არსებობს ორგანიზაციები, რომლებიც ემიგრანტების პრობლემებზე მუშაობს და მუდმივი კონტაქტი აქვს მათთან. ერთ ერთი მათგანი საერთაშორისო, არასამთავრობო ორგანიზაცია „ ქართველი ემიგრანტებია”.
“გურია ნიუსის” ამჟამად თავადაც ემიგრაციაში მყოფ და ამ ორგანიზაციის დამფუძნებელს ზვიად ყუშიტაშვილს ესაუბრება.
_ ბატონო ზვიად, საქართველოში საარჩევნო კამპანია დღითიდღე უფრო აზარტულ ფაზაში შედის. როგორია ემიგრანტების დამოკიდებულება მიმდინარე პროცესებთან დაკავშირებით?
_ ემიგრანტებთან ხშირი ურთიერთობა მაქვს და მათი პოლიტიკური სიმპათიებიც ვიცი, მაგრამ, ამ ეტაპზე, ამ თემაზე საუბარი ჩემი მხრიდან არაკორექტული იქნება. ჯერ არჩევნებამდე კიდევ რამდენიმე თვეა დარჩენილი და შესაძლოა, აზრი ემიგრაციამაც შეიცვალოს. ერთადერთი, რისი თქმაც შემიძლია, ის არის, რომ არც ერთი ემიგრანტის ხმა სააკაშვილის ანგარიშზე აღარ წავა. ჩვენ ყველანი მოხარულები ვართ, რომ საქართველოში ხალხი კვლავ ერთდ დადგა.
_ ხშირად მიმდინარეობს საუბარი ემიგრანტების საარჩევნო ხმებთან დაკავშირებით…
_ ემიგრანტების ხმები ყოველთვის იკარგებოდა. ხელისუფლება პასპორტის მონაცემებითა და სხვა საშუალებებით მუდმივად აყალბებდა და სათავისოდ იყენებდა ამ ხმებს. თუმცა, ამჯერად ასე აღარ მოხდება.
_ რატომ? რა გაძლევთ ამ განცხადების გაკეთების საფუძველს?
_ დღევანდელი ხელისუფლება არავის მოსწონს. ყველას ერთი სურვილი გვამოძრავებს _ არ გვინდა, რომ არჩევნები ემიგრანტების გარეშე ჩატარდეს. ჩვენი ხმების გაყალბების საშუალებას აღარავის მივცემთ. ამიტომაც მოვითხოვთ არჩევნებში მონაწილეობის უფლებას.
_ რამდენად შესაძლებელია თქვენი მოთხოვნის გახორციელება? პროცედურულ საკითხებს ვგულისხმობ.
_ შედარებით რთული პროცესი იქნება, მაგრამ შესრულებადი. მარტივ რამეს ვითხოვთ _ დაიდგას საარჩევნო ყუთები და ევროკავშირის დამკვირვებლები ჩვენთანაც ჩამოვიდნენ, რათა მიაქციონ ყურადღება მიმდინარე საარჩევნო პროცესს. ემიგრაციაც ჩვეულებრივად შეძლებს საკუთარი არჩევანის გაკეთებას.
_ უფრო კონკრეტულად რომ გვითხრათ, რას აპირებთ?
_ ჩვენ მუდმივად ვკონტაქტობთ სხვადასხვა ქვეყანაში მყოფ ქართველობასთან და ყველა ერთ აზრზეა, ისინი გამოვლენ და დააფიქსირებენ საკუთარ არჩევანს. ესპანეთიდან 700-800 კაცს ველოდებით. ასევე ძალიან აქტიურობს საფრანგეთი, იტალია, რუსეთი, საბერძნეთი და ა.შ. ამ აქციებს ადგილობრივი მედია გააშუქებს და პროცესში არასამთავრობოები ჩაერთვებიან. მოკლედ რომ გითხრათ, ევროპის ძალიან ბევრ ქვეყანაში ვგეგმავთ ერთმანეთის მიყოლებით საპროტესტო აქციების გამართვას.
_ რა მოთხოვნების წაყენებას აპირებთ?
_ მოთხოვნა ერთადერთია: მოგვცენ არჩევნებში მონაწილეობის უფლება‼! საქართველოში არსებული სიტუაციიდან გამომდინარე, ჩვენ ვაპირებთ, რომ მიშას მთავარ სლოგანს _ „საქართველო ქართველების გარეშე” დავუპირისპირდეთ. დღეს 2 მილიონზე მეტი მოქალაქეა უკვე წამოსული საქართველოდან, ამიტომაც თუ ემიგრანტებმა არ ამოიღეს ხმა, ისე საქართველოს არაფერი ეშველება. ჩვენ გავაკეთებთ გასაკეთებელს. ჩვენ მზად ვართ აქციებისთვის და მიტინგებისთვის.
იმდენად დაიღალა ემიგრაცია, რომ არაფრის შიში აღარ აქვთ, არც დეპორტაციის, მათ შორის. ყელში აქვთ ხალხს ამოსული ევროპაც, რუსეთიც და ამერიკაც. აღარ შეუძლიათ ასე ცხოვრება _ სამშობლო ენატრებათ, ოცნებობენ სამშობლოში დაბრუნებაზე, მაგრამ სააკაშვილის ხელისუფლების პირობებში ვერ ახერხებენ. ერთადერთი ნატვრა დაგვრჩა _ გვინდა, რომ საკუთარ ხალხზე მზრუნველი მთავრობა მოვიდეს ქვეყნის სათავეში.
_ დეპორტაცია სერიოზული შემაფერხებელი ფაქტორი იქნება…
_ ალბათ, ახსოვს საზოგადოებას, რომ ჩვენი ორგანიზაცია, სექტემბერში ევროპის მასშტაბით აქციების