ბრიფინგის დასრულების შემდეგ, ივანიშვილმა ჟურნალისტებს მიმართა, კითხვები თუ გაქვთ, მზად ვარო.
პირველი კითხვა “რეალ ტვ”-ის იმ ჟურნალისტს აღმოაჩნდა, რომელმაც ივანიშვილი მოსყიდვაში დაადანაშაულა. ჟურნალისტ თორნიკე კოშკაძის მცდელობა უშედეგოდ დასრულდა _ მას ივანიშვილმა კითხვა გააწყვეტინა.
ივანიშვილი: _ თქვენ როცა შეძლებთ ბოდიშის მოხდას, მე სიამოვნებით დაველოდები ამას. თქვენ თუ შეძლებთ, მე ბედნიერ ვიქნები.
კოშკაძე: _ რასთან დაკავშირებით?
ივანიშვილი: _ ასეთი მტკიცე სიცრუისთვის, რაც თქვენ იკადრეთ. ყოველ შემთხვევაში, თქვენს შეკითხვას მე არ ვუპასუხებ და დაწყნარდით.
კოშკაძე: _ თქვენ ჩემს კი არა, ჩემი ტელეკომპანიის შეკითხვებს არ უპასუხებთ.
ივანიშვილი: _ პირადად თქვენს შეკითხვას არ ვუპასუხებ. სხვათაშორის, თქვენი ტელეკომპანია თქვენს სახეს კარგად აჩვენებს. მაგრამ, დღესდღეობით არ მინდა თქვენს ტელეკომპანიასთან თანამშრომლობაზე ვთქვა უარი, თუმცა, ამის საფუძველი უამრავია. მე გავაგრძელებ თქვენს ტელეკომპანიასთან თანამშრომლობას და ვუპასუხებ მის შეკითხვებს. მაგრამ თქვენს შეკითხვას არასდროს ვუპასუხებ, სანამ თქვენ არ მოახერხებთ და ბოდიშს არ მოიხდით.
კოშკაძე: _ მე ბოდიშს არ მოვიხდი!.
ამის შემდეგ, ივანიშვილმა კოშკაძეს ბრიფინგის მსვლელობისას ზრდილობისკენ მოუწოდა, რომელიც უშედეგოდ ცდილობდა კითხვის დასმას. ყველა მცდელობის დროს, ივანიშვილი პასუხობდა: “ზრდილობა იხმარეთ, თქვენს კითხვებს მე არ ვპასუხობ!”.
ჟურნალისტმა კოალიციის ლიდერს მოულოდნელად, ბოდიში მოუხადა და უთხრა: “უკაცრავად, მოგიხადეთ ბოდიში… თუ შეიძლება…”, თუმცა, ივანიშვილმა მას გააწყვეტინა: “არა, მე არ უნდა მომიხადოთ ბოდიში. თქვენ უნდა მოიხადოთ ბოდიში თქვენი სიცრუისთვის, თქვენ თუ სიცრუისთვის ბოდიშს იხდით, მე სიამოვნებით გავაგრძელებ თქვენთან…”, რაზედაც ჟურნალისტმა უპასუხა: “ცხოვრებაში მე ტყუილი არ მითქვამს”.
“ახლა ვისარგებლებ და გავიმეორებ იმას, რაც სამების ტაძარში განვაცხადე: შუბლის ძარღვი რომ გაგიწყდება, იმის აღდგენა არც ისე იოლია, მაგრამ თქვენ ხართ ახალგაზრდა, თქვენ თუ მოახერხებთ ამის აღდგენას, მე დაგეხმარებით და ძალიან ბედნიერი ვიქნები. სანამ თქვენ არ აღიარებთ, რომ იცრუეთ, კითხვაზე არ გიპასუხებთ” – უპასუხა ივანიშვილმა ჟურნალისტს.
