“ეტყობა, რომ იზრდება ქართული რაგბი”

გასულ კვირას, გურიას რაგბის კავშირის თავმჯდომარე გოჩა სვანიძე სტუმრობდა. სვანიძემ სტადიონები მოინახულა, რაგბის გუნდებს გაეცნო, მუნიციპალიტეტების ხელმძღვანელებსაც შეხვდა და არსებულ პრობლემებზე ისაუბრა.

მან გურიაში ვიზიტი ჩოხატაურში სტუმრობით დაასრულა, სადაც ჩოხატაურელი და ვანელი ახალგაზრდა მორაგბეების შერკინებას დაესწრო, რომელიც ჩოხატაურელთა გამარჯვებით _ ანგარიშით 25:14 დასრულდა.

გოჩა სვანიძე ჩოხატაურის სპორტკომპლექსის ტერიტორიით მოიხიბლა, რომლის ახალი პროექტის მაკეტი, განვითარების სტრატეგია და ბიზნესგეგმა "გურია ნიუსმა" ადგილობრივ ხელისუფლებას საჩუქრად გადასცა. ეს ის კომპლექსია, რომელიც "გურია ნიუსისგან" ინფორმაციის მიღების შემდეგ, ვიცეპრემიერმა კახი კალაძემ პირადად მოინახულა და მის აღდგენაში დახმარებაც დაგვპირდა.

სვანიძე ამბობს, რომ ამ კომპლექს დიდი პერსპექტივა აქვს: _ შესანიშნავი ბაზაა ჩოხატაურში. მოვიხიბლე. კარგი იქნება, თუ აქ სასტუმროც გაკეთდება, _ აღნიშნა ჩვენთან საუბრისას გოჩა სვანიძემ.

მისივე თქმით, რეგიონებში, რაგბის განვითარების კუთხით პრობლემები ბევრია, თუმცა, ფედერაციას ეს არ აშინებს: _ რეგიონებში ბევრი პრობლემებია, მაგრამ ეს არ გვაშინებს. მუნიციპალიტეტების ხელმძღვანელებსაც ვესაუბრე ამაზე და გავაგრძელებთ საუბარს, თუმცა, არა მარტო საუბარს. კონკრეტული გეგმები გვაქვს, რომელზეც დღეს გაგვიჭირდება ლაპარაკი, თუმცა, მერწმუნეთ, რომ შედეგები იქნება, _ გვითხრა სვანიძემ

რაგბის კავშირის პრეზიდენტი ჩოხატაურელი მორაგბეებითაც მოიხიბლა:

_ შესანიშნავი ბიჭები არიან და ეტყობა, რომ იზრდება ქართული რაგბი. რომ შევადაროთ გუნდების დღევანდელი თამაში ათი წლის წინანდელ სიტუაციას, მკვეთრ განსხვავებას ვიგრძნობთ _ მწვრთნელები ფორმაში არიან, ყველაფერი კარგად მიდის და ჩვენი ვალია, ინფრასტრუქტურის გაუმჯობესებით დავეხმაროთ სპორტსმენებს, რომ უფრო დიდ წარმატებას მივაღწიოთ, _ თქვა "გურია ნიუსთან" საუბრისას რაგბის კავშირის თავმჯდომარემ.