გასული წლის 10 ოქტომბრის შემდეგ, რაც ლანჩხუთის "გურიამ" საკუთარ მოედანზე "ზუგდიდს" მოუგო, მას შემდეგ "ევგრაფი შევარდნაძეზე" მოსულ ქომაგს მოგების გემო დავიწყებული ქონდა. ჰოდა, მერვე ცდაზე გურულებმა როგორც იქნა იმარჯვეს და ლანჩხუთში დღეს სტუმრებულ ქუთაისის "ტორპედოს"დაძაბულ ბრძოლაში სამი ქულა ააცალეს, თან სამჯერ გაიტანეს და აქამდე "მშრალი" ხუთმატჩიანი სერია დაასრულეს.
შეხვედრა კარგად დაიწყეს მასპინძლებმა და თამაშით დაჯაბნეს მეტოქე. ამას შედეგი მოყვა და ევგენი მოროზენკომ, ზედ საჯარიმოს წინა რკალთან დანიშნული საჯარიმო დარტყმა უნაკლოდ შეასრულა, ბურთი ცოცხალ კედელს ააშორა და შორეულ კუთხეში ჩასვა.
ამ ოც წუთში "გურიამ" იმდენი ენერგია ჩადო, მალე თამაშის სადავეეები მეტოქეს დაუთმო და ამით ისარგებლა თორნიკე კაპანაძემ, რომელიც ორ მცველს დაუსხლტა და წინ გამოსულ მეკარეს აუღელვებლად გადაუგდო ბურთი თავზე.
პირველ ტაიმში მეტი დასამახსოვრებელი არაფერი მომხდარა, აი, მეორეში კი მოვლენები მძაფრად განვითარდა. გამოუსწორებელი გულშემატკივარიც კი ვერ იტყოდა 61 წუთზე "გურია" ამ შეხვედრას მოიგებსო. სტუმარი გურამ ადამაძის ზუსტმა თავურმა "ტორპედო" წინ გაიყვანა და აქამდე უსისტემოდ გარჯილი მასპინძლებისგან, კარგს არავინ ელოდა. თუმცა ხუთიოდ წუთში მოხდა ის, რომ თემურ მახარაძის შეგირდებმა ჯერ ანგარიში გაათანაბრეს, კიდევ ხუთ წუთში კი მესამედ გაახარეს ქომაგობა და ერთბურთიანი ჩამორჩენა უკვე ქუთაისელებს გადაულოცეს. გამთანაბრებელი გოლი ისევ მოროზენკოს სიჩაუქეს მოყვა – ის მეკარისგან მოგერიებულ ბურთს, საჭირო ადგილზე დაუხვდა და ცაციათი დაუცველი კარის ბადეც შეარხია. ამას მალე კუთხური მოყვა, რომელიც სწრაფად გაათამ"შეს გურულებმა და პირდაპირ ჩაწოდების მოლოდინში მყოფ მეტოქე მცველებს კარლოის დანიელი დაუცველი დაურჩათ და ამ პანამელმა ლეგიონერმა მეორე შეხვედრაში მესამედ ივარგა, ოღონდ ამ ჯერზე თავით.
"ტორპედომ" დარჩენილ დროში სცადა თამაშის გადარჩენა, მაგრამ ვერას გახდა. ბოლო წუთზე შეიძლებოდა სერბი მეკარის ალექსანდრე იოვანოვიჩის დასჯა, რომელმაც შორეულ კუთხეში ჩახვეული საჯარიმო დარტყმა ძლივს მოიგერია და ბურთი კაპანაძეს მიუვიდა, თუმცა იმერელი ფორვარდის დარტყმული უზუსტო გამოდგა.
ასე და ამრიგად მახარაძის დამოძღვრილმა "გურიამ", ქობულეთში აღებულ 3 ქულას საშინაო მოგება მიაყოლა და ცოტათი დაიმშვიდა სატურნირო სიტუაცია. თუმცა, ჯერ კიდევ არის საშიშროება და დარჩენილ ხუთ ტურში მინიმუმ ერთი მოგება აუცილებელი იქნება, უარეს შემთხვევაში ორი მაინც.
ამ მოგებით "გურია" ისევ მეცამეტე ადგილზე დარჩა, თუმცა ქულებით გაუთანაბრდა თბილისის "ლოკომოტივს", რომელმაც პრინციპულ მეტოქესთან მარტვილის "მერანთან" საშინაო შეხვედრა ფრით და სკანდალით დაასრულა. ამ შეხვედრის ბოლოს კლუბების მესვეურებმა ხელჩართული ჩხუბი გამართეს ჯერ მოედანზე, მერე კი გასახდელში და ფედერაციის განაჩენს ელიან. "მერანი" 5 ქულას ჩამორჩა და უკვე გასავარნი ზონიდან, ანუ "ზუგდიდის" პოზიციიდან 2 ქულა აშორებს. ზუგდიდელებმა საჭირო ქულა წამოიღეს ამ ტურში თერჯოლიდან – 2:2.
23 აპრილს გურულები თბილისში "ცხინვალს" ესტუმრებიან, "მერანი" თბილისის "საბურთალოს" უმასპინძლებს, ხოლო "ზუგდიდი" – ასევე დედაქალაქურ კლუბს, "ლოკომოტივს".
დღევანდელი შეხვედრა გუნდებმა ასეთი შემადგენლობებით ჩაატარეს:
გურია: იოვანოვიჩი, პატერსომი, ზაზულია, მორალესი, ნოზაძე, ზ. გელაშვილი (33. ალავერდაშვილი), კილაძე (62. ბენეტი), კახელიშვილი (75. გამყრელიძე), მოროზენკო, კვეკვესკირი, კარლოსი.
სათადარიგოები: იმერლიშვილი, ჟუნიორი, შტანდერი, გუჯაბიძე
მწვრთნელი: თემურ მახარაძე, გია გოგუა
ტორპედო: ქვილითაია, ტაბატაძე, ადამაძე, ჭიჭინაძე, მამასახლისი (46. ბაბუნაშვილი), კაპანაძე, კუხიანიძე, შინდაგორიძე (77. კვერნაძე), კლიმიაშვილი, ქიმაძე, ტუღუში (70. ბრეგვაძე)
სათადარიგოები: კვასხვაძე, საღრიშვილი, ბაბუნაშვილი, ვ. კვარაცხელია, ნერგაძე
მწვრთნელები: გიორგი სუხიაშვილი, მიხეილ აშვეთია
მსაჯი: გიორგი ხარიტონაშვილი( თბილისი)
