"ქართული ოცნება-დემოკრატიული საქართველოს" აღმასრულებელი მდივნის, ირაკლი კობახიძის განცხადებით პაატა ბურჭულაძე "ნაციონალური მოძრაობის" სატელიტია და ამის დასტურია ქალაქ ოზურგეთში, შუალედურ არჩევნებზე, "ნაციონალური მოძრაობისა" და "საქართველოს განვითარების ფონდის" მიერ ერთობლივი კანდიდატის წარდგენა.
"ისინი ერთობლივად გეგმავენ და აწარმოებენ წინასაარჩევნო კამპანიას ამ კანდიდატის გასაყვანად"-განმარტა ირაკლი კობახიძემ. "საქართველოს განვითარების ფონდის" ოზურგეთის რაიონული ორგანიზაციის ხელმძღვანელი ალეკო მამეშვილი ჩვენთან სატელეფონო საუბრის დროს ამბობს, რომ დამოუკიდებელ კანდიდატ გია კალანდარიშვილს დამოუკიდებლად უჭერს მხარს.
"პირველ რიგში მინდა გითხრათ, რომ გია არის დამოუკიდებელი კანდიდატი და ეს ოზურგეთში ყველამ კარგად იცის. ბატონი კობახიძის განცხადება ჩემთვის უცხო არ არის, რადგან რამდენიმე დღის წინ მსგავსი ინფორმაცია გურიის გუბერნატორის მოადგილემ სოსო ერქომაიშვილმა გაავრცელა და მე მას ვუპასუხე სოციალური ქსელით. ეს არის შავი პიარის ერთ-ერთი თემა, რომლითაც ცდილობს ხელისუფლება თავიანთი კანდიდატის მხარდასაჭერად გამოიყენოს. გია კალანდარიშვილი არის ჩემი მეგობარი. მის გვერდით არიან შეკრებილი მეგობრები, რომლებიც გვერდით ვუდგევართ ბრძოლაში გამარჯვებისთვის. აქ არაფერ შუაში არის "განვითარების ფონდი". – გვითხრა ალეკო მამეშვილმა.
"ერთიანი ნაციონალური მოძრაობის“ ოზურგეთის რაიონული ორგანიზაციის თავმჯდომარემ, დავით მჟავანაძემ ჩვენთან საუბრის დროს თქვა, რომ მას არ მოუსმენია ირაკლი კობახიძის განცხადებისთვის. "ნამდვილად არ ვიცი რა თქვა ირაკლი კობახიძემ და თუ ეს თქვა, მინდა გითხრათ, რომ ეს არის ტყუილი. ისინი დაპირებების შეუსრულებლობაში და ტყუილში შემჩნეულები არიან და არაფერი მიკვირს მათგან."– გვითხრა დავით მჟავანაძემ.
