„ამბავთა შორის უმაგრესი ამბავი: მე ვერ ვიპოვე ისტორიაში ყოფილა თუ არა ჯერ, მაგრამ დაახლოებით ორ თვეში, თბილისში იქნება ადგილი, სადაც ეწერება _ "უფასო პური". ადგილი გვექნება მალე და დასაწყისის თანხებს მე მოვაგროვებ სხვადასხვა საშუალებით.
ყველასთვის უფასო იქნება პური, შეძლებისდაგვარად, ტანსაცმელი და ელემენტარული წამლები.
ჩვენ ერთად ვაკეთებთ ამას! იმიტომ, რომ ქვეყანაში მაგარი ადამიანები ვცხოვრობთ და ჩვენ თვითონ მივხედავთ ერთმანეთს!“ _ ეს პოსტი სოციალურ ქსელში 29 წლის აკა სინჯიკაშვილმა გამოქვეყნა.
მისი ფეისბუქის კედელზე ბევრ კარგ ამბავს წაიკითხავთ _ ყველა მათგანი სიკეთის შესახებაა. გაიგებთ, ვინ, როგორ და როდის დაეხმარა იმ ადამიანებს, რომლებსაც ეს ყველაზე მეტად სჭირდებათ.
ერთი სიტყვით, ეს ის ბიჭია, რომელიც ქველმოქმედებას უანგაროდ, კამერების გარეშე ეწევა და სიკეთის გაცემითაა დაკავებული. ეს ის ბიჭია, რომელიც დღისით სამ სამსახურში მუშაობს, ღამით კი მანქანას ტაქსის ტრაფარეტს ამაგრებს და შემოსული თანხით გაჭირვებულ ადამიანებს ეხმარება.
ეს ის ბიჭია, რომელიც ეროვნული ბიბლიოთეკის დირექტორთან, გიორგი კეკელიძესთან ერთად წიგნის ბუდეებს ამზადებს და ყველგან უფასოდ დგამს. ეს ის ბიჭია, რომელსაც საკუთარ თავზე ბევრი ლაპარაკი არ უყვარს და იმითაა ბედნიერი, რომ მის წამოწყებას, უანგაროდ აკეთონ ქველმოქმედება, ბევრი ადამიანი შეუერთდა:
_ ყველაფერი სამი წლის წინ, ეროვნულ ბიბლიოთეკაში დავიწყეთ. თანამშრომლებთან ერთად წამოვიწყე ეს საქმე, რომელსაც უკვე ბევრი ადამიანი შეუერთდა. ბევრი ამყვა _ არც კი მეგონა, თუ ამდენი თანამოაზრე გამიჩნდებოდა, _ გვეუბნება აკა.
მისი ქველმოქმედება მხოლოდ თბილისით არ შემოიფარგლება. აკა, მეგობრებთან ერთად რეგიონებშიც დადის და ადამიანებს თითქმის ყველა სახის დახმარებას უწევს _ ზოგს სახლის გარემონტებაში ეხმარება, ზოგს ოპერაციის გაკეთებაში.
_ საქართველო მხოლოდ თბილისი არაა. რეგიონებშიც სჭირდება ხალხს დახმარება, _ აღნიშნავს აკა.
აღდგომის წინა დღეს ჩოხატაურს ეწვია. „გურია ნიუსს“ იმ ადამიანების ვინაობა ჰკითხა, რომლებსაც დახმარება და საკვები სჭირდებოდათ და ყოველგვარია პიარის გარეშე, ჩვენს რესპონდენტებს საჩუქრებით ესტუმრა:
_ მართლა არ ხართ პარტიიდან? ასე, ტყუილად გვირიგებთ საჩუქრებს?! ეს პირველი შემთხვევაა, როცა კამერების გარეშე მოვიდნენ და პროდუქტები მოგვიტანეს, _ გაოცებას ვერ მალავდნენ იმ 4 ოჯახში, სადაც აკამ პროდუქტები და ტკბილეული მიიტანა.
29 წლის აკას მეუღლე და ერთი შვილი ჰყავს. მისი ყოველთვიური შემოსავალი 1400 ლარს შეადგენს და თანხის ნახევარზე მეტს ქველმოქმედებაში ხარჯავს. თუმცა, ადამიანების დასახმარებლად, რომლებიც აკას ძალიან ბევრს წერენ, უფრო მეტია საჭირო და ამაში, როგორც ზემოთ აღვნიშნეთ, თანამოაზრეები ეხმარებიან:
_ როდესაც ეს ამბავი სოციალური ქსელით გავავრცელეთ, ბევრი დაინტერესდა. ყველა ასაკის ადამიანია ჩართული. გუშინ, 12 წლის ბავშვმა მომწერა, მეც მინდა კარგი საქმეების გაკეთება და როგორ გავაკეთოო. ეს ძალიან მახარებს და ამით ბედნიერი ვარ, _ ამბობს გურია ნიუსთან“ საუბრისას და დასძენს, რომ ამ საქმის კეთება უდიდეს სიამოვნებას ანიჭებს.
იმისთვის, რომ ბევრ ადამიანს დაეხმაროს, დამატებით სამუშაოსაც არ თაკილობს და როგორც უკვე დავწერეთ, ღამით „ტაქსაობს“:
_ ტაქსი იყო იმის საშუალება, რომ რაც შეიძლება მეტი ადამიანი დაინტერესებულიყო ჩვენი წამოწყებით და გაამართლა, _ გვითხრა აკამ.
მისივე თქმით, წამოწყებაში მცირე მეწარმეები ჩაერთნენ:
_ დიდი ბიზნესის დაინტერესება ვერ მოვახერხეთ, _ დანანებით ამბობს აკა.
კითხვაზე _ ეს იმით ხომ არ არის განპირობებული, რომ ქველმოქმედება კამერების გარეშე ხდება, გვპასუხობს, რომ „არც უმაგისობაა“.
აკა იმაზე სწუხს, რომ ყველას დახმარებას ვერ ახერხებს:
_ ძალიან ბევრი ადამიანი მწერს, რომ დახმარება სჭირდებათ. სამწუხაროდ, ყველას ვერ ვეხმარებით, მაგრამ დიდი ნაწილის დახმარებას ვახერხებთ, _ აღნიშნა აკამ.
აკას სლოგანი ასეთია: „ჩვენ თვითონ მივხედოთ ერთმანეთს“
თუკი თქვენც გაქვთ სურვილი შეუერთდეთ ამ კარგ საქმიანობას, შეგიძლიათ გაიღოთ შემოწირულობა. დაუკავშირდეთ აკას ამ ლინკზე ან თანხა გადარიცხოთ მის ანგარიშზე: GE90TB7603845061100016
