საქართველოს პარლამენტს ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარეს, ეკა ბესელიას 2015 წლიდან 2016 წლის აპრილამდე საზღვარგარეთ 23 მივლინება ჰქონდა.
ამის შესახებ "გურია ნიუსის" მიერ პარლამენტიდან გამოთხოვილი ოფიციალური დოკუმენტაციიდან ირკვევა. ჯამში კი, ამ ვიზიტებისთვის 67 707 ლარი დახარჯა.
დოკუმენტის თანახმად, 2015 წელს ეკა ბესელიას 18 ოფიციალური ვიზიტი ჰქონდა საზღვარგარეთ, რისთვისაც ჯამში 55 003 ლარი დახარჯა.
ეკა ბესელია გასული წლის განმავლობაში 4-ჯერ იმყოფებოდა სტასბურგში, 5-ჯერ პარიზში, 2-ჯერ ლონდონში. ასევე, ოფიციალური ვიზიტები ჰქონდა შოტლანდიაში, ვენაში, ერევანში, ქალაქ ლიუბლიანაში.
აღსანიშნავია ის, რომ ეკა ბესელიას ვიზიტების მაქსიმალური დანახარჯი ბიუჯეტიდან 5 000 ლარს არ სცდება. 4 ვიზიტი მინიმალური თანხით არის დაფინანსებული, რომლის ხარჯიც 300-დან 700 ლარის ფარგლებში მერყეობს.
რაც შეეხება 2016 წელს, იანვრიდან აპრილამდე ეკა ბესელია საზღვარგარეთ 5 ოფიციალური ვიზიტით იმყოფებოდა, რისთვისაც ბიუჯეტიდან 12 703.88 ლარი დაიხარჯა. სამ თვეში, ჯამში, მივლინებაში 19 დღე გაატარა.
აღსანიშნავია, რომ ეკა ბესელია არის ევროკავშირის (საქართველო-ევროკავშირის საპარლამენტო ასოცირების კომიტეტის), ძირითადი შემადგენლობა – საპარლამენტო დელეგაციის წევრი; ევრონესტის (აღმოსავლეთის პარტნიორობის) საპარლამენტო ასამბლეა, ძირითადი შემადგენლობა – საპარლამენტო დელეგაციის წევრი; ევროპის საბჭოს საპარლამენტო ასამბლეა, სათადარიგო შემადგენლობა – საპარლამენტო დელეგაციის წევრი და მართლმადიდებლობის საპარლამენტთაშორისო ასამბლეა, სათადარიგო შემადგენლობა – საპარლამენტო დელეგაციის წევრი.
გარდა ამისა, ის არის შვეიცარიის, ბრაზილიის, ბელგიის, თურქეთის, ბულგარეთის, გერმანიის, დიდი ბრიტანეთისა და ირლანდიის, ესპანეთის სამეფოს, ინდოეთის რესპუბლიკის, ისრაელის, იტალიის, ლატვიის, საფრანგეთის რესპუბლიკის პარლამენტთან მეგობრობის ჯგუფის წევრი.
"გურია ნიუსი" პარლამენტის წევრებისა და პარლამენტის აპარატის თანამშრომელთა მივლინებებში დახარჯული თანხების შესახებ ინფორმაციას ეტაპობრივად შემოგთავაზებთ.
შენიშვნა: შინაარსის სანახავად დააკლიკეთ ფოტოზე
ამავე თემაზე: რა თანხები დახარჯა დავით უსუფაშვილმა საზღვარგარეთ ვიზიტებში
რა დაუჯდა ბიუჯეტს მანანა კობახიძის მივლინებები საზღვარგარეთ
53 მივლინება და დახარჯული 619 ათას ლარზე მეტი – თედო ჯაფარიძის ვიზიტები საზღვარგარეთ
