პროგრამის _ “ძველი თბილისის ახალი სიცოცხლე”, ფონდიდან, თბილისის მერიის სარეზერვო ფონდში, 3 მილიონი ლარი გადაირიცხება, რომელიც 12 მაისის სტიქიის შედეგად დაზარალებულ ოჯახებს მოხმარდება. როგორც ცნობილია, თანხები, ძირითადად, სტიქიით დაზარალებული ოჯახების ქირით გაყვანასა და სახლების აღდგენაზე დაიხარჯება.
მაგრამ ეს ყველაფერი მხოლოდ სიტყვის დონეზეა ცნობილი _ როგორც საკრებულოს ოპოზიციონერი წევრი თინა ხიდაშელი “გურია ნიუსთან” საუბრისას აცხადებს, გამოყოფილ თანხას ხარჯთაღრიცხვის ერთი ფარატინა ფურცელიც კი არ ახლავს.
_ ქალბატონო თინა, 3 მილიონი ლარი, რომელიც სახელმწიფომ წყალდიდობის შედეგად დაზარალებულთათვის გამოყო, საკრებულოში დიდი სკანდალის მიზეზი გახდა. სხდომის მთავარი გმირი კი თქვენ იყავით. გაარკვიეთ, რას მოხმარდება ეს თანხა?
_ არაფერი არ იყო გაწერილი. უფრო მეტიც, ისიც კი არ იცოდნენ, პირველადი აუცილებლობისთვის გამოიყო ეს თანხა თუ უფრო ფუნდამენტური პრობლემის მოსაგვარებლად _ სახლების სარეაბილიტაციოა თუ საკვებისთვისაა.
დღეს ჩვენ ისიც არ ვიცით, რა ტიპის ზარალზეა საუბარი, რა მასშტაბის სამაშველო სარეაბილიტაციო სამუშაოებია საჭირო. სირცხვილია, როდესაც ამბობენ, _ ჯერ რა დროს ეს არის, ძალიან ადრეა და არ გვაქვს დათვლილიო. როცა ამერიკას ქარიშხალი “კატრინა” დაატყდა თავს, 24 საათის შემდეგ არსებობდა პირველადი დასკვნა ზარალის შესახებ. ყველა ბიუჯეტში არსებობს თანხები, მათ შორის თბილისის ბიუჯეტში, რომელიც არის ე.წ. “სხვადასხვას” მუხლებით და ცალკე ბიუჯეტიდან ფულის გამოყოფა კი არ უნდა დაჭირვებოდა ამ საქმეს, არამედ სწორედ აქედან უნდა წასულიყო.
მე კითხვებიც კი არ მაქვს, სამწუხაროდ, ამ ხალხთან. უბრალოდ ჩემი ამოცანა იყო, იქნებ, რაღაცისთვის მიგვეღწია და ეს ფული მართლაც იმ ადამიანების სასიკეთოდ დაიხარჯოს, რომლებსაც დღეს ყველაზე მეტად სჭირდებათ. გვინდოდა, რაც შეიძლება, მეტი დოკუმენტით მოსულიყვნენ, რომ ხვალ და ზეგ პასუხის მოთხოვნა მაინც შეგვეძლოს. “კრება დარჩა მხიარული” _ როგორც ყოველთვის ხდება ხოლმე, ისე მოხდა.
_ როგორია იყო საკრებულოს მოტივაცია დოკუმენტის გარეშე მიღებულ ბიუჯეტზე?
_ მათ თქვეს, რომ ამის დრო არ არის ახლა. მთავარია, ხალხს დავეხმაროთო.
_ სანიაღვრე სისტემის გაუმართაობა ამ უბედურების გამომწვევ ერთ-ერთ მთავარ მიზეზად ითვლება. თქვენ თუ გაქვთ ინფორმაცია, სანიაღვრე არხებისა და კოლექტორების სარეაბილიტაციო სამუშაოებზე რამდენი თანხა იქნა თბილისის მერიის მიერ გამოყოფილი?
