კოალიციის ოზურგეთის წარმომადგენელების განცხადებით, შეხვედრამ მშვიდ გარემოში ჩაიარა, მათ მხარდამჭერებსა და მოქალაქეებზე არანაირი ზეწოლა არ ყოფილა.
დავით ბერძენიშვილი: “ჩვენ უნდა შევცვალოთ ეს ხელისუფლება. საქართველოში პოლიტიკური ოპოზიცია ყოველთვის ძლიერი იყო. დავდივართ სოფლებში აქტიურად, ვხდებით მოსახლეობას სოფელ-სოფელ, 27-ში იქნება ძალიან დიდი აქცია და მერე ქუჩაში გამოვალთ. ოზურგეთშიც გაიმართება თეატრის წინ შეხვედრები. ასეთი გამოსვლები იქნება ქუთაისშიც, ზუგდიდშიც. ოზურგეთშიც და ყველგან.
გურულებს სერიოზული კონკურენცია გელით, მაგრამ უნდა გავუძლოთ ამ კონკურენციას. ჩვენ გავხსენით მეორე პოლიტიკური ფრონტი სამეგრელოში. ასეთი გადაჭედილი დარბაზი იყო ზუგდიდშიც და მართლა შეეშინდა ხელისუფლებას, რომლისთვის ყველაზე მტკივნეული სწორედ გადაჭედილი დარბაზებია, საიდანაც ძალიან მალე ქუჩაში გავალთ _ ვეღარ ვეტევით უკვე დარბაზებში. ალასანია სამეგრელოში, გუბაზი _ იმერეთში, მე _ ოზურგეთში, ზვიად ძიძიგური _ ქვემო ქართლში, პაატა ზაქარეიშვილი, როგორც კამიკაძე, გავამწესეთ სამცხე-ჯავახეთში და ახალციხეში იქნება მისი დისლოკაციის ადგილი, შიდა ქართლში იქნება თინა ხიდაშელი.
მოიყვანოს სააკაშვილმა გურიაში მისი ვირტუალური ფალავანი და შევხვდეთ მე და ნიკოლაიშვილი ერთმანეთს. მობრძანდეს და ხალხის წინაშე ვილაპარაკოთ ნებისმიერ ტელევიზიაში, ნებისმიერ გაზეთში, ნებისმიერ დარბაზში.
არის იმერეთში ვინმე ნაციონალებიდან, ვინც გუბაზ სანიკიძეს დაუჯდება და დაელაპარაკება ხალხთან ერთად? ირაკლი ალასანიასთან ვინ ჰყავთ ფალავანი? ერთი ახალაია, მეორე თუ მათი მამა? გამოვიდნენ, თუ მაგარი ბიჭები არიან და დაგველაპარაკონ.
ჩვენ პასუხისმგებლიანი პოლიტიკური ძალა ვართ. დიდი მოლოდინია ბიძინა ივანიშვილის მიმართ. ასობით აღდგენილი ქართული ტაძარი, აშენებული “სამება”, “ციცინათელა”, რომელიც ორჯერ იყიდა, მერე ხელისუფლებამ გამოუქვეყნა სიები _ ნახეთ, ათასობით ადამიანს აფინანსებდაო, ჩვენიანებსო. ბიძინა ივანიშვილის მხარდაჭერისთვის ასობით ადამიანი, ასობით საუკეთესო მასწავლებელი გაათავისუფლეს.”
ირაკლი ალასანია: “ჩვენ ქვეყანაში სამართალს ვერ იპოვით. პოლიცია და განსაკუთრებით კონსტიტუციური უსაფრთხოების დეპარტამენტი საკუთარ სამსახურში ჩაკეტა ერთმა პიროვნებამ და ერთმა პარტიამ. მე მინდა განსაკუთრებით მივმართო იმ ვიწრო წრეს, პატარა ჯგუფს, კონსიტიტუციური უსაფრთხოების დეპარტამენტს, რომელიც მიპარვით, ვირთხებივით აწუხებენ ჩვენს მხარდამჭერებს მთელ საქართველოში, რომ ისინი პასუხს აგებენ, არც ერთ მათგანს არ შერჩება ასობით ადამიანის შეურაცხყოფა. სამართლიანობა უნდა აღდგეს, ერთხელ და სამუდამოდ უნდა დაამთავრეს შერჩევითი სამართლის დრო, რაც სააკაშვილმა დაამკვიდრა საქართველოში. ჩვენი კოალიციის ლიდერი, ბიძინა ივანიშვილი უდიდეს ყურადღებას უთმობს გურიის აღორძინებას. ჩვენ მასთან ერთად განვიხილეთ გურიაში სოფლის მეურნეობის ფეხზე დაყენების, ჯანდაცვის სისტემის რეფორმის, განათლების სისტემის მოწესრიგების საკითხები. ჩვენი მთავარი ამოცანა იქნება ეს ულამაზესი კუთხე ჩვენი ქვეყნისა, რომელიც ასე უპატრონოდ არის მიტოვებული ათწლეულების მანძილზე, ძალიან მალე ფეხზე დავაყენოთ და გურიაში ღირსეულად ცხოვრების შესაძლებლობა გქონდეთ.
გუბაზ სანიკიძე: “საქართველოს არასდროს მართავდა მშიშარა, მხდალი მთავარსარდალი. ჩვენ დედალი კაცი ავირჩიეთ პრეზიდენტად _ ეს უნდა ვიგლოვოთ. სააკაშვილმა დააქცია ეს ქვეყანას კი ბიძინას მარტო 2 მილიარდი აქვს ჩადებული საქველმოქმედო საქმიანობაში.”
კოტე შარაშენიძე, კოალიცია “ქართული ოცნების” ოზურგეთის შტაბის ხელმძღვანელი: “დღეს აქ ბრძანდებით საზოგადოების ის ნაწილი, რომელსაც არ გეშინიათ, რომლებსაც უყვარს თავისი სამშობლო. ჩვენ გვექნება მსგავსი ტიპის შეხვედრები, აუცილებლად ჩამობრძანდება ბატონი ბიძინა ოზურგეთში. სააკაშვილი ამ ბოლოს ხშირად ჩამოდიოდა. მე ვარ იმის მომსწრე, ხალხი იქ მიდენილი იყო, აქ კი თქვენ, 2 000 კაცი, თქვენი ნებით ხართ მოსული და ეს ბევრის მთქმელია. დღეს, ოზურგეთსა და გურიას ნიკოლაიშვილი განაგებს, რომელსაც ბატონ-პატრონად მოაქვს მისი თავი. ღირსება არ აქვს ადგილობრივ ხელისუფლებას და ამის გამო ნიკოლაიშვილის დავალებებს ასრულებენ. საინტერესოა ის თემა, რომ ჩვენთან, რაიონში არის შემოსული ტელეკომპანიის “გლობალ ტვ”-ის მომსახურე ტექნიკური ჯგუფი, რომელმაც დაიწყო ურეკიდან შრომა-ნატანების ტერიტორიაზე ამ ანტენების დაყენება. ნუ შეშინდებით, თქვენ შეგეძლებათ მიიღოთ ინფორმაცია. ერთი თვის მანძილზე ოზურგეთი სრულიად იქნება მოცული. არ აყვეთ ჭორებს, რომ ვინმეს დახმარებას მოუხსნიან ან სამსახურიდან გაათავისუფლებენ.”
