2016 წლის 16 მაისს, ოზურგეთის მუნიციპალიტეტის სოფელ გურიანთაში კრება უნდა ჩატარებულიყო, სადაც განხილული იქნებოდა მუზეუმის მიმდებარე ტერიტორიაზე 297 კვ.მ. მიწის ნაკვეთის გასხვისების საკითხი. რადგან კრებაზე 10 ადამიანი გამოცხადდა, საკითხი არ განხილულა.
საქმე იმაშია, რომ ოზურგეთელმა ინდმეწარმემ სიკო მეხუზლამ, სოფელ გურიანთაში, 30-წლიანი იჯარით აიღო მუზეუმის შენობის პირველი სართული, 650 კვ.მ. არასასოფლო-სამეურნეო მიწასთან ერთად. პირველ სართულზე მეხუზლამ საბანკეტო დარბაზი გააკეთა. როგორც სხდომაზე გაირკვა, მას სურს იმ შენობის მდებარე 297 კვ.მ. მიწის ნაკვეთი იყიდოს, სადაც უნდა მოაწყოს სველი წერტილები და დარბაზისთვის საჭირო ნაგებობები.
ოზურგეთის მუნიციპალიტეტის საკრებულოს კომისიის სხდომაზე ეს საკითხი ორჯერ ჩავარდა. ერთ-ერთ სხდომაზე მიიღეს გადაწყვეტილება, რომ ოზურგეთის მუნიციპალიტეტის გამგებლის წარმომადგენელმა გურიანთის ადმინისტრაციულ ერთეულში, კონსტანტინე ჩიკაშუამ უახლოეს ხანში უზრუნველყოს გურიანთაში მდებარე ზემოთ აღნიშნული ობიექტების პრივატიზების თაობაზე, მოსახლეობის კრების ჩატარება და კომისიისათვის მის შედეგებზე ინფორმაციის მოწოდება.
"აქტიურობა დაბალია. სოფლის კრებაზე ბევრად უფრო მეტი ხალხი მოვიდა. ჩვენ გამოვაკარით განცხადება, თან პენსიის დღე იყო და ვიცი, რომ ბევრმა წაიკითხა ეს განცხადება", _ გვითხრა კონსტანტინე ჩიკაშუამ.
"არაფერს ვითხოვთ ისეთს, რომ ასე გაიწელა ეს პროცესი. ჩვენ ეს ფული ვინმემ კი არ გვაჩუქა. საქმეა გასაკეთებელი, დრო კი არ იცდის. ვერ გავიგეთ, რატომ არ გადის ეს საკითხი ოზურგეთის მუნიციპალიტეტის საკრებულოს სხდომაზე. უბრალოდ, გვინდა, იქ, სადაც საბანკეტო დარბაზია, გავაკეთოთ საპირფარეშო. რატომ არ უნდა შეგვიწყონ ხელი? ამ საქმეში ხელს გვიშლის საკრებულოს დეპუტატი ბონდო ღლონტი", _ გვითხრა სიკო მეხუზლას ახლო ნათესავმა ელიკო გურულმა.
გურიანთელი მარიამ კალანდაძე ამბობს, რომ ეს საბანკეტო დარბაზი სოფლისთვისაა გაკეთებული: "გურიანთისთვის კარგი საქმე კეთდება და რატომ უნდა შევუშალოთ ხელი? თან გურიანთელები დასაქმდებიან ამ საბანკეტო დარბაზში და ნამდვილად გვიკვირს, რატომ გვიშლიან ხელს", _ თქვა ჩვენთან საუბრის დროს მარიამ კალანდაძემ.
ოზურგეთის მუნიციპალიტეტის საკრებულოს წევრი ბონდო ღლონტი ამბობს, რომ ის არავისთანაა დაპირისპირებული: "პიროვნება აქ არაფერ შუაშია და არც არავის ვუპირისპირდები. სოფლის ცენტრს მოფრთხილება უნდა და არა _ გაყიდვა. სხვასაც რომ შემოეტანა განცხადება ამ ადგილის ყიდვასთან დაკავშირებით, მაშინაც ასეთი რეაქცია მექნებოდა.
ჩემი პოზიცია უცვლელია _ მე ვარ გურიანთის დეპუტატი და ამირჩია ხალხმა. ვიდრე დეპუტატი გავხდებოდი, ვესაუბრე მოსახლეობას და ჩემი პოზიცია იყო ასეთი _ ტერიტორიის იჯარით გაცემის ან გაყიდვის შესახებ უნდა იცოდეს სოფლის თითოეულმა მცხოვრებმა. მე გაყიდვის წინააღმდეგი ვარ _ ჩუმად არაფერი უნდა გაკეთდეს და ეს არც მოხდება, სანამ მე ვარ დეპუტატი," _ გვითხრა ბონდო ღლონტმა.
