"ქართული ოცნება _ დემოკრატიული საქართველოს" IV ყრილობაზე პარტიის ახალარჩეულმა თავმჯდომარემ, გიორგი კვირიკაშვილმა დავალება უკვე გასცა _ "მინდა ვისარგებლო შემთხვევით და მივმართო ყრილობის დელეგატებს, საკრებულოების, "ქართული ოცნების" ფრაქციების წარმომადგენლებს: მიიღეთ ეს დავალებად _ ხვალიდანვე დაიწყეთ პირდაპირი შეხვედრები მოსახლეობასთან, კონკრეტულად განსაზღვრეთ პრობლემები ადგილებზე, რათა კიდევ უფრო ზუსტი ინფორმაცია გვქონდეს ჩვენი ხალხის საჭიროებებზე და მზად ვიყოთ რეაგირებისთვის", _ მიმართა პრემიერმა თანაგუნდელებს.
ქალაქ ოზურგეთის მუნიციპალიტეტის საკრებულოს ფრაქცია "ქართული ოცნება _ დემოკრატიული საქართველოს" თავმჯდომარემ, კახა კვაჭაძემ "გურია ნიუსთან" საუბრის დროს თქვა, რომ დეპუტატი ისედაც უნდა ინტერესდებოდეს ამომრჩევლის პრობლემებით:
"აუცილებლად გავითვალისწინებ პარტიის თავმჯდომარის დავალებას. ამ დღეებში შევადგენ გრაფიკს და აუცილებლად შევხვდები მოსახლეობას", _ გვითხრა კახა კვაჭაძემ.
"რა თქმა უნდა, ყურადსაღებია, პარტიის თავმჯდომარისა და ქვეყნის პრემიერ-მინისტრის განცხადება. ადგილობრივი თვითმმართველობა, თავისი არსით, მოსახლეობასთან ყველაზე ახლო მდგომი ხელისუფლებაა, ჩვენ რეგლამენტიც გვავალდებულებს ამომრჩევლებთან შეხვედრებს, ანგარიშვალდებულებას მათ წინაშე, რასაც სრული პასუხისმგებლობით ვეკიდებით. მოსახლეობისგან წამოსული ინიციატივების დანახვა და გახორციელება არის უმთავრესი და ამაზე ფრაქციის ყველა წევრი ვთანხმდებით", _ ამბობს ჩვენთან საუბრის დროს ოზურგეთის მუნიციპალიტეტის საკრებულოს წევრი და ფრაქცია "ქართული ოცნება – დემოკრატიული საქართველოს" თავმჯდომარე გოჩა კილაძე.
მისივე თქმით, "ოზურგეთის მუნიციპალიტეტის საკრებულომ, მოქალაქეებთან უფრო მჭიდრო კომუნიკაციის მიზნით, ახალი ინოვაციური პროექტების გახორციელებაც დაიწყო, მათ შორის _ პირდაპირი ეთერი საკრებულოს სხდომიდან, საზოგადოებრივი ჩართულობის ცენტრები, ონლაინ გამოკითხვა სოფლის პრობლემების შესახებ:
"ჩვენი ვალდებულებაა შევხვდეთ მოქალაქეებს, ადგილზე გავეცნოთ სოფლის პრობლემებს და მოვუსმინოთ მათ, ფრაქციის წარმომადგენლებისა და განსაკუთრებით, სოფლის მაჟორიტარების საქმიანობის ძირითადი მიმართულება არის და სამომავლოდაც ასე გაგრძელდება, მით უმეტეს, როცა ასეთ კონკრეტული მითითება პარტიის ლიდერის განცხადებაშიც გაჟღერდა", _ გვითხრა გოჩა კილაძემ.
"მოსახლეობასთან შეხვედრა ყოველდღიურად მაქვს, ეს გახლავთ, როგორც მოქალაქეთა მიღება, ასევე, ადგილზე შეხვედრები ჩვენს მოქალაქეებთან", _ ამბობს ჩვენთან საუბრის დროს ქალაქ ოზურგეთის მერი ბეგლარ სიორიძე.
მისივე თქმით, ძირითადი პრობლემები, რომლებიც მათთან შეხვედრისას გამოიკვეთება ხოლმე, ინფრასტრუქტურა, სოციალური სფერო და დასაქმებაა:
"დასაქმების საკითხი პრობლემაა მთელი ქვეყნის მასშტაბით და, სამწუხაროდ, ქალაქის ბიუჯეტი ამ პრობლემის მოსაგვარებლად საკმარისი ნამდვილად არ არის. თუმცა, თანხას, რომლის მობილიზაციასაც ვაკეთებთ, ზუსტად და მიზნობრივად ვიყენებთ სხვა აქტუალური მიმართულებებით. ინფრასტრუქტურა ჩვენი პრიორიტეტია და ქალაქის მერია ამ კუთხით ძალიან აქტიურად მუშაობს. ამის შედეგი თვალსაჩინოა და მოსახლეობა ამას ხედავს. იგივე მოცემულობა გვაქვს სოციალურ სფეროში, გვაქვს 18 სოციალური პროგრამა, რომლის ფარგლებშიც, შეჭირვებულ მოქალაქეებს მუდმივად ვუწევთ დახმარებას. არ ყოფილა არცერთი მოქალაქის განცხადება, რომელიც არ დაკმაყოფილებულა. ყველა განცხადება, რომელიც პროგრამულად საჭირო კრიტერიუმებში ჯდება, კმაყოფილდება", _ თქვა ბეგლარ სიორიძემ.
"ქართული ოცნების ყრილობა რომ უღიმღამო იყო, ყველამ ვნახეთ, თუმცა, განსაკუთრებულად რასაც გამოვყოფდი, ესაა დავალება, რომელიც ბატონმა კვირიკაშვილმა დაავალა საკრებულოების ფრაქციის თავმჯდომარეებს _ "დღესვე გადით ხალხში და ადგილებზე შეხვდით მოსახლეობას!"
მთელი 4 წელი კაბინეტებიდან არ გამოსულხართ და ხალხი მართლა ისეთი გულმავიწყი გგონიათ, რომ დაივიწყებენ განვლილ 4 წელიწადს, იმასაც, რომ ამ ოთხი წლის განმავლობაში მათი ამბავი არ უკითხავს არავის და ღმრთის ანაბარად მიტოვებულები ამაოდ ელოდნენ ხელისუფლებისგან დახმარებას?! რომ გავიდნენ და შეხვდნენ, რა უნდა უთხრათ ხალხს? რომ უკეთესი მეოთხე წელი მხოლოდ თქვენს კეთილდღეობას გულისხმობდა? როგორ რა ნამუსით უნდა შეხედოთ თქვენგან მოტყუებულ გაჭირვებულ ხალხს თვალებში, რას დაპირდებით, რომ დაივიწყონ განვლილი წლები და მომდევნო 4 წელი ისევ პირში ოცნებაგამოვლებულებმა უყურონ, როგორ ივსებთ ჯიბეებს და იწყობთ საკუთარ კეთილდღეობას?" _ ამბობს "ლეობორისტული პარტიის" ერთ-ერთი ლიდერი ნათია შარაშენიძე.
