საპარლამენტო უმრავლესობის დეპუტატი და საფინანსო საბიუჯეტო კომიტეტის თავმჯდომარე თამაზ მეჭიაური ნატო-ში შევლის მცდელობას "განწირულს" უწოდებს და "პირველ რადიოსთან" საუბარში ამბობს, რომ ნატოს წევრი ქვეყნებს არანაირი სურვილი არ აქვთ მიგვიღონ თავის რიგებში და ამით ღიად დაუპირისპირდნენ რუსეთს. მეჭიაურის თქმით, მოლოდინები გადაჭარბებულია:
"მე ცალსახად ვაფიქსირებ, რომ მიუხედავად ჩვენი სურვილისა, რომ შევიდეთ ნატოში, რაც ძალიან კარგია, ჩვენი მცდელობა უახლოეს მომავალში მაინც განწირულია. ეს ვერ მოხერხდება გამომდინარე იქიდან, რომ თვითონ არც ამერიკის შეერთებულ შტატებს არც ევროპის წამყვან სახელმწიფოებს, ნატოს წევრი ქვეყნების მყავს მხედველობაში, არანაირი სურვილი არ აქვთ ჩვენ მიგვიღონ თავის რიგებში და ამით დაუპირისპირდნენ ღიად რუსეთს.
თუ სურვილი აქვთ მაშინ ვინ უშლით, როდის დააფიქსირეს, თქვეს სადმე მიგიღებთო, კეთდება განცხადებები მაპს მოგცემთო, ჩვენ ჩამოვდივართ ვიძახით მაპზე უკეთესი გვაქვსო, ისინი მერე ისევ მაპს გვპირდებიან, მერე ჩვენები ჩამოდიან ნატოზე უკეთესში უნდა მიგვიღონო და ისინი კიდევ ახლიდან იძახიან ჯერ ვერ მივიღებთო და ჩვენ ახლა უბრალოდ ვაბოლებთ რა ხალხს. ზოგიერთი პარტიები, მთლიანადა მაზე არიან დამყარებული, რომ იცოცხლონ.
რატომ ვატყუებთ ჩვენს მოსახლეობას, რომ ეს უახლოეს ხანში მოხდება. მე მიმაჩნია, რომ კარგია ნატო, მაგრამ თუ არ უნდივართ ნატოს დავჯერდეთ იმ რეალობაში ცხოვრებას, რომელშიც ვართ – რომ არ უნდათ ჩვენი მიღება. არ არიან ისინი მზად რუსეთთან დასაპირისპირებლად.
ამიტომაც, ჯერ ჩვენ შევიდეთ ევროკავშირში, პარალელურად რამეთუ სხვა გზა არ გაგვაჩნია ძალისმიერი გზით აფხაზეთის და სამაჩაბლოს დაბრუნებისა, მოლაპარაკებების გზით, თუნდაც, იგივე დასავლური სახელმწიფოების გარკვეული შუამავლობით გავაფართოოთ მოლაპარაკებების არეალი რუსეთთან.
უნდა მოვახერხოთ მშვიდობიანი გზით ტერიტორიული მთლიანობის აღდგენა.
ჩემი აზრით, ნატო არის ფუჭი, იმიტომ, რომ ამ ეტაპზე გადაჭარბებული იმედების დამყარება ერთის მხრივ უფრო მეტად აღიზიანებს რუსეთს და მეორეს მხრივ არანაირი მზაობა არ არის რომ საომარი ვითარების შემთხვევაში ისინი ჩაერთონ ამ კონფლიქტში და მარტო აღშფოთება და შეშფოთება ჩვენ ვერ გვიშველის.
ჩვენზე კარგად იციან, რომ არანაირი შანსი, ჩვენ უახლოეს მომავალში ნატოში გაწევრიანების არ გაგვაჩნია" _ განაცხადა თამაზ მეჭიაურმა "პირველ რადიოსთან" საუბარში.
