გურიის გუბერნატორი გია სალუქვაძე, ოზურგეთის მუნიციპალიტეტის გამგებელი მერაბ ჭანუყვაძე, ქალაქ ოზურგეთის მერი, ბეგლარ სიორიძე, ადგილობრივი ხელისუფლების, ოპოზიციური პარტიის და საზოგადოების წარმომადგენლები 9 აპრილს დაღუპული ნინო თოიძის საფლავი ყვავილებით შეამკეს და გარდაცვლილთა ხსოვნას პატივი მიაგეს.
"1989 წლის 9 აპრილის ტრაგედიიდან 27 წელი გავიდა. იმ ადამიანთა შორის, რომლებმაც ქვეყნის დამოუკიდებლობისთვის თავი გასწირეს, ოზურგეთელი ნინო თოიძე და ჩოხატაურელი ნატო გიორგაძე იყვნენ, რომლებსაც პატივი მივაგეთ. მინდა აღვნიშნო, რომ სწორედ ჩვენი გმირების თავგანწირვის შედეგად ტრაგედიიდან ორ წელიწადში საქართველომ ნანატრი თავისუფლება მოიპოვა და დამოუკიდებელი გახდა. ქედს ვიხრით მათ წინაშე და ჩვენი ვალია ისინი მუდამ გვახსოვდეს,"-_ თქვა გია სალუქვაძემ.
"9 აპრილი უაღრესად მძიმე და მოუშუშებელი ტკივილია ჩვენი ერისა, ამავდროულად არის გამოფხიზლების, დამოუკიდებლობის აღდგენის დღე. ამ დღეს მთელი ერი ერთ მუშტად შეკრული იდგა საქართველოს სახელმწიფოებრიობის სადარაჯოზე. დღეს პატივი მივაგეთ 9 აპრილის გმირების ხსოვნას, წმინდა გიორგის ხატის მატარებლებს, ქვეყნის თავისუფლებით გულანთებულებს. 9 აპრილი ჩვენი მარადიული ტკივილია, რომელიც ყოველ გაზაფხულს ხელახლა იბადება", _ აღნიშნა ოზურგეთის მუნიციპალიტეტის გამგებელმა მერაბ ჭანუყვაძემ.
"უმნიშვნელოვანესი დღეა , 9 აპრილს გმირულად დაღუპულებმა თავგანწირვის მაგალითი გვიჩვენეს, მათ სისხლს უკვალოდ არ ჩაუვლია, ეს დღე გარდამტეხი აღმოჩნდა ჩვენი, როგორც დამოუკიდებელი ქვეყნის ჩამოყალიბების ისტორიაში, მინდა უღრმესი პატივისცემა გამოვხატო და პატივი მივაგო მათ გმირულ ხსოვნას", _ განაცხადა ქალაქ ოზურგეთის მუნიციპალიტეტის მერმა ბეგლარ სიორიძემ.
თემურ სალუქვაძე, "თავისუფალი დემოკრატების" ერთ-ერთი ლიდერი: "9 აპრილი საქართველოს ისტორიაში უმნიშვნელოვანესი დღეა. დღე, როდესაც ადამიანებმა თავისი გმირული თავგანწირვით უდიდესი წვლილი შეიტანეს ქვეყნის დამოუკიდებლობის მოპოვებაში.
ქვეყნის დამოუკიდებლობა და მისი დაცვა თითოეული ჩვენგანისგან უდიდეს პასუხისმგებლობას მოითხოვს. საქართველოს დამოუკიდებლობა ყველა ადამიანისა თუ პოლიტიკური ძალისთვის უმთავრესი ამოცანა უნდა იყოს."
ნათია შარაშენიძე, "ლეიბორისტული პარტიის" ერთ-ერთი ლიდერი: "საბჭოთა რეჟიმის მიერ მოწყობილ სისხლიან ღამეს 1989 წლის 9 აპრილს 21 მშვიდობიანი მომიტინგე დაიღუპა. უმოწყალოდ ჩეხავდა მტერი საქართველოს დამოუკიდებლობის მოთხოვნით რუსთაველზე გამოსულ დემონსტრანტებს. დღეს გვირგვინით შევამკეთ იმ ტრაგიკულ ღამეს დაღუპული გმირი გოგონას ნინო თოიძის საფლავი, რომელმაც ძალიან ახალგაზრდულ ასაკში გადაინაცვლა. რამდენი წელიც არ უნდა გავიდეს თითოეული ჩვენთაგანის ვალია გავიხსენოთ 9 აპრილს დაღუპულები და პატივი მივაგოთ მათ ხსოვნას. ასეთ გმირების თავგანწირვაზე იდგა და დგას ჩვენი ქვეყანა. აქვე არ შემიძლია არ ავღნიშნო, რომ 9 აპრილის სისხლიან ღამეს უამრავი მშვიდობიანი მომიტინგე მოიწამლა, დღეს კი ხელისუფლების უყურადღებობის გამო ეს ადამიანები ღვთის ანაბარად არიან მიტოვებულები, მინდა მათ მოვეფერო , მადლობა გადავუხადო ბრძოლისთვის, თავგანწირვისთვის და ვუთხრა მათ, ჩემო ძვირფასებო, ქედს ვიხრი თქვენს წინაშე."