_ ჩვენ გვაქვს რამდენიმე ხელშეკრულება რომელიც დაიდო 2008 წლიდან მოყოლებული. სამწუხაროდ, მანამდე არ ვიცი. 2008-2010 წლებში ჩატარდა ტენდერი. შარშან ტენდერი “თბილსერვისმა” მოიგო. მე ვფიქრობ, წინა წელსაც, მაგრამ ზუსტად არ ვიცი და ვერ გეტყვით. ჯამურად, ძალიან უხეში ციფრი რომ ავიღოთ, 10 000 000-ზე ვლაპარაკობთ, რაც ამ მიმართულებით არის დახარჯული.
_ 2008 წლის 26 აგვისტოს, ომის დროს, მერიას გაფორმებული აქვს ტენდერი შპს “ალიანსთან”, რომელმაც მიიღო 1 089 178 ლარი. სწორედ ამ სანიაღვრე არხებთან დაკავშირებით. ამავე წლის დეკემბერში, ისევ შპს “ალიანსი” და მეორე კომპანია _ შპს “აგრომშენსერვისი” ერთსა და იმავე ტიპის ტენდერში იმარჯვებენ და ჯამში დაახლოებით მილიონნახევარს იღებენ. “გურია ნიუსის” მოკვლევით ირკვევა, რომ თამაზ კანკავა, რომელიც არის შპს “ალიანსის” 100%-ის მეწილე და შპს “აგრომშენსერვისის” ასევე 100% მეწილე დავით კანკავა, არის მამა-შვილია. არის თუ არა ეს დარღვევა და რას ნიშნავს ასეთი ტიპის ტენდერი?
_ მე არ ვიცოდი, რომ ისინი მამა-შვილი იყვნენ, გმადლობთ ამ ინფორმაციისთვის. დანარჩენი ცნობილია ჩემთვის. აქ დარღვევა პირდაპირი მნიშვნელობით რომ ვთქვათ, შეიძლება არ არის _ მამა-შვილი რომ არიან, არ ნიშნავს, მათ უფლება არ აქვთ, რაღაც აკეთონ. მაგრამ, ფაქტია ის, რომ რაღაცის დამალვას შეეცადა ქალაქის მერია. ეტყობა, თავიდანვე იგრძნეს უხერხულობა, რომ ერთი წლის განმავლობაში ორჯერ ერთი კომპანიისთვის მიეცათ ფული და ამიტომ, წლის შუაში ერთს მისცეს, მეორე წლის ბოლოს _ მეორეს. სხვანაირად, გამოვიდოდა, რომ 2 500 000 ნახევარი ერთ კომპანიას უნდა მიეღო. ალბათ, რაღაც უხერხულობა იგრძნეს და იმიტომ გაყვეს _ აჩვენეს, თითქოს მონოპოლია არ არის და სხვადასხვა კომპანიები მუშაობენ ამ მიმართულებით.
ჩვენ, ძირითადად იმაზე ვედავებით, რომ ხელოვნური მონოპოლიები შექმნეს. ამ შემთხვევაში, შეუძლიათ ჩამონათვალი გაჩვენონ _ აგერ ბატონო, ერთი კომპანია, მეორე, მესამე. სინამდვილეში ერთსა და იმავე ხალხზე ვლაპარაკობთ. თუმცა, მე ნამდვილად არ ვიცოდი, რომ მამა-შვილი იყვნენ.
_ კომპანია “ალიანსის” ოფიციალურ ვებგვერდზე წერია, რომ კონტრდაზვერვის დეპარტამენტის მიერ გაცემული #189 ნებართვით, მას უფლება აქვს აწარმოოს სახელმწიფო საიდუმლოებასთან დაკავშირებული საქმიანობა. რატომ ხდება, რომ სწორედ ის კომპანიები იგებენ ტენდერებს, ვისაც ასეთი ექსკლუზივები აქვთ?
