საარჩევნო შეხვედრებზე, დაპირებებზე, ათი ხმის შეგროვებაზე, “გურია ნიუსი” არა ერთხელ წერდა. ახლა ეს პროცესი საჯარო სკოლებსა და საბავშვო ბაღებში(?!) გაგრძელდა. ჩვენი წყაროს ინფორმაციით, მუნიციპალიტეტის სოფლების შემდეგ, ადმინისტრაციულ შენობაში ოზურგეთის მუნიციპალიტეტის საკრებულოს თავმჯდომარე ალეკო მამეშვილი მუნიციპალიტეტში შემავალი ყველა საბავშვო ბაღის პედაგოგებს იბარებს, თან, როგორც წინა ნომერში ვწერდით, შეხვედრები ღამით ხდება. შეხვედრაზე ოზურგეთში გახორციელბული და გასახორციელებელი პროექტების პრეზენტაცია ხდება და საარჩევნოდ მხარდამჭერების შეგროვების დავალებაც იცემა. თითოეულ მოხელეს ევალება, მოიტანოს ათი მხარდამჭერის პირადი ნომერი. რამდენიმე დღის წინ, ერთ-ერთი სკოლის პედაგოგების დაბარების შესახებ “გურია ნიუსს” მაშინვე აცნობეს. საინტერესოა, როგორ უარყოფენ ამ ინფორმაცია ხელისუფლების წარმომადგენლები, როცა ასეთი ფაქტები, თითქმის, ყოველ დღე ხდება ცნობილი ჩვენთვის.
ჩვენი წყაროს ინფორმაციით, ოზურგეთის მუნიციპალიტეტის #2 საჯარო სკოლის კანცელარიის გამგე, მარინა წულაია, საკუთარ სოფელში საარჩევნო ხმებს ეძებს და მოქალაქეების პირად ნომრებს ითხოვს. ამ საკითხთან დაკავშირებით, “გურია ნიუსი” ოზურგეთის მუნიციპალიტეტის #2 საჯარო სკოლის დირექტორს, მარინე ჯაფარიძეს და ამავე სკოლის კანცელარიის გამგეს, მარინა წულაიას დაუკავშირდა.
მარინა ჯაფარიძე: _ ეს ინფორმაცია ნამდვილად არ შეეფერება სიმართლეს. სკოლა არის აბსოლუტურად აპოლიტიკური ორგანიზაცია, სადაც მსგავსი რამეები არ შეიძლება მოხდეს.
_ ქალბატონო მარინა, ეს არ ხდებოდა სკოლაში _ ეს ხდებოდა მარინე წულაიას საცხოვრებელ უბანში.
_ ეს მას უნდა ჰკითხოთ, მე პასუხს ვაგებ სკოლაზე. შემიძლია გითხრათ, რომ ქალბატონი მარინა ძალიან პასუხისმგებლიანი, საუკეთესო ოჯახის საუკეთესო დიასახლისია, სხვას ვერაფერს გეტყვით. არ ვადასტურებ ამ ინფორმაციას.
_ ჩვენი ინფორმაციით, ოზურგეთის მუნიციპალიტეტის საკრებულოს თავმჯდომარე, ალეკო მამეშვილი იბარებს სკოლის პედაგოგებს და ესაუბრება არჩევნების შესახებ. იყვნენ თუ არა იქ თქვენი სკოლის პედაგოგები დაბარებულები?
_ ერთადერთი რაც იყო, დავესწარით პრეზენტაციას. მივესალმები, რაც გაკეთდა მუნიციპალიტეტში და რაც უნდა გაკეთდეს მომავალში, ეს ნამდვილად კარგია. დანარჩენი პოლიტიკური მიმართულებები ჩვენთვის უცნობია, _ გვითხრა ჯაფარიძემ.
თავად წულაია “გურია ნიუსთან” საუბარში კატეგორიულად უარყოფს, ინფორმაციას იმის შესახებ, რომ ის სოფელში ხმების შესაგროვებლად დადიოდა: _ ჯერ ერთი, არ მაქვს ამის დრო _ დილიდან საღამომდე სამსახურში ვარ და მერე დაღლილმა სოფელ-სოფელ, კარდაკარ ვიარო, არ მცალია. ისე, რა საინტერესოა, ვინ მოგაწოდათ ეგ ინფორმაცია? შეგიძლიათ, ჩანაწერი მომასმენინოთ?
_ სამწუხაროდ, წყაროს ვერ გავცემთ, ამის უფლება არ გვაქვს.
_ კარგით. მე არ ვადასტურებ მაგ ინფორმაციას.
“გურია ნიუსი” ამ საკითხებთან დაკავშირებით, ოზურგეთის მუნიციპალიტეტის რესურსცენტრის ხელმძღვანელს, ირინა ინარიძეს და სკოლამდელი სააღმზრდელო ცენტრის ხელმძღვანელს, მაკა ჭყონიას დაუკავშირდა, რომლებიც ინფორმაციას იმის შესახებ, რომ პედაგოგებს საკრებულოს თავმჯდომარე იბარებს, არ ადასტურებენ.
ოზურგეთის მუნიციპალიტეტის საკრებულოს თავმჯდომარემ, ალეკო მამეშვილმა “გურია ნიუსთან”, ამ საკითხთან დაკავშირებით ასეთი კომენტარი გააკეთა:
_ ჩვენ ვხვდებით მოსახლეობას და ვაცნობთ მათ მუნიციპალიტეტში მიმდინარე, უკვე გახორციელებულ და გასახორციელებელ პროექტებს. მათ უნდა იცოდნენ, რა ხდება მუნიციპალიტეტში და რა იგეგმება სამომავლოდ. ჩვენ, ხელისუფლება, ვალდებული ვართ, პერიოდულად შევხვდეთ მათ და ანგარიში ჩავაბაროთ.
კოალიცია “ქართული ოცნების” წევრი, რესპუბლიკელი მარინე სუნგულია “გურია ნიუსთან” ასეთ კომენტარს აკეთებს: _ შედარებას თუ გავაკეთებთ, “ნაციონალების” სხეულს ავთვისებიანი სიმსივნე დაემართა და ყველა ის გამოვლინება, რომელსაც ისინი საზოგადოების დასაშინებლად, მოსასყიდად თუ ფსიქოლოგიური ზეწოლისთვის იყენებენ, ამ დაავადების ბოლო სტადიაზე მიუთითებს.
