თამაზ მეჭიაური განცხადებების გენერატორი გახდა, ის პარლამენტში 16, 17 წელია, რაც არის და მისი ხმა არავის გაუგია, – ამის შესახებ „რესპუბლიკური პარტიის“ ერთ-ერთმა ლიდერმა ლევან ბერძენიშვილმა 2030.news-ს განუცხადა.
„ბატონი მეჭიაური გახდა განცხადებების გენერატორი. ეს ცოტა მოულოდნელია, რადგან ის პარლამენტშია 16, თუ 17 წელი და არასდროს არავის მისი ხმა არ გაუგია. ის არ ყოფილა, ე.წ. სპიკერი. მას თუ ულაპარაკია, მხოლოდ საკუთარი რაიონის პრობლემებზე და ასეთი მასშტაბები, როგორიც არის მსოფლიო, აშშ, ნატო ან „რესპუბლიკელები“, პარლამენტის თავმჯდომარე, ნაკლებად ახასიათებდა. ყველაფერი იცვლება და მათ შორის შეიცვალა მეჭიაურიც.
მთავარი კითხვაა, ეს თვითონ არის მეჭიაური, ვისაც ჩვენ ვიცნობთ – სახენაიარევი კაცი, თუ ეს არის ვიღაცის გამახმოვანებელი ფიგურა? მე კი არა, საქართველოს პრემიერ-მინისტრიც ფიქრობს, რომ მეჭიაურის განცხადებები აბსოლუტურად არის აცდენილი „ქართული ოცნების“ საგარეო პოლიტკურ კურსს. ე.ი. არა მარტო მე ვერ გავიგე, რას ამბობს ის, არამედ პრემიერმაც ვერ გაიგო”, – განაცხადა ლევან ბერძენიშვილმა.
როგორც დეპუტატი აცხადებს, მისთვის გაუგებრია „ქართული ოცნების“ წევრების დუმილი.
„როგორც კი განცხადებები გააკეთა მეჭიაურმა, მაშინვე მივმართე საპარლამენტო ლიდერებს და ვუთხარი, რომ გაემიჯნეთ, თორემ დასავლეთიდან გვექნება პრობლემები. რაზეც, ერთ-ერთმა მიპასუხა, რომ დაბადების დღე მაქვს და ხმას ვერ ამოვიღებო. ამის შემდეგ მანანა კობახიძის განმარტება იყო, რომ რუსეთიდან მომდინარე საფრთხე არის ფაქტი – ეს არის განცხადება, რომ მეჭიაურმა რაც თქვა, არ მომწონს, მაგრამ სიმართლეა. რუსეთი, რომ საფრთხეა, ყველამ ვიცით, მაგრამ იმ დროს, როდესაც აშშ და გაერთიანებული სამეფო საქართველოში გვიგზავნიან ამდენ სამხედროს, იმ დღეებში , როდესაც ჩვენ ყველაზე დაცულები ვართ საშიში რუსეთისგან, ასეთი ტიპის განცხადება არის აშშ-ისთვის და ბრიტანეთისთვის გაწნული სილა. რასაც ამბობს მეჭიაური, სიტყვა-სიტყვით ემთხვევა ლავროვის განცხადებებს”, – განაცხადა ლევან ბერძენიშვილმა.
მისი თქმით, მეჭიაურია ისეთი ცბიერია, რომ მისი განცხადებები აშინებთ თანაგუნდელებს, ფიქრობენ, ვინმეს ხომ არ ახმოვანებსო და პასუხს ვერ სცემენ.
„არავის სჯერა, რომ მეჭიაური მეჭიაურია. ფაქტია, რომ ის ადამიანი, რომელიც ასე აზროვნებს, არ შეიძლება მეჭიაურზე ავტორიტეტული იყოს – გინდა, მის უკან იდგეს და გინდა, მის წინ. ვინც ასე ფიქრობს, რომ რუსეთს უნდა ვუთხრათ – გვაპატიე, ამერიკელებს გამარჯობა ვუთხარით, ეს არის ღალატის გზა. ამას უნდა მიეცეს შესაბამისი შეფასება და გაეცეს პასუხი. მე კმაყოფილი ვარ პრემიერ-მინისტრის განცხადებით, მაგრამ მისი თანაპარტიელებისგან ცოტა გაკვირვებული”, – განაცხადა ლევან ბერძენიშვილმა.