_ კონკრეტულად კანკავებზე ვერაფერს გეტყვით _ ნამდვილად არ ვიცი მათ კავშირების შესახებ ხელისუფლებასთან, მაგრამ მეორეს მხრივ, როდესაც შინაგან საქმეთა სამინისტრო რომელიმე კომპანიას რაღაც სპეციალური დაშვების რეჟიმში ამყოფებს, ამაში უჩვეულო არაფერია. საოცარი ის არის, რაც თქვენ ბოლოს თქვით _ აღმოჩნდება, რომ სწორედ ასეთი კომპანიები იძენენ მონოპოლისტის სტატუსს და ყველგან, ყოველთვის, მუდმივად ისინი არიან. მერე რაღაც მოხდება ხოლმე, _ უცებ სხვა კომპანია გაჩნდება და რამდენიმე თვეში აღმოაჩენ, რომ ისიც ისევ ის ყოფილა, ოღონდ სხვა სახელით. სამწუხაროდ, ეს არის ჩვეულებრივი ამბავი პრაქტიკულად ყველა მიმართულებაში, სადაც საბიუჯეტო თანხები მიემართება. პრობლემა ისაა, რომ ეს ყველაფერი იცი, მაგრამ ვერ ასაბუთებ, რადგან პირველად დოკუმენტზე არ მიგიწვდება ხელი, საიდანაც გაარკვევდი, სინამდვილეში ვინ დგანან ამ ადამიანების უკან. რამდენიც არ უნდა ვილაპარაკოთ ჩვენ ამ შპს-ზე, ეს საინტერესო თემა ვერ გახდება ჩვეულებრივი მომხმარებლისთვის, თქვენი მედიასახლის აუდიტორიისთვის, თუ ვერ ვაჩვენებთ, ვინ დგას ამის უკან და სინამდვილეში რა ინტერესები იკვეთება _ ხშირ შემთხვევებში, რეალური სახე დამალული რჩება. ამ შემთხვევაში, ჩემთვის ეს ამოცანა არ არის ამოხსნილი. მე არ ვიცი, ვინ სარგებლობს საბოლოო ჯამში ამ ამბებით ანუ სად მიდის ეს ყველაფერი.
_ 2011 წლის 08 სექტემბერს, თბილისის მერის მოადგილე ტარიელ ხიზანეიშვილი შპს “ალიანსთან”, სახელმწიფო შესყიდვის შესახებ, ერთი მილლიონშვიდასიათასლარიან ხელშეკრულებას აფორმებს. შესასრულებელ სამუშაობაში წყალამრიდი არხებისა და სამონიტორინგო ჭების მოწყობაც შედის.
_ მოიცათ, “თბილსერვისის” ჯგუფს არ აქვს ეს კონტრაქტი მიღებული?! როგორც ჩანს, კომპანია “ალიანსსაც” ჩაუდეს ეს შესასრულებელი სამუშაოს ნაწილში, რაც კიდევ ცალკე დასათვლელი ნაწილია. რაც შეეხება სანიაღვრე არხების მოწყობას მთელი თბილისის მასშტაბით, ეს ტენდერი მოიგო “თბილსერვის ჯგუფმა”.
_ იცით, ვინ დგას ამ ჯგუფის უკან?
_ დირექტორი თორნიკე შიოლაშვილია, რომელიც თბილისის ყოფილი კეთილმოწყობის სამსახურის ხელმძღვანელი იყო. ამათ ასეთი ტრადიცია აქვთ _ მერე შპს-ებში გადაბარგდებიან ხოლმე. და ასე იწყებენ ფულის შოვნას. ამის კლასიკური მაგალითია “თბილსერვის ჯგუფიც” _ შიოლაშვილი დიდხანს მუშაობდა მერიაში ამ ხელისუფლების პერიოდში. როგორც ჩანს, იქ ყველაფერი გაარკვია და მერე გადავიდა შპს-ში, რომელიც მერიამ დააფუძნა 100%-იანი წილით და ახლა იქედან უვლის იმ ქალაქს, რომელსაც ვერ მოუარა ოფიციალური თანამდებობიდან.
