საქართველოს პარლამენტის უმცირესობის დეპუტატის, როლანდ ახალაიას ოჯახის საკუთრებაში სამი მიწის ნაკვეთი და ერთი საცხოვრებელი სახლია. ამის შესახებ ახალაიას ქონებრივ დეკლარაციაშია აღნიშნული, რომელიც მან 2016 წლის 16 მაისს შეავსო.
კერძოდ, დეკლარაციის მიხედვით, ახალაიას მეუღლე, ნანი გაბედავა არის ზუგდიდში, სარაჯიშვილის ქუჩაზე მდებარე 123.00 კვ.მ-ის ფართობის საცხოვრებელი სახლის და ამავე მისამართზე არსებული 410.00 კვ.მ-ის ფართობის მიწის ნაკვეთის 50%-იანი წლის მფლობელი.
როლანდ ახალაია კი ფლობს ხობში, საჯიჯაოში მდებარე 3000.00 კვ.მ-ის ფართობის მიწის ნაკვეთის 50%-იან წილს და ზუგდიდში, წერეთლის ქუჩაზე მდებარე 365.00 კვ.მ-ის ფართობის მიწის ნაკვეთის 50%-იან წილს. ორივე ნაკვეთის დარჩენილი 50%-ის მესაკუთრე მის მეუღლე ნანი გაბედავაა.
ნანი გაბედავა ასევე ფლობს 2011 წელს გამოშვებულ მსუბუქ ავტომანქანა toyota, rav 4-ს.
რაც შეეხება ოჯახის ფინანსურ მდგომარეობას, დეკლარაციის მიხედვით, ახალაიების წლიური შემოსავალი მხოლოდ როლანდ ახალაიას მიერ საქართველოს პარლამენტის წევრობიდან მიღებული 40 510 ლარი იყო.
დეკლარაციის შევსების მომენტში ახალაიას ნაღდი ფულის სახით 20 000 ლარი ჰქონდა, ხოლო მის სახელფასო ანგარიშზე „რესპუბლიკა“ ბანკში 468.50 ლარი ირიცხებოდა.
გარდა ამისა, დეკლარაციაში აღნიშნულია, რომ როლანდ ახალაიამ სასოფლო-სამეურნეო პროდუქციის რეალიზაციიდან გასულ წელს შემოსავლის სახით 4000.00 ლარი მიიღო.
რაც შეეხება როლანდ ახალაიას წინა წლების შემოსავლებს, საჯარო სამსახურის ბიუროს ვებ-გვერდზე განთავსებული ინფორმაციით, მან 2014 წელს 35064 ლარი მიიღო საქართველოს პარლამენტიდან, 2013 წელს – 36118.24 ლარი; 2012 წელს კი, – 60390 ლარი.
გაცილებით მეტი იყო ახალაიას შემოსავლები 2012 წლამდე.
კერძოდ, მის მიერ შევსებული დეკლარაციებიდან ირკვევა, რომ 2011 წელს მისი შემოსავალი სამეგრელო–ზემო სვანეთის საოლქო პროკურორის თანამდებობიდან 94560.00 ლარი იყო; 2010 წელს ამავე თანამდებობიდან 98810 ლარი აიღო; 2009 წელს კი – 93160 ლარი; 2008 წელს მისი შემოსავალი 90 860 ლარი იყო, 2007 წელს 77 790 ლარის ხელფასი და პრემია აუღია, 2006 წელს კი – 47800 ლარი.
