ჩოხატაურის მუნიციპალიტეტის გამგებელს ირაკლი კუჭავასა და შპს "მარგის" დირექტორს ჯუმბერ ნაცვლიშვილს შორის #125 ხელშეკრულება გასული წლის 25 ივნისს დაიდო. დოკუმენტის თანახმად, ტენდერში გამარჯვებულ კომპანიას 130 111 ლარად გამგეობის შენობის გვერდით სკვერის სამშენებლო სამუშაოები უნდა ეწარმოებინა.
კომპანიას დასრულებული პარკი 22 ოქტომბერს უნდა ჩაებარებინა, თუმცა, ეს ვერ შეძლო _ 5 ნოემბერს შედგენილი დაუსრულებელი მშენებლობის აქტით ირკვევა, რომ კომპანიას, მიუხედავად ინსპექტირების ჯგუფის არაერთი გაფრთხილებისა, 29 სექტემბრის შემდეგ სამუშაოები არ უწარმოებია. ამავე დოკუმენტით ირკვევა ისიც, რომ კომპანიამ 106 050 ლარის სამუშაო შეასრულა, რაც მიიღო კიდეც.
საბოლოოდ, 1 800-ლარიანი ჯარიმის და გარანტორისთვის დაკისრებული 5 606 ლარის გადახდის შემდეგ, "მარგის" ხელშეკრულება შეუწყვიტეს.
დაუსრულებელი პარკის დასამთავრებლად ჩოხატაურის გამგეობამ ხელახალი ტენდერი 2015 წლის ნოემბერში გამოაცხადა _ ტენდერში მხოლოდ შპს "პლაზმამ" მიიღო მონაწილეობა და 59 835 ლარად მოიგო კიდეც.
სამუშაოები კომპანიას 25 დეკემბერს უნდა დაესრულებინა, თუმცა, ირაკლი კუჭავასა და კომპანიის ხელმძღვანელ კახა მურადაშვილს შორის 23 დეკემბერს შეთანხმება შედგა, რომლის თანახმადაც, სამუშაოების ჩაბარების ვადა 20 იანვრამდე გადაიწია. შეთანხმების მიზეზი კი, როგორც დოკუმენტშია განმარტებული, ხარჯთაღრიცხვაში მომხდარი კორექტირება გახდა.
დროში გაწელილი პროექტი, როგორც იქნა, იანვარში დასრულდა და ინსპექტირების ჯგუფმაც ჩაიბარა. მიღება-ჩაბარების დოკუმენტის მიხედვით, ყველაფერი კარგადაა _ დგას ხარჯთაღრიცხვით გათვალისწინებული ნაგვის ურნები, შეღებილია ღობეები, ჭიშკრები _ ერთი სიტყვით არანაირი ხარვეზი არ არის.
თუმცა, ეს ყველაფერი ქაღალდზე _ რეალობა გაცილებით სხვაა. "გურია ნიუსისა" და გუბერნიის ადმინისტრაციის ადგილობრივ თვითმმართველობასთან ურთიერთობის სამსახურის მობილური ჯგუფის წარმომადგენლების _ რევაზ ჯანელიძის და გოჩა ჯაშის მიერ ერთობლივად ჩატარებული შემოწმებისას, ბევრი ხარვეზი გამოჩნდა. ინსპექტირების ჯგუფის ხელმძღვანელის, ჩოხატაურის გამგებლის მოადგილის მინდია ჟღერიას და ჯგუფის წევრების თქმით, უსწორმასწორო ე. წ. "ბორდიურები", მიკლებული "ბრიზგი", შეუღებავი ჭიშკრები, "წვრილმანებია", რომელზეც "ხმაურის ატეხვა არ ღირს".
მათთვის წვრილმანია ისიც, რომ პარკში, რომლის გაკეთება ბიუჯეტს 200 000 ლარამდე დაუჯდა, ნაგვის ურნებიც არ დგას _ არადა, მიღება-ჩაბარების დოკუმენტით თუ ვიმსჯელებთ, უნდა იყოს.
მინდია ჟღერიას განმარტებით, ურნები ობიექტის ჩაბარების დროს იდგა, თუმცა, ინსპექტირების ჯგუფის წევრებს არ მოეწონათ და სამუშაოების შემსრულებელ კომპანიას შესაცვლელად გაატანეს, ყოველგვარი დოკუმენტური შეთანხმების გარეშე.
