მაშინ, როდესაც ამ ხელისუფლების პირობებში მოხდა ჩვენზე თვალთვალი და პირადი მიმოწერების გასაჯაროება, რატომ არ შეიძლება სხვა პოლიტიკოსებზეც იგივე ხორციელდებოდეს?! _ აცხადებს ჟურნალისტი ეკა მიშველაძე, რომელიც ერთ-ერთი პირველი იყო ახალი ხელისუფლების პირობებში თვალთვალსა და მოსმენებზე ღიად საუბარი რომ დაიწყო.
ეკა მიშველაძისა და ალექსი პეტრიაშვილის საქმეზე გამოძიება შსს-ს აქვს დაწყებული, თუმცა უწყებას ჟურნალისტი უნდობლობას უცხადებს.
ცნობისთვის, 2015 წლის 8 სექტემბერს ჟურნალისტმა ეკა მიშველაძემ "რუსთავი 2"-ზე გადაცემა "არჩევანში" განაცხადა, რომ მას და ალექსი პატრიაშვილს უთვალთვალებდნენ.
"მანამდე, ვიდრე საზოგადოებრივი მაუწყებლის მრჩეველი გაიგებდა, რომ მე და ალექსი პეტრიაშვილი დავქორწინდით, ამის შესახებ იზრუნეს და შესაბამისმა სამსახურებმა იცოდნენ ჩემსა და ალექსი პეტრიაშვილს შორის არსებული ურთიერთობის შესახებ. ამაზე მეტს არაფერს ვიტყვი. გასაგებად ვთქვი, რაც ვთქვი,” _ აღნიშნა მაშინ მიშველაძემ.
ამ განცხადებიდან 5 თვის შემდეგ, მიშველაძემ მთავარ პროკურატურას იმ პირის ვინაობა დაუსახელა, ვინც მას მისი და ალექსი პეტრიაშვილის Viber-მიმოწერა წარუდგინა.
თუმცა, იმის მაგივრად, რომ გამოძიება მთავარ პროკურატურას დაეწყო, 2016 წლის 20 მარტს, საქმე შინაგან საქმეთა სამინისტროს გადაეცა, რასაც ეკა მიშველაძე და მისი უფლებების დამცველი არასამთავრობო ორგანიზაცია უნდობლობას უცხადებენ.
რატომ უცხადებს შსს-ს უნდობლობას, ვის ინტერესებში შედიოდა მიშველაძე-პეტრიაშვილის თვალთვალი და უსმენენ თუ არა პოლიტიკოსებს ახლა, ამ საკითხებზე "გურია ნიუსი" ჟურნალისტ ეკა მიშველაძეს ესაუბრა.
_ ქალბატონო ეკა, რამდენიმე დღის წინ განაცხადეთ, რომ შინაგან საქმეთა სამინისტროს, რომელსაც თქვენი საქმე გამოსაძიებლად გადაეცა, უნდობლობას უცხადებთ. ხომ არ დაბრუნებულა საქმე პროკურატურაში ან რა ეტაპზეა გამოძიება?
_ არაფერი შეცვლილა, ამ ეტაპზე პასუხი ჩვენ არ გვაქვს. ჩემი პირველიგანცხადების მერე, ერთხელ ვიყავი დაბარებული პროკურატურაში გასაუბრებაზე, რამდენიმე თვის შემდეგ კი, პოლიციაში დამიბარეს, გამოძიება დაიწყოო, მითხრეს. გამოძიებას ისევ შინაგან საქმეთა სამინისტრო აგრძელებს. იცით, რომ ჩვენ უნდობლობა გამოვუცხადეთ შსს-ს, ამის მერე ინფორმაცია არ მაქვს. მოწმის სახით ვიყავი დაბარებული, რა ეტაპზეა გამოძიება, ნამდვილად ვერ გეტყვით.
