დღეს ლანჩხუთის მუნიციპალიტეტის ადმინისტრაციული შენობის სააქტო დარბაზში საკრებულოსა და საკრებულოს აპარატის ორგანიზებით, 2015 წლის ბიუჯეტის შესრულების ანგარიშისა და აუდიტის დასკვნის საჯარო განიხილვა მოეწყო, რომელსაც საკრებულოს საფინანსო-საბიუჯეტო კომისიის თავმჯდომარე ალექსანდრე სარიშვილი უძღვებოდა.
ბიუჯეტის განხილვისას ითქვა, რომ 2015 წლის გეგმა შესრულებულია 102.4 %- ით და ყველა ვალდებულება, რაც მუნიციპალიტეტს ჰქონდა აღებული-შესრულებულია.
შეხვედრაზე განსაკუთრებული აქცენტი გაკეთდა შ.პ.ს "FINANCIAL EXPERETS CORPORATION"-ის მიერ მომზადებულ აუდიტორულ დასკვნაზე, რომელშიც ნათქვამია, რომ ბიუჯეტის შესრულებამ შეადგინა 98%. რაზეც მუნიციპალიტეტის გამგებელმა და საფინანსო სამსახურის უფროსმა განაცხადეს, რომ აღნიშნული სიმართლეს არ შეესაბამება, ვინაიდან 2015 წლის ბიუჯეტი გადაჭარბებით შესრულდა.
აუდიტორულ დასკვნაში ასევე ნათქვამია, რომ მუნიციპალიტეტის დაქვემდებარებაში მყოფ ა(ა)იპი-ებში გამოვლინდა ხარვეზები. აღნიშნულთან დაკავშირებით. ამაზე გამგებელმა მეტი კონკრეტიკა მოითხოვა და განაცხადა, რომ აუდიტორმა უნდა წარმოადგინოს, კონკრეტულად რომელ ა(ა)იპი-ებში იქნა გამოვლენილი ფინანსური ხარვეზები და უზუსტობები.
გამგებლისვე თქმით, ის ხარვეზები, რაც "საფეხბურთო კლუბ ლანჩხუთის "გურიას"" საქმიანობაში გამოვლინდა, გამგეობის შიდა აუდიტის სამსახურის მიერ არის აღმოჩენილი და პროკურატურას აქვს გადაცემული.
"მე არ ვცნობ წარმოდგენილ აუდიტორულ აქტს. ამის შესახებ უკვე მივწერე აღნიშნულ კომპანიას, რომ შესაბამისი დასკვნა დაიდოს, სადაც დასაბუთებული იქნება ყველა დეტალი. განმარტებებს კი კომპეტენტური დასკვნის წარმოდგენის შემდეგ გავაკეთებ." -ასეთი განაცხადი გააკეთა მუნიციპალიტეტის გამგებელმა ზაზა ურუშაძემ.
ურუშაძის მხრიდან შეხვედრაზე გაკეთებული განცხადებები ოპოზიციის მხრიდან მორიგი კრიტიკის ობიექტი გახდა.
მუნიციპალიტეტის საკრებულოს წევრი ელგუჯა ჩხაიძე ამბობს, რომ მას შემდეგ, რაც სიტყვა გამგებელს გადაეცა, მან პროტესტის ნიშნად შეხვედრა დატოვა, რადგან არ სურდა ურუშაძის ზღაპრების მოსმენა.
"გამგებელმა ზაზა ურუშაძემ თავისი გამოსვლა დაიწყო იმით, რომ თითქოს აუდიტის დასკვნა არასწორი ყოფილა. თურმე ის ტელეფონით დაკავშირებია აუდიტს და მათ ბოდიშიც მოუხდიათ, უზუსტობები გაგვეპარაო.თუ ასეთი აუდიტები გვყავს სიზუსტეს ალბათ, ვერასოდეს გავიგებთ. მე ურუშაძის ზღაპრების მოსმენა აღარ მინდოდა და დარბაზი დავტოვე." -გვითხრა ჩხაიძემ.
ამავე თემაზე კომენტარი გააკეთა ასევე "თავისუფალი დემოკრატების" ადგილობრივი ორგანიზაციის თავმჯდომარემ ვახტანგ ზენაიშვილმაც.
"გამგებელმა თავის გამოსვლაში პირდაპირ დაადანაშაულა აუდიტორული ფირმა სიყალბეში! ურუშაძეს თუ დავუჯერებთ(?!) გამგეობის მიერ მიწოდებული მასალები არ იძლეოდა მოცემული "დასკვნის" გაკეთების საფუძველს. ურუშაძის თვისებამ – არ ვიცი, არ მინახავს, არ გამიგონია, ამ შემთხვევაშიც იჩინა თავი. ვნახოთ, მისცემს თუ არა აუდიტორული ფირმა "financial experets corporation"-ი საშუალებას ზაზა ურუშაძეს ხელი მათ შეაწმინდოს. ასეთ შემთხვევაში ხსენებული ფირმის კომპეტენციაზე ჩვენც დავფიქრდებით."-ამბობს ვახტანგ ზენაიშვილი.
"გურია ნიუსი" ეცდება დაუკავშირდეს შპს "financial experets corporation" -ს და მათი კომენტარიც შემოგთავაზოთ აღნიშნულ თემასთან დაკავშირებით.
