არჩევნების თარიღზე პრეზიდენტის განკარგულების კონტრასიგნაციის საკითხს მთავრობის დღევანდელ სხდომაზე არ განიხილავენ.
როგორც პრემიერ-მინისტრმა გიორგი კვირიკაშვილმა მთავრობის დღევანდელ სხდომაზე განაცხადა, მიღებულია პოლიტიკური გადაწყვეტილება, რომ არჩევნები 8 ოქტომბერს გაიმართოს.
„არჩევნების საკთხზე გაიმართა კონსულტაციები პრეზიდენტთან. არავისთვის არ იქნება ცუდი, დაიგეგმოს წინასწარი აქტივობები დღეიდან მოყოლებული და წინასწარ ვიცოდეთ, როდის იქნება არჩევნები. ამაში კარგის მეტი არაფერია. მივიღეთ პოლიტიკური გადაწყვეტილება, რომ არჩევნები გაიმართოს 8 ოქტომებრს. არჩევნების თარიღი არ შეიცვლება“,-აღიშნა პრემიერ-მინისტრმა.
საქართველოს პრეზიდენტის ორი განკარგულება 2016 წლის საპარლამენტო არჩევნებისა და აჭარის ავტონომიური რესპუბლიკის უმაღლესი საბჭოს არჩევნების დანიშვნის შესახებ კონტრასიგნაციისთვის საქართველოს პრემიერ-მინისტრს 6 აპრილს გადაეგზავნა.
პრეზიდენტის განკარგულებების მიხედვით, მორიგი საპარლამენტო არჩევნები და აჭარის ავტონომიური რესპუბლიკის უმაღლესი საბჭოს არჩევნები 2016 წლის 8 ოქტომბერს გაიმართება. საქართველოს პრეზიდენტმა პარლამენტის არჩევნები საქართველოს კონსტიტუციის 73-ე მუხლის მე-2 პუნქტისა და საქართველოს ორგანული კანონის „საქართველოს საარჩევნო კოდექსის“ 108-ე მუხლის მე-2 ნაწილის შესაბამისად დანიშნა, ხოლო აჭარის ავტონომიური რესპუბლიკის უმაღლესი საბჭოს არჩევნები „აჭარის ავტონომიური რესპუბლიკის სტატუსის შესახებ“ საქართველოს კონსტიტუციური კანონის მე-10 მუხლის მე-4 პუნქტის შესაბამისად. საქართველოს პრეზიდენტის ორივე განკარგულება ძალაში 8 აგვისტოდან შევა.
