"თავისუფალ დემოკრატებს" სოლიდარობას უცხადებენ "რესპუბლიკელები" და შაბათს დაგეგმილ აქციაში მონაწილეობისთვის ემზადებიან.
ლევან ბერძენიშვილის თქმით, ქართულმა ოცნებამ თავის საწინააღმდეგო განაჩენი მიიღო, რაც თავისუფალ დემოკრატებს კიდევ უფრო გააძლიერებს.
„ირაკლი ალასანია და მისი პარტია, პოლიტიკურად გამოვლენ უფრო მოძლიერებულები ამ ვითარებიდან, ასე რომ საკუთარი პარტიის საწინააღმდეგო გადაწყვეტილება მიიღო ქართული ოცნების მესვეურებმა. ეს მეტყველებს მათი კვალიფიკაციის დეფიციტზე,“ – განაცხადა დავით ბერძენიშვილმა.
სასამართლო გადაწყვეტილებაში პოლიტიკურ ასპექტს გამორიცხავს უმრავლესობა და აცხადებს, რომ კანონი ყველასთვის კანონია.
„პოლიტიკური მოტივით ამ თემაზე კომენტარის კეთება არასწორია. ამას პოლიტიკური მოტივი არ აქვს,“ – განაცხადა ფრაქცია ქართული ოცნების თავმჯდომარემ, გიორგი ვოლსკიმ.
ამავე საკითხთან დაკავშირებით, შეფასება გააკეთა ნაციონალური მოძრობის წევრმა, გიორგი კანდელაკმა, რომელმაც აღნიშნა, რომ ნაციონალური მოძრაობა დაკავებულებს პოლიტპატიმრებად მიიჩნევს.
„რაც დღეს მოხდა, არის კიდევ ერთი არგუმენტი იმისა, თუ რატომ არ შეიძლება ივანიშვილი დარჩეს ხელისუფლების სათავეში ოქტომბრის შემდეგ,“ – განაცხადა გიორგი კანდელაკმა.
წელიწადნახევრიანი ხმაურიანი სასამართლო განხილვა ე.წ. "კაბელების საქმეზე", რომელსაც თავიდანვე პოლიტიკური პროცესი ეწოდა, ასევე პოლიტიკური გადაწყვეტილებით, გუშინ დასრულდა. სასამართლომ ხუთივე ბრალდებულს 7-7 წლიანი პატიმრობა შეუფარდა.
წყარო: რუსთავი 2
