ტურის შედეგებმა ორივე გუნდს დაუტოვა შანსი და ვითარებაც თითქმის იგივეა: “გურიას” მომდევნო ტურშივე შეუძლია საგზურის განაღდება, თუ “სპარტაკი” საჩხერეში ვერ მოიგებს და “დინამო” სახლში “ვიტ ჯორჯიას” ვერ მოუგებს. სხვა შემთხვევაში კი “მერცხალთან” მოგების გარდა, საბრძოლო გურულებს თბილისშიც აქვთ ვეტერინარებთან. ბათუმელების საქმე კი უფრო რთულადაა: ვიტელებსაც უნდა მოუგონ და გასვლაზე “სპარტაკსაც”.
მატჩს 6 ათასამდე მაყურებელი დაესწრო, აქედან, 500-ზე მეტი ქომაგი სტუმრებს ჩამოჰყვათ _ ორივე ეს მაჩვენებელი პლეიაუტის გათამაშებაში, ალბათ, სარეკორდოა. ორივე გუნდის ქომაგებმა მეტად გაალამაზეს მატჩი და საზეიმო ელფერი მისცეს მას.
თავად შეხვედრა ორი განსხვავებული ტაიმისაგან შედგებოდა. პირველში მასპინძლები დომინირებდნენ. მათ ანგარიშის გახსნა არაერთხელ შეეძლოთ _ ერთხელ “დინამო” ძელმა გადაარჩინა, ტაიმის შუაწელში კი პლეი აუტის ბომბარდირი პირისპირ შეეყარა მეკარეს, მაგრამ მალხაზ ალავიძემ გადაარჩინა თავისიანები. რამდენიმე ნახევარხიფათის შემდეგ კი _ გურულებმა გატანაც მოახერხეს _ მაღალ ბურთზე გამოსვლისას მეკარე შეცდა და განმეორებითი მცდელობისას, მოგერიების ნაცვლად ბურთი მისი ხელიდან კარში შევარდა _ 1:0. ბათუმელები მეკარეზე თავდასხმის დაფიქსირებას ითხოვდნენ, მაგრამ მალხაზ ბეუქლიშვილმა პროტესტი სამართლიანად არ იღო ყურად.
ტაიმის მიწურულს უკვე მასპინძლების რისხვა დაატყდა თავს არბიტრს _ მარჯვენა ფლანგზე გიგა კვერენჩხილაძემ მეტოქეს ბურთი “მოჰპარა”, საჯარიმოში შეჭრილმა თავისიანებს მეკარის ბაქნის სიახლოვეს უპასა, ალავიძე კარიდან გამოსული იყო, მაგრამ თამაზ ჩარგეიშვილის დარტყმული მცველმა გამოიტანა. მსაჯმა მიიჩნია, რომ მას ბურთი ხელზე მოხვდა, თუმცა, ლანჩხუთელები ხელით თამაშის დაფიქსირებას და 11-მეტრიანს ითხოვდნენ. ნამატჩევს სწორედ ეს ეპიზოდი გახდა მიზეზი, რის გამოც მსაჯების სამშვიდობოს გასვლისთვის ადგილობრივებს დიდი მეცადინეობა დასჭირდათ.
მეორე გოლის გატანა გურულებმა მეორე ტაიმში კი მოახერხეს, როცა ფლანგური ჩაწოდების შემდეგ თოდუამ მეორედაც იხეირა _ ბეუქლიშვილმა კარის აღება დააფიქსირა, მაგრამ ლაინსმენის მოგვიანებით წამოწეული ალამის გამო (თამაშგარე დააფიქსირა) გოლი გააუქმა.
ამის შემდეგ “გურია” კიდევ ერთხელ ითხოვდა 11-მეტრიანს, როცა საჯარიმოში შეჭრილი ტარიელ კუკულაძე მეტოქეებთან შეჯახებისას ისე დაშავდა, შესაცვლელი გახდა. გურულებს ისედაც ერთ-ერთი ლიდერი დავით მაისაშვილი და მცველი არნო ჩუენსუ აკლდათ და კუკულაძის შეცვლამ გუნდი მძიმე მდგომარეობაში ჩააგდო.
ამავდროულად გია გურულმა საჭირო შეცვლები მოახდინა “დინამოში”. განსაკუთრებით აღსანიშნავი ნიკა დიასამიძის თამაში გახლდათ, რომელმაც გურულ მცველებს დიდი თავსატეხი გაუჩინა. მასპინძლებმა გოლი უწყინარ სიტუაციაში მიიღეს _ ალექსანდრე ბაციკაძის დარტყმულს მიხეილ ჯორბენაძემ ოდნავ წაჰკრა და მოძრაობაში მყოფმა მეკარემ გუნდის გადარჩენა ვეღარ შეძლო: არცთუ ძლიერად დარტყმული ბურთი შორეულ კუთხეში გავიდა, 1:1.
ამის შემდეგ უპირატესობას სტუმრები დაეუფლნენ, ბურთსაც მეტად ისინი აკონტროლებდნენ და ხიფათებსაც ქმნიდნენ, უკვე “გურია” გადარჩა რამდენჯერმე _ ერთხელ ძელმა იხსნა მასპინძელი, მეორედ კი მცველებმა ბურთი ცარიელი კარიდან გამოიტანეს.
რა თქმა უნდა, ლანჩხუთელებიც ცდილობდნენ გოლის გატანას, მაგრამ სტუმართა დარად, მეტოქის კარის აღება ვერც მათ შეძლეს და საბოლოოდ დაფიქსირებულმა ფრემ ორივე გუნდს დაუტოვა შანსი.
და ბოლოს. ვიდეოჩანაწერში კარგად ჩანს, რომ “გურიამ” გოლი სამართლიანად გაიტანა, მეტად სადავოა მეორე გოლის გაუქმება, ხოლო ბათუმელთა კარში მსაჯმა ასპროცენტიანი პენალტი არ დანიშნა.
