ამ ფიარ-აქციის ინიციატორი ხელისუფლება სულაც არ გახლავთ. იდეა ლაგოდეხელმა მოქალაქემ 2011 წლის 16 ოქტომბერს, სოციალურ ქსელ ფეისბუქზე დააპატენტა. ლაგოდეხში, ტუალეტის საზეიმოდ გახსნის კადრებმა დიდი პოპულარობა მოიპოვა: ორმა ლაგოდეხელმა, ტუალეტის წინ წითელი ლენტი გაჭრა და ლაგოდეხელებს კიდევ ერთი “ტურისტული” ობიექტის გახსნა მიულოცა.
ტუალეტი, რომელიც საზეიმოდ გახსნეს, მიშა სიყმაშვილის საცხოვრებელი სახლის ეზოშია აშენებული, რომელიც სახუმარო ვიდეოკადრებში ტუალეტის გახსნას “საუკუნის პროექტს” უწოდებს.
წინასაარჩევნო პერიოდში, სიყმაშვილის “საუკუნის პროექტი” საქართველოს რეგიონული განვითარებისა და ინფრასტრუქტურის მინისტრმა, რამაზ ნიკოლეიშვილმა აიტაცა და 2012 წლის აპრილის თვეში, კახეთის გუბერნატორთან, გიორგი ღვინიაშვილთან ერთად, საზოგადოებრივი საპირფარეშოს მშენებლობის პროცესი დაათვალიერა.
“საქართველოს ყველა რეგიონში ევროპული სტანდარტების 50-მდე სანიტარული წერტილი აშენდება. საზოგადოებრივი სანიტარული წერტილების არარსებობა ანტისანიტარიას იწვევდა და დისკომფორტს უქმნიდა, როგორც ადგილობრივ მოსახლეობას, ასევე – ტურისტებს”, – აღნიშნა ნიკოლაიშვილმა.
უყურადღებოდ არც ქალაქი ოზურგეთი დარჩენილა. განსაკუთრებულ ადგილას, მუზეუმის წინ, უკვე ჩაეყარა საძირკველი ტუალეტის მშენებლობას. “გურია ნიუსის” ინფორმაციით, საპირფარეშოების მშენებლობას საქართველოს მასშტაბით გაერთიანებული წყალმომარაგების კომპანია უწევს კურატორობას. როგორც ამავე კომპანიის ოზურგეთის სერვის ცენტრის მენეჯერმა ივანე ტაბატაძემ გვითხრა, ის მთლიანად არ ფლობს ინფორმაციას მშენებლობასთან დაკავშირებით, თუმცა დაგვიდასტურა, რომ ქალაქის ცენტრში ტუალეტი შენდება.
უფრო დეტალური და კომპეტენტური პასუხისთვის გაერთიანებული წყალმომარაგების კომპანიის საზოგადოებასთან და პრესასთან ურთიერთობების სამსახურის უფროსს, ჯილდა მაჭავარიანს დავუკავშირდით:
_ ყველგან, სადაც მიმდინარეობს მშენებლობა, წლის ბოლომდე უნდა დასრულდეს და ოზურგეთშიც, რა თქმა უნდა, წლის ბოლომდე დასრულდება.
_ რამდენი ლარია გამოყოფილი ტუალეტის მშენებლობისთვის?
_ ასე კონკრეტულად არ არის გამოყოფილი.
_ მთლიანად საქართველოში რამდენი საპირფარეშო უნდა აშენდეს?
_ 50 საპირფარეშო აშენდება მთელ საქართველოში,
_ რა თანხა არის გამოყოფილი 50 ტუალეტის მშენებლობაზე?
_ ამისთვის გამოყოფილია 2 500 000 ლარი, ოღონდ ეს მარტო მშენებლობას ბუნებრივია არ გულისხმობს, შემდეგ მოვლა-პატრონობაც სჭირდება, რომელსაც კომპანია გაწევს. საპირფარეშოები მუდმივად მოწესრიგებული უნდა იყოს და ეს ბუნებრივია, დანახარჯს საჭიროებს.
_ ტუალეტში მომსახურება ფასიანი იქნება თუ უფასო?
_ იცით, ამ ეტაპზე არ ვიცით, განსაზღვრული არ არის ფასიანი იქნება თუ უფასო.
_ რამდენად მიზანშეწოლილია ისტორიული მუზეუმის მიმდებარე ტერიტორიაზე საპირფარეშოს აშენება?
_ კონკრეტულად ამ საკითხთან დაკავშირებით არაფრის თქმა არ შემიძლია. შემიძლია ვთქვა, რომ საქართველოში ჩამოსული ტურისტები პირველ პრობლემად ასახელებენ საზოგადოებრივი საპირფარეშოების არარსებობას ქვეყანაში. შესაბამისად, სახელმწიფომ მიიღო გადაწყვეტილება, რომ ააშენოს საპირფარეშოები.
ოზურგეთის მუნიციპალიტეტის საკრებულოს საზოგადოებასთან და პრესასთან ურთიერთობის სამსახურის თანამშრომლის ვახტანგ გველებიანის დახმარებით, ჩვენს კითხვებზე საკრებულოს თავმჯდომარემ ალეკო მამეშვილმა ასეთი პასუხები გაგვცა:
_ ბატონო ალეკო, როდის დაიწყო ქალაქის ცენტრში ტუალეტის მშენებლობა და ვისი გადაწყვეტილებით შენდება?
_ გაერთიანებული წყალმომარაგების კომპანიის მიერ, მთელი ქვეყნის მასშტაბით მიმდინარეობს საპირფარეშოების მშენებლობა და ოზურგეთშიც მათ მიერ ხდება აღნიშნული სამუშაოების ჩატარება
_ რამდენად მისაღებია ქალაქის ცენტრში, მუზეუმის მიმდებარე ტერიტორიაზე ტუალეტის მშენებლობა?
_ აუცილებელია ოზურგეთში იყოს მოწესრიგებული საპირფარეშო და მისი განთავსება იქ, სადაც ხალხმრავალი ადგილებია მით უფრო მისაღებია.
_ რა დაუჯდება ოზურგეთს ტუალეტის მშენებლობა?
_ გაერთიანებული წყალმომარაგების კომპანიას მიმართეთ და ისინი გაგარკვევენ დეტალებში
_ როგორც ამბობენ, მუზეუმის შენობის წინ ასევე სავაჭრო ჯიხურების მშენებლობა დაიწყება.
_ არ ვადასტურებ აღნიშნულ ინფორმაციას.
_ ბატონო ალეკო, ჩვენს მიერ მოპოვებული ინფორმაციით, მუზეუმი სხვა ადგილას გადააქვთ…
_ არ შეესაბამება სიმართლეს.
_ და ბოლოს, ბატონო ალეკო ოზურგეთი არც ისე პატარა ქალაქია, საკმარისია ერთი ტუალეტი?
_ აქამდე ოზურგეთში არ არსებობდა არც ერთი ნორმალური და მოწესრიგებული საპირფარეშო.
საინტერესოა, თვალსაჩინო ადგილას გამოჭიმული, ორმილიონნახევრიანი ტუალეტები “წითელი ლენტის” გაჭრის შემდეგ, იფუნქციონირებენ თუ არა; მაგალითად, ჩოხატაურის მუნიციპალიტეტში, საზოგადოებრივი, ფასიანი ტუალეტის მოხმარებას მუდმივად აფერხებს წარწერა: “გასული ვარ, მალე მოვალ!”