_ ხელისუფლება ჯერ მატერიალურ ზარალს ითვლის და მხოლოდ სამძიმრებში მოიხსენიებს ის 5 ადამიანს, რომლებიც წყალდიდობას შეეწირნენ. მათ შორის 2 მცირეწლოვანი ბავშვი იყო. თქვენი აზრით, ვის უნდა დაეკისროს პასუხისმგებლობა?
_ ამას სჭირდება გამოძიება და მე დარწმუნებული ვარ, ეს თემა აუცილებლად იქნება გამოკვლეული. ან ამ ხელისუფლების პირობებში, ან ძალიან მალე, ოქტომბრიდან. არ შეიძლება ისეთი რამ ხდებოდეს ქვეყანაში და ისე გაატარო, როგორც დღეს საკრებულოს სხდომაზე მოხდა.
შეიძლება გამოძიებამ დაადგინოს, რომ არც არავის პასუხისმგებლობა არ იყო, მაგრამ ასე არ შეიძლება თქვა, ეს თემა არ არის საინტერესო. როდესაც უამრავი ფულია დახარჯული სწორედ კოლექტორებზე, სანიაღვრე ქსელებზე, ქსელების გაკეთების, შეკეთების, რეაბილიტაციის სამუშაოებზე, პრობლემა კი მაინც პრობლემად რჩება და მსხვერპლით სრულდება, რა თქმა უნდა, ის აუცილებლად უნდა იქნეს გამოძიებული.
ნიკო ხაჩირიშვილმა რაც არ უნდა იძახოს, დიდი წვიმების ბრალია ყველაფერიო, ჩემთვის ის ყველაზე კომპეტენტური ეკოლოგი და სინოპტიკოსი ვერ იქნება, ვერც მისი სიტყვები იქნება ჩემთვის განმსაზღვრელი. გაცილებით უფრო დიდ პატივს ვცემ იმ ხალხის აზრს, რომელთა პროფესიაც ეს არის.
მიზეზი ამ ყველაფრის, რაც მოხდა, იყო ის უპასუხისმგებლობა რაც ქალაქში სუფევს და არა იმ წვიმის ხარისხი, რომელიც მოვიდა. მაგრამ რად გვინდა პროფესიონალები? ვინც ამ ქალაქში ვცხოვრობთ, ძალიან კარგად ვიცით, პატარა წვიმაც რომ მოდის ქალაქში, რა პრობლემებიც იქმნება. საკითხი რომ ძალიან მძიმეა და პრობლემა ძალიან დიდი, შეუძლიათ უარყონ, მაგრამ ფაქტი სახეზეა _ ჭირმა თავი არ დამალა.
_ საკრებულოს სხდომაზე თქვენ მიეცით ხმა 3 მილიონი ლარის გამოყოფას?
_ კი, ხმა მივეცი.
_ თქვენ კვალიფიციური იურისტი ბრძანდებით და არ იცით ხმა რას მიეცით?
_ კი, მართალია, არ ვიცი. მე ბიუჯეტისთვის არასდროს მიმიცია ხმა _ ეს პირველი შემთხვევა იყო, როდესაც ბიუჯეტთან დაკავშირებით მივეცი ხმა. მაგრამ, მეორეს მხრივ, ამ ხმის მიცემით ერთგვარად ვალდებულება ავიღე ამ პროცესის სრულ მონიტორინგზე. მე ბოლომდე შევეცდები მივიდე, სადამდეც მიმიშვებენ, სადამდეც ხელმისაწვდომი იქნება დოკუმენტები და სადამდეც შესაძლებელი იქნება გაკონტროლდეს ეს ხარჯები. ოქტომბრიდან ახალი ცხოვრება რომ დაიწყება, ყველაფერს გავაკეთებთ საქართველოს მოსახლეობის პრობლემების გადასაწყვეტად.
