ვიცე პრემიერი, საქართველოს ენერგეტიკის მინისტრი, „ქართული ოცნება_დემოკრატიული საქართველოს“ გენერალური მდივანი „გურია ნიუსთან“ ინტერვიუში ამბობს, რომ მაჟორიტარ კანდიდატებთან დაკავშირებით საბოლოო გადაწყვეტილება ჯერ მიღებული არ არის. მისივე თქმით, ჯერ არც პარტიული სიაა დაზუსტებული, თუმცა არ გამორიცხავს, რომ სიაში რამდენიმე მოქმედი მინისტრი ვიხილოთ:
_ ბატონო კახი, აქტიურად საუბრობენ, რომ შესაძლოა თქვენ სამტრედიაში იყაროთ კენჭი….
_ არა მგონია მაჟორიტარობის კანდიდატი ვიყო. ამაზე გუნდში მსჯელობა არ ყოფილა. ამაზე ძალიან ბევრი საუბრობს _ სიაში ვიქნები, არ ვიქნები. თუმცა, გადაწყვეტილებას იმის შესახებ, თუ როგორ უნდა დაკომპლექტდეს სია გუნდში მივიღებთ. არ გამოვრიცხავ, რომ ამჟამინდელი რამდენიმე მინისტრი ვიხილოთ სიაში.
ამაზე უახლოეს მომავალში იქნება გადაწყვეტილება მიღებული. ჯერ ადრეა ამაზე საუბარი. ახლა ჩვენ ვემზადებით ყრილობისთვის, სადაც პარტიის თავმჯდომარე და პოლიტსაბჭოს წევრები იქნება არჩეული. ამის შემდეგ, ნელ-ნელა, საარჩვენო კამპანიასაც დავიწყებთ. ძალიან კარი მაჟორიტარები და საინტერესო სია იქნება.
_ ძალიან დიდი ინტერესია ვინ იქნება საარჩვენოდ გაერთიანებული ლანჩხუთისა და ჩოხატაურის მაჟორიტარი დეპუტატი. თემურ ჭკუასელმა „გურია ნიუსთან“ ინტერვიუში აღნიშნა, რომ თუ „ქართული ოცნება“ სთხოვს დათანხმდება კანდიდატობას. აპირებთ შეეხვეწოთ?
_ ჩვენ გუნდში აუცილებლად გვექნება მსჯელობა, როგორც ლანჩხუთ -ჩოხატაურზე, ასევე ყველა რაიონზე და ყველა ქალაქზე. ჩვენ უნდა გავითვალისწინოთ ადგილობრივი მოსახლეობის აზრი თუ რომელ კანდიდატს ანიჭებს უპირატესობას და შესაბამისად, ამის შედეგად იქნება გადაწყვეტილება მიღებული.
_ პრაიმერის ჩატარებას აპირებთ?
_ გამოკითხვებს ჩავატარებთ, _ გვითხრა კალაძემ.
ვიცეპრემიერმა ჩვენთვის მოცემულ ექსკლუზიურ ინტერვიუში ბახმაროს განვითარების პროექტზეც ისაუბრა და აღნიშნა, რომ სამინისტროები აქტიურად მუშაობენ:
_ ბახმარო ძალიან მნიშვნელოვანი კურორტია ადგილმდებარეობით, სილამაზით და ძალიან მნიშვნელოვანია ინფრასტრუქტურის მოწყობა. დაწყებულია ამისთვის აქტიური მუშაობა და ძალიან მალე გახდება ცნობილი კონკრეტულად რა სამუშაოები განხორციელდება, _ გვითხრა კახი კალაძემ.
