2016 წლის ზაფხულში მგზავრებს ორსართულიანი, ევროპული სტანდარტის შვეიცარული მატარებლები მოემსახურება. მატარებლების შემოყვანა ივლისიდან იგეგმება.
ამის შესახებ ინფორმაციას "საქართველოს რკინიგზა" ავრცელებს.
"ოთხი ახალი მატარებელი საჭირო ყველა თანამედროვე მოწყობილობით, ულტრათანამედროვე ტიპის უსაფრთხოების სისტემებით არის აღჭურვილი, რომელიც სრულ შესაბამისობაშია ევროპულ უსაფრთხოების სტანდარტებთან. ქართულ რეალობაში ეს იქნება პირველი მატარებელი, რომელიც სრულად იქნება მორგებული შეზღუდული შესაძლებლობების მქონე პირების საჭიროებებზე" – აღნიშნულია განცხადებაში, რომელსაც საქართველოს რკინიგზა ავრცელებს.
როგორც "გურია ნიუსთან" საუბრისას საქართველოს რკინიგზის საზოგადოებასთან ურთიერთობის სამსახურის უფროსი დაჩი ცაგურია ამბობს, მატარებელი ივლისიდან იმოძრავებს და მგზავრების გაზრდილ ნაკადს მოემსახურება.
"ეს არის მსოფლიოში ერთ-ერთი ლიდერი ბრენდის მატარებელი, რომლით მგზავრობაც იქნება კომფორტული და უსაფრთხო. მატარებელი ადაპტირებულია. ამ ბრენდის მატარებლები დადის ევროპის ისეთ ქვეყნებში, როგორიცაა გერმანია, ბელგია, შვეიცარია და ავსტრია", – ამბობს ცაგურია.
მისივე თქმით, ორსართულიანი მატარებლისთვის უკვე ადაპტირებულია საქართველოს რკინიგზაც.
"ერთ მატარებელში 450 ადგილია. მატარებელს უპრობლემოდ შეუძლია თბილისიდან ბათუმში ჩასვლა. ამ მატარებლით მგზავრობას, დაახლოებით, ნახევარ საათზე ნაკლები დრო დასჭირდება, ვიდრე დღეს თბილისიდან-ბათუმამდე. ხოლო 2019 წლიდან, როდესაც დამთავრდება მოდერნიზაციის პროცესი, ამ მატარებლით ბათუმში 1 საათზე ნაკლებ დროში ჩავალთ", _ აღნიშნავს ცაგურია და დასძენს, რომ მატარებლით მგზავრობის საფასური უცვლელი დარჩება.
რაც შეეხება მატარებლების საერთო ღირებულებას, როგორც ცაგურია ამბობს, საქართველოს მათი შეძენა 40 მილიონი ევრო დაუჯდა, თუმცა, მისივე განმარტებით, ამ სტანდარტის მატარებლისთვის ეს ფასი ძალიან იაფია.
