“თქვენ ხართ ტენდენციური ჟურნალისტი!”- ლანჩხუთის გამგებელი

ლანჩხუთის მუნიციპალიტეტის ვებგვერდზე განთავსებული ინფორმაციის მიხედვით,  "ლანჩხუთის მუნიციპალიტეტის გამგებელი და "გურიას" პრეზიდენტი ზაზა ურუშაძე ფეხბურთელებს დაჰპირდა, რომ ყოველი გატანილი 2 ბურთისთვის, პირადი ანგარიშიდან 500 ლარს გადასცემდა.
დღეს გრიგოლეთის საწვრთნელ ბაზაზე ქუთაისის „ტორპედოსთან“ გატანილი ორი გოლისთვის, ევგენი მოროზენკოს, ფულადი ჯილდო გამგებელმა თავად გადასცა."

"თავისუფალი დემოკრატების" ლანჩხუთის რაიონული ორგანიზაციის ხელმძღვანელი, ლანჩუთის გამგებლის ყოფილი მოადგილე  ვახტანგ ზენაიშვილი ინტერესდება საიდან იყრის ზაზა ურუშაძის ანგარიშზე ამდენი თანხა თავს. "რომელი პირადი ანგარიშიდან? ხელფასიდან? ლექციებს კითხულობს, თავისი ლექსების კრებული გაყიდა თუ საიდან იყრის თავს ასეთი მსხვილი თანხები "პირად ანგარიშზე"?- ამბობს ზენაიშვილი.

ჩვენ დავინტერესდით, რა შემოსავლების მფლობელია ურუშაძე და გამგებლის ქონებრივ დეკლარაციებს გადავხედეთ,

ლანჩხუთის მუნიციპალიტეტის გამგებელმა ზაზა ურუშაძემ ქონებრივი დეკლარაცია 1016 წლის 21 მარტს შეავსო. დეკლარაციის მიხედვით ურუშაძე ფლობს საცხოვრებელ  ბინას თბილისში, დიღმის მასივში, არასაცხოვრებელ ფართს ასევე დიღმის მასივში, 200 კვადრატული მეტრის ფართის მქონე  საცხოვრებელ სახლს და  საკარმიდამო ფართობს ლანჩხუთის მუნიციპალიტეტის სოფელ გრიგოლეთში, რომლის ფართობი – 3300.00 კვ.მეტრია.

რაც შეეხება ანაბრებს, თიბისი ბანკის ანაბარზე ლანჩხუთის გამგებელს 28800.00  აშშ დოლარი ერიცხება, ვითიბი  ბანკში  2015 წლის მონაცემებით ურუშაძეს ორი ანაბარი აქვს  1260.00  დოლარი და 240.00 ლარი, ლიბერთი ბანკის სახელფასე ანგარიშზე დეკლარაციის შევსების მომენტში მას 120 ლარი ერიცხებოდა, საქართველოს ბანკში  კი 8160.00 ლარი.

ხელფასის სახით ზაზა ურუშაძემ  2015 წელს  მიიღო  31800.00 ლარი.

 2015 წლის დეკლარაციით, რომელიც 2014 წლის მონაცემებს მოიცავს,  ზაზა ურუშაძის თიბისი ბანკის ანაბარზე  26500.00 დოლარი, ვითიბი ბანკში 1100.00 დოლარი, ლიბერთი ბანკის სახელფასე ანგარიშზე 2400.00 ლარი, ტაოპრივატ ბანკის სახელფასე ანგარიშზე 1500.00 ლარი, საქართველოს ბანკში 2000.00 ლარი და ვი–თი–ბი ბანკის ანაბარზე ლარი 240.00 ქონდა.

წინა დეკლარაციებიდან ირკვევა, რომ ზაზა ურუშაძეს 2013 წლის შემდეგ არ შეუძენია უძრავი ქონება,  ამ პერიოდში  მხოლოდ მისი ანაბრების რაოდენობა გაიზარდა.

 2013 წელს ურუშაძის ანაბრები შედარებით მოკრძალებულად გამოიყურება:   თიბისი ბანკის ანაბარზე მას ქონდა  25000.00 დოლარი, ვითიბი ბანკში 1000.00 ამერიკული დოლარი და ლიბერთი ბანკის სახელფასო ანგარიშზე 1500 ლარი ქონდა.

რა თანხები აკუმულირდება გამგებლის პირად ფონდში, საიდანაც ის ფეხბურთელების დაჯილდოებას აპირებს, რამდენია ფონდის შემოსავლები?

საკითხის განმარტების მიზნით ჩვენ დავუკავშირდით ზაზა ურუშაძეს, რომელმაც ტენდენციურობაში დაგვადანაშაულა და უარი განაცხადა კომენტარზე. "დაუკავშირდით ჩემს პრესცენტრს და ის გაგცემთ პასუხს.  თქვენ ხართ ტენდენციური ჟურნალისტი!"-ასეთი იყო ურუშაძის პასუხი. უფრო ვრცელი განმარტება გამგებელმა არ ისურვა.

"გურია ნიუსმა" ლანჩხუთის მუნიციპალიტეტის გამგეობის პრესცენტრის სახელზე  საჯარო ინფორმაციის გამოთხოვის მიზნით,  განცხადება  გააგზავნა, ოფიციალურ  პასუხს მიღებისთანავე შემოგთავაზებთ.

 შენიშვნა: ფოტო აღებულია ლაჩხუთის მუნიციპალიტეტის გამგეობის ვებგვერდიდან