ფაქტია, რომ ამ ხელისუფლების პირობებში მოხდა ჩვენი თვალთვალი და ამონაწერების გასაჯაროება. ეს მიმოწერები მოხვდა იმ ადამიანების ხელში, ვის ხელშიც არანაირად არ უნდა მოხვედრილიყო. არა მგონია, რომ თავიანთი თავი დაიჭირონ.
_ ოპოზიციის ნაწილი ამ საქმეების გამოუძიებლობას დაუსჯელობის სინდრომს უკავშირებს, რომლის პრეცენდენტიც შსს-ს მაღალჩინოსნის გელა ხვედელიძის საქმე გახდა. თქვენ რას უკავშირებთ?
_რა თქმა უნდა, ამ ხელისუფლებას რომ გამოეძიებინა, ვინ ახორციელებდა უკანონო თვალთვალს და ჩაწერებს, შემდეგ როგორ მოხვდა საჯარო სივრცეში ეს ჩანაწერები, ზოგადად, უფრო მეტად რომ გაეკონტროლებინა ეს ყველაფერი, ეს აღარ მოხდებოდა. მაგრამ ამის არანაირი სურვილი არ ყოფილა, სწორედ ამ ხელისუფლების პირობებში, ძალიან ცოტა ხნის წინ იყო, რამდენიმე პოლიტიკოსის კადრები რომ მოხვდა ინტერნეტსივრცეში.
_შესაძლებელია, რომ ამ ჩანაწერების გავრცელება ხელისუფლების ინტერესებში შედიოდეს? თქვენი აზრით, ვის ინტერესებში შედს ამის გავრცელება?
_ძალიან ბევრი კითხვის ნიშანია, ვის ინტერესებში შედის. შედის თუ არა ეს ამ ხელისუფლების ინტერესში. – ერთი რამ ფაქტია და ცხადია, რომ ჩემზე და ალექსი პეტრიაშვილზე თვალთვალი ხორციელდებოდა სწორედ ამ ხელისუფლების პირობებში. წინა ხელისუფლების დროს ჩვენ არ ვურთიერთობდით. სწორედ ეს არის მთავარი კითხვა, რაზეც პასუხი უნდა გაეცეს, მაგრამ ამის იმედი არ მაქვს და არც ამ საქმის გამოძიების იმედი მაქვს.
_როგორ ფიქრობთ, მოქმედი ოპოზიციონერი პოლიტიკოსის და ჟურნალისტის ურთიერთობა იყო საინტერესო თუ ზოგადად ასეთი მიდგომაა, რომ ყველას უსმენდნენ და უთვალთვალებდნენ?
_ნამდვილად არ ვიცი. ეგ ხელისუფლების იმ წარმომადგენლებს ჰკითხეთ, ვინც მაგ თვალთვალს ახორციელებდა. ზოგადად, ალექსიზე იყო თვალთვალი და არა ჩემზე. ოპოზიციონერი პოლიტიკოსის ცხოვრება აღმოჩნდა საინტერესო და არა ჩემი, მაგრამ მეც მოვხვდი მაგ "ბადეში", ასე რომ ვთქვათ. ვინ არის მათთვის საინტერესო და ვინ არა, ეს მე არ ვიცი. მე ისიც არ ვიცი, ვისთვის რატომ უნდა იყოს ვინმეს პირადი ცხოვრება საინტერესო. ეს არის სრული მარაზმი.
_ამ ლოგიკით ხომ შეიძლება სხვა პოლიტიკოსებსაც უსმენდნენ?
_რა თქმა უნდა, რატომ არ შეიძლება, დაზღვეული არავინ რომ არ არის, ფაქტია.
ამავე თემაზე:
ვინ გაავრცელა ეკა მიშველაძის პირადი ცხოვრების ამსახველი ინფორმაცია
ბარამიძის გამოსვლას პარლამენტში ჩხუბი მოჰყვა _ კოპალიანმა მაჭავარიანს მიკროფონი ესროლა