ინსპექტირების ჯგუფს არც იმის ამსახველი ფოტომასალა გააჩნია, რომ პარკში ურნები ნამდვილად იდგა. ასევე არ არსებობს ოქმი, რომელშიც განმარტებული იქნება, რატომ გაატანეს კომპანიას ურნები უკან, მაშინ როცა მიღება-ჩაბარების დოკუმენტში, ურნებიც და სხვა სამუშაოებიც მოწონებულია.
კომისიის წევრები პრობლემას ვერც კიბეში ჩატანებულ ე. წ. "აპალოვკაში" ხედავენ: _ რას უწუნებთ, ვერ გავიგე. იმიტომ დაიდო, რომ ცემენტი არ ჩამოშლილიყო. როცა მოიხსნება, მერე გამოჩნდება, არის თუ არა ხარვეზი და თუ იქნება, კომპანია ვალდებულია, გაასწოროს. თანაც მხოლოდ ეს არა _ ორი წლის განმავლობაში თუ რაიმე გაფუჭდება, კომპანიას მისი გაკეთების ვალდებულება აქვს, _ გვითხრა ინსპექტირების ჯგუფის წევრმა, შესყიდვების განყოფილების ხელმძღვანელმა ვლადიმერ გოგიბერიძემ.
მინდია ჟღერიას თქმით კი, ობიექტის ჩაბარების მომენტში, ის დეფექტები, რომლებიც ჩვენ დავინახეთ, არ ჩანდა(?!).
ე.წ. "ბორდიურებთან" დაკავშირებით, ინსპექტირების ჯგუფის ხელმძღვანელი განმარტავს, რომ ისინი "აპალოვკით" არის ჩამოსხმული" და მისი უსწორმასწორობაც ამის ბრალია:
_ აქ არაფერი ისეთი არ არის, რომ ადამიანს ხელი შევუშალოთ და ობიექტი არ ჩავიბაროთ, _ აღნიშნა ჟღერიამ.
ინსპექტირების ჯგუფის ერთ-ერთი ხელმძღვანელის ნინო სიხარულიძის თქმით, აპარატი, რომელიც "ბრიზგს" აკეთებს, "ბორდიურების" ქვეშ არ გაიმართებოდა და ხარვეზიც ამის ბრალია. სიხარულიძე ადასტურებს, რომ ახალგაკეთებული "ბორდიურები" დაშლილია, თუმცა, ამის ასახსნელი მიზეზიც აქვს:
_ კი, მაგრამ საცხოვრებელი ბინა ხომ არ არის, ზუსტად მილიმეტრებში დაჯდეს?! _ თქვა სიხარულიძემ.
_ ქალბატონო ნინო, საცხოვრებელ ბინას თუ მილიმეტრებში ზომავთ, ბიუჯეტის ფულით გაკეთებულ პარკში იგივეს მოთხოვნის ვალდებულება არ გაქვთ?
_ ცუდად გამიგეთ. იქ რაღაც პატარა გადახრა რომაა, ის არაა პრობლემა და გამოსწორებადია, _ აღნიშნა "გურია ნიუსთან" საუბრისას სიხარულიძემ.
გუბერნიის წარმომადგენლებმა ინსპექტირების ჯგუფს რეკომენდაცია მისცეს, რომ დროულად აღრიცხონ იმ სამუშაოების ჩამონათვალი, რომელიც კომპანიას გამოსასწორებელი აქვს და გამოასწორებინონ კიდეც.
ჟღერიას თქმით, ყველა ხარვეზი ორ კვირაში აღმოფხვრილი იქნება.
გუბერნიის ადმინისტრაციის წარმომადგენლების _ რევაზ ჯანელიძის და გოჩა ჯაშის განმარტებით, რომლებიც ყველა მუნიციპალიტეტში მშენებარე ობიექტების მონიტორინგს ახორციელებენ, 2 კვირაში პირადად შეამოწმებენ, შეასრულა თუ არა მინდია ჟღერიამ სიტყვა და აღმოიფხვრა თუ არა ის პრობლემები, რომლებიც პარკში მისულებს თვალში ადვილად მოგხვდებათ. თუმცა, როგორც ზემოთ აღვნიშნეთ, მიღება-ჩაბარების აქტის შედგენის დროს, კომისიის არც ერთ წევრს ხარვეზები არ შეუმჩნევია.
