის მთავარი მწვრთნელის თანამდებობა შეუთავსდება. აუცილებლად გვეყოლება მეკარეთა მწვრთნელი.
_ თუ არ ვცდები, ლანჩხუთში 30-მდე მწვრთნელია. რა ბედი ელით მათ?
_ ვერაფერს გეტყვით. ჩვენ მივიღებთ იმდენს, რამდენიც გვჭირდება. კატეგორიულად ვამბობ, რომ შტატებს ვერ გავზრდით ვიღაცის გამო. ადმინისტრაციაც კი ორკაციანი იქნება _ დირექტორი და ბუღალტერი. როცა გაიგეს დირექტორად დავინიშნე, ბევრი ნაცნობი მეუბნება _ მოადგილედ წამიყვანეო. გამორიცხულია _ ასეთი შტატი არ გვექნება. თანხის ძირითადი ნაწილი ბავშვებს, მათ გაწვრთნას, ტრანსპორტირებას და სხვა ხარჯებს უნდა მოხმარდეს და არა ხელფასებს.
_ სულ პრობლემა იყო გზის და სხვადასხვა ხარჯი, თუნდაც ფორმის, ბურთების, რის გამოც ბევრმა ბავშვი ფეხბურთიდან გაიყვანა. ეს საკითხი თქვენთან მოგვარებულია?
_ კი, ეს პრობლემა 100%-ით მოგვარებულია! არანაირი შენატანი მშობელს არ დასჭირდება! ისევ მწვრთნელებს დავუბრუნდები. რა თქმა უნდა, ზოგი მწვრთნელი უმუშევრად დარჩება, მაგრამ მათ შეუძლიათ აიყვანონ ჯგუფები, ჩვენ ამას ვერავის ავუკრძალავთ.
_ თუმცა, თუ თქვენთან ყველაფერი უფასო იქნება და ლიცენზირებული სპეციალისტები გეყოლებათ, მათთან ვინ მივა?
_ ვერაფერს გეტყვით.
_ როგორც ინფორმაცია გავრცელდა, სკოლას ფეხბურთის ფედერაციაც დაეხმარება.
_ მეც ასე ვიცი, რომ ფეხბურთის ფედერაცია 30 ათასი ლარის სპორტული ინვენტარით დაგვეხმარება.
_ რა ასაკის ბავშვები გეყოლებათ და რომელ ტურნირებში მიიღებთ მონაწილეობას?
_ 7 წლიდან 15 წლამდე ასაკის ჯგუფები გვეყოლება. ყველა ტურნირში მივიღებთ მონაწილეობას, რომელიც კონკრეტულ ასაკში ჩატარდება.
_ თქვენი სკოლა არ ექვემდებარება “გურიას”. ნუთუ თქვენი მიზანი კლუბის ფეხბურთელებით მომარაგება არ იქნება?
_ ლანჩხუთისთვის “გურია” განუყოფელი ნაწილია და თქმა არ უნდა, კლუბისთვის ფეხბურთელების გაზრდა ჩვენი არაპირდაპირი მოვალეობა იქნება. ამას ვერავინ დაგვავალდებულებს, რადგან წესდებითაც არ გვაქვს ეს მოთხოვნა. ამასთან, ჩვენი სკოლა ტრანსფერებზეც იმუშავებს, ანუ ჩვენი მობურთალები სხვადასხვა კლუბებში გასხვისდებიან, ხოლო თანხა ისევ სკოლის და ლანჩხუთში ბავშვთა ფეხბურთის განვითარებას მოხმარდება.
_ ბატონო დურმიშხან, თუ “გურიას” სპონსორი გამოუჩნდა, რომელიც აუცილებლად მიიჩნევს კლუბთან მიბმული საფეხბურთო სკოლაც ჰყავდეს, რამდენად შესაძლებელია, რომ თქვენი სკოლაც ინვესტორის დაქვემდებარებაში აღმოჩნდეს?
_ ყველაფერი შესაძლებელია, ესაა მოლაპარაკების თემა. ჩვენ მივესალმებით ყველა წინგადადგმულ ნაბიჯს.
ამასობაში კი, შაბათს, 25 დეკემბერს კახა კალაძემ მორიგი საქველმოქმედო აქცია ჩაატარა _ საქართველოს ნაკრების კაპიტანი მშობლიურ ქალაქ სამტრედიას ეწვია, ეროსი მანჯგალაძის სახელობის სტადიონზე საფეხბურთო სკოლის 9-დან 16-წლამდე ასაკის 100 ბავშვსა და მათ მწვრთნელებს შეხვდა და იტალიური ფირმა ერრეა-ს ნაწარმი, სპორტული ეკიპირების სრული კომპლექტები საჩუქრად გადასცა: _ ბავშვებსა და მათ მწვრთნელებს ერრეა-ს სრული კომპლექტები გადავეცით. ბედნიერი ვარ, რომ ბავშვებმა ძალიან გაიხარეს. მინდა, სამტრედიის საფეხბურთო სკოლას სხვა მხრივაც დავეხმარო. მათ მოედანი კი აქვთ, მაგრამ ეს არ არის საკმარისი. ადმინისტრაციულ კორპუსს ავაშენებთ. ბავშვებს ყველა პირობა უნდა შევუქმნათ ნორმალური ვარჯიშისთვის. სამტრედიის მთავარი გუნდი ადგილობრივი ფეხბურთელებით დაკომპლექტდება, მომავალი თაობის გაზრდა კი ბავშვთა ფეხბურთიდან უნდა დავიწყოთ, _ კახა კალაძის კომენტარს გაზეთი “ლელო” ციტირებს.
გახდება თუ არა გურული ფეხბურთის თოვლის ბაბუა მერაბ ჟორდანია, ეს ნაახალწლევს გახდება ცნობილი. ცნობისთვის: ამასწინათ, გურიაში ვიზიტისას ფეხბურთის ფედერაციის პრეზიდენტ ზვიად სიჭინავასაც “წამოსცდა” (ნუთუ შემთხვევით?) _ ლიცენზირებას ყურადღება მიაქციეთ და გრიგოლეთში კომპლექსის მოწყობა გვსურსო. არ არის გამორიცხული, ჟორდანიამ აკადემია გურიის ზღვისპირეთში მოაწყოს და იქ საქართველოს ნაკრებსაც მისცეს წვრთნის საშუალება.