ოზურგეთის მუნიციპალიტეტის საკრებულოს აგრარულ საკითხთა, ქონების მართვისა და ბუნებრივი რესურსების საკითხების კომისიის თავმჯდომარემ დავით ჭაკნელიძემ "გურია ნიუსთან" საუბრისას თქვა, რომ გურიანთის ცენტრში 297 კვ.მ. მიწის ნაკვეთი აუქციონზე არ გავა: "კომისიის სხდომაზე სოფლის დეპუტატმა ბონდო ღლონტმა გააჟღერა მოსახლეობის აზრი, რომ სოფლის ცენტრში მიწის ნაკვეთის აუქციონზე გატანა მათთვის არის მიუღებელი. რადგან სოფლის კრებაზე გამოცხადდა 6 ადამიანი, აქედან გამომდინარე, ეს საკითხი დარჩა განხილვის გარეშე", _ გვითხრა სატელეფონო საუბრის დროს დავით ჭაკნელიძემ.
"ჩემი საქმის წამოწყების წინააღმდეგი რომ ყოფილიყო მოსახლეობა, აუცილებლად დააფიქსირებდა საკუთარ აზრს. კომისიის სხდომაზე სოფლის დეპუტატმა, ბონდო ღლონტმა თქვა, რომ სოფელი ამ ტერიტორიის გაყიდვის წინააღმდეგია. წინააღმდეგი რომ ყოფილიყვნენ, კრებაზე მოვიდოდნენ და გამოხატავდნენ უარყოფით დამოკიდებულებას ამ საკითხის მიმართ", _ გვითხრა ინდმეწარმე სიკო მეხუზლამ.
"საქართველოს დემოკრატიული განვითარების კავშირის" იურისტის, ირაკლი პაპავას თქმით, მოქმედი კანონმდებლობის თანახმად, მუნიციპალიტეტის გამგებლის წარდგინებით, მუნიციპალიტეტის ქონების საპრივატიზაციო ობიექტების ნუსხის დამტკიცება საკრებულოს უფლებამოსილებას წარმოადგენს, რომელიც შემოსული საკითხის წინასწარ მომზადებასა და განხილვას შესაბამისი პროფილის მუდმივმოქმედი კომისიის (მოცემულ კონკრეტულ შემთხვევაში, საკრებულოს აგრარულ საკითხთა, ქონების მართვისა და ბუნებრივი რესურსების საკითხების კომისიის) მეშვეობით უზრუნველყოფს. ბუნებრივია, საკრებულოს კომისიას უფლება აქვს, განიხილოს და მხარი დაუჭიროს ან არ დაუჭიროს მუნიციპალიტეტის საკუთრებაში არსებული ამა თუ იმ ქონების შეტანას საპრივატიზაციო ობიექტების ნუსხაში:
"ახლა კი უშუალოდ ოზურგეთის მუნიციპალიტეტის გურიანთის ადმინისტრაციულ ერთეულში ადმინისტრაციულ შენობასთან არსებული 279 კვ.მ. არასასოფლო-სამეურნეო მიწის ნაკვეთის საპრივატიზაციო ობიექტების ნუსხაში შეტანის საკითხის განხილვასთან დაკავშირებული შემთხვევის შესახებ, რომელიც საკრებულოს აგრარულ საკითხთა კომისიამ 2016 წლის 25 მარტის სხდომაზე განიხილა _ როგორც კომისიის სხდომის ოფიციალური ოქმიდან (ოქმი №7) ირკვევა, კომისიამ მხედველობაში მიიღო სოფელ გურიანთის მაჟორიტარი დეპუტატის მიერ გაკეთებული განცხადება, რომ მოსახლეობა წინააღმდეგია ზემოაღნიშნული 279 კვ.მ. არასასოფლო-სამეურნეო მიწის ნაკვეთის გაყიდვის და, შესაბამისად, მხარი დაუჭირა ამ მიწის ნაკვეთის ამოღებას საპრივატიზაციო ობიექტების ნუსხიდან; ამასთან, კომისიისვე გადაწყვეტილებით, გურიანთის ადმინისტრაციულ ერთეულში ოზურგეთის მუნიციპალიტეტის გამგებლის წარმომადგენელს დაევალა, უზრუნველეყო სოფელ გურიანთაში მდებარე ხსენებული ობიექტის პრივატიზების თაობაზე მოსახლეობის კრების ჩატარება და კომისიისათვის მისი შედეგების შესახებ ინფორმაციის მიწოდება", _ თქვა ირაკლი პაპავამ.
