საპარლამეტო უმრავლესობის ლიდერის ზვიად კვაჭანტირაძის განცხადებას, რომლის თანახმადაც "ნაციონალური მოძრაობის" ანტიქართული გეგმა ჩავარდა", რადგან "25-26 აპრილს, ბრიუსელში გამართულ ასოცირების კომიტეტის რიგით მეორე სხდომაზე ნაცმოძრაობის დეპუტატებმა გ. კანდელაკმა და ტ. ლონდარიძემ, ისევე როგორც ევროპარლამენტში ევროპის სახალხო პარტიის (ესპ) ფრაქციის წევრებმა, ე.წ. "ჰარდლაინელებმა", საირუშ ვოლსკიმ, შტეტინამ და კიდევ სამმა ესპ-ს წარმომადგენელმა მხარი არ დაუჭირეს საქართველოსთვის ვიზალიბერალიზაციის მხარდამჭერ სარეკომენდაციო დოკუმენტს.
მაგრამ, მიუხედავად ამ აშკარად ანტიქართული პოზიციისა ევროპარლამენტის სოც და დემოკრატთა ალიანსის, მწვანეთა პარტიის, ევროკონსერვატორების და ლიბერალების ფრაქციათა დეპუტატებსა და ქართველი დეპუტატების დელეგაციის უმრავლესობას შორის შემდგარი წარმატებული თანამშრომლობით აღნიშნული სარეკომენდაციო დოკუმენტი მიღებულ იქნა ხმათა ორმხრივი უმრავლესობით".
კვაჭანტირაძის ამ გაცხადებას, განცხადებით უპასუხა "ნაციონალური მოძრაობის" წევრმა გიორგი კანდელკმა და ევროპარლამენტში მისი გამოსვლის ვიდეო მასალაც გამოაქვეყნა.
"გავიგე ოცნების ერთ-ერთ სახეს ზვიად კვაჭანტირაძეს ენმ დაუდანაშაულებია უვიზო რეჟიმის წინააღმდეგ ხმის მიცემაში. თავი რომ დავანებოთ ბატონი ზვიადის სანდოობასა (და არ გავიხსენოთ მის მიერ გაფრქვეული მრავალი სიბრძნე, მაგალითად ევროსაბჭოს საპარლამენტო ასამბლეის პრეზიდენტის სიბერის გამო გამოთაყვანებაში დადანაშაულება ანაც ნადია სავჩენკოს მხარდამჭერი რეზოლუციის კენჭისყრიდან გაპარვა) არავითარი „ვიზა ლიბერალიზაციის კენჭისყრა“ არ ყოფილა.
საქართველოსთვის ვიზა ლიბერალიზაციის მონიჭების საკითხს (სავარაუდოდ მაისის ბოლოს) განიხილავს ევროპარლამენტის იურიდიულ საკითხთა, შინაგან საქმეთა და სამოქალაქო თავისუფლებების (ე.წ. LIBE) კომიტეტი (სადაც ცხადია საქართველოს ხმის უფლება არ აქვს საერთოდ, რადგან არ ვართ ევროპარლამენტში რადგან არ ვართ ევროკავშირში) და შემდეგ ევროპარლამენტის პლენარული სხდომა. ამის შემდეგ ევროპარლამენტის გადაწყვეტილება ხვდება ევროკავშირის საბჭოში – ანუ მთავრობების და სახელმწიფოების მეთაურებთან (ცხადია იქაც საქართველო – მითუმეტეს ოპოზიცია – ვერანაირ გავლენას ვერ ახდენს).
მე თვითონ, კვაჭანტირაძის თანდასწრებით, ევროსაბჭოს საპარლამენტო ასამბლეაზე გამოსვლისას მივმართე ევროკომისიის პრეზიდენტს და მთელი ნაციონალური მოძრაობის სახელით ოფიციალურად ვითხოვე რომ მთავრობის შეცდომების გამო არ დაისაჯოს ქართველი ხალხი და ხაზი გავუსვი რომ ენმ მხარს უჭერს უვიზო რეჟიმის ზაფხულშივე მონიჭებას – აგერ ლინკი – https://www.youtube.com/watch?v=i4NVdj9f8XY (რის გამოც ლევან ბერძენიშვილმა მადლობაც გადამიხადა).
ათასჯერ გვითქვამს რომ ენმ, მათ შორის ციხეში მსხდომი ბიძინას პირადი პატიმარი ჩვენი მეგობრები, მხარს უჭერს ვიზა ლიბერალიზაციის ზაფხულში მონიჭებას.
მეტიც, კვლევები აჩვენებს რომ ვიზა ლიბერალიზაციას ხალხი უფრო მეტად ენმ-ს დამსახურებად აღიქვამს რადგან ის პროცესი, რომელმაც აქამდე მიგვიყვანა სწორედ ენმ-მ დაიწყო და „ჩააცემენტა“. ასე რომ რაც მალე იქნება საბოლოო გადაწყვეტილება, მით უკეთესი ამ მხრივაც.
ერთადერთი, რამაც ხელი შეიძლება ამას შეუშალოს არის ახალი შეტევა რუსთავი 2-ზე (ან რამე თანაზომადი სისულელის ჩადენა).
დეკემბერში მოგერინიმ პირადად უთხრა მთავრობას, რომ არ იქნებოდა არანაირი ვიზა ლიბერალიზაცია თუ არ შეჩერდებოდა შეტევა რუსთავი2-ზე. შეტევა მაშინ შეჩერდა და ევროკომისიამაც ამიტომ მისცა მწვანე შუქი საკითხს. რამდენადაც ვიცი ევროკავშირის დამოკიდებულებაში არაფერი შეცვლილა.
ასე რომ ვინც ამ საკითხზე ვდარდობთ, ჯობია ყველამ ჩვენი წვლილი შევიტანოთ იმაში რომ რაიმე სერიოზული წინაღობა არ წარმოიქმნას დარჩენილ დროში" _ წერს კანდელაკი ფეისბუქის საკუთარ გვერდზე.