მისივე თქმით, სავარაუდოდ, აქ ე. წ. სოფლის მოსახლეობის "მარტივი ტიპის" კრების ჩატარებაზე იყო საუბარი და არა ადგილობრივი თვითმმართველობის კოდექსით გათვალისწინებული დასახლების საერთო კრების ორგანიზებაზე:
"ასეთი ვარაუდის დაშვების შესაძლებლობას რამდენიმე გარემოება იძლევა: ჯერ ერთი, კანონის მიხედვით, დასახლების საერთო კრების მოწვევა საკმაოზე მეტად ფორმალიზებული და გართულებული, ამასთან, დროში გაწელილი პროცესია; მერე მეორე, ადგილობრივი ხელისუფლების მხრიდან მისი მოწვევის ინიცირების უფლება მხოლოდ მუნიციპალიტეტის გამგებელს აქვს _ ან საკუთარი ინიციატივით, ან კიდევ საკრებულოს შუამდგომლობით, – ისე, რომ აქ საკრებულოს კომისია არაფერ შუაშია; და ბოლოს, სოფლის მოსახლეობის კრების შესახებ სოფლის ცენტრში განთავსებული / გამოკრული ინფორმაცია (იგი ასეთი შინაარსისა იყო: "2016 წლის 16 მაისს, 15 საათზე, ჩატარდება კრება, მუზეუმის მიმდებარე ტერიტორიის გასხვისების თაობაზე. გთხოვთ მობრძანდეთ, რათა გამოხატოთ თქვენი აზრი აღნიშნულის თაობაზე") ნათლად მიუთითებდა, რომ ეს ე.წ. "მარტივი ტიპის" კრება უნდა ყოფილიყო და არა თვითმმართველობის კოდექსით გათვალისწინებული დასახლების საერთო კრება. შესაბამისად, ასეთ შემთხვევაში კრების ლეგიტიმურობისთვის დამსწრეთა არანაირი რაოდენობრივი ბარიერი არ არის დადგენილი.
ის ფაქტი, რომ მოსახლეობა კრებაზე არ გამოცხადდა, ეს ორ რამეზე შეიძლება მიუთითებდეს: ან კრების ორგანიზების მხრივ იყო პრობლემები (თუმცა, როგორც ირკვევა, სათანადო ინფორმაცია წინასწარ იყო გამოკრული და ნებისმიერი დაინტერესებული პირისთვის ხელმისაწვდომი იყო), ან კიდევ მოსახლეობას არ აინტერესებს კრების დღის წესრიგში შეტანილი საკითხი (არადა, ამ დროს, თუ ის, მართლაც, რეალურად წინააღმდეგია სოფლის ცენტრში, ადმინისტრაციულ შენობასთან მდებარე ზემოაღნიშნული ობიექტის _ არასასოფლო-სამეურნეო მიწის ნაკვეთის, გაყიდვისა, მისი აქტიურობა კრებაზე დასასწრებად, ყველანაირი ლოგიკის თანახმად, მაღალი უნდა ყოფილიყო). მსგავსი სიტუაციის ფონზე, ალბათ, მიზანშეწონილი იქნება, თუკი სოფლის მოსახლეობის კრების ჩატარების ვალდებულება დღის წესრიგიდან მოხსნილად ჩაითვლება.
შესაბამისად, თუკი ოზურგეთის მუნიციპალიტეტის აღმასრულებელი რგოლი ისევ მიზანშეწონილად ჩათვლის გურიანთის ადმინისტრაციულ ერთეულში ადმინისტრაციულ შენობასთან მდებარე 279 კვ.მ. არასასოფლო-სამეურნეო მიწის ნაკვეთის საპრივატიზაციო ობიექტების ნუსხაში შეტანას, მას უპრობლემოდ შეუძლია ეს თავიდან გააკეთოს და ხელახლა წარუდგინოს საკრებულოს დასამტკიცებლად. ასეთ შემთხვევაში, საკრებულომ საერთო წესით უნდა უზრუნველყოს მისი კვლავ განხილვა და გადაწყვეტა", _ გვითხრა იურისტმა ირაკლი პაპავამ.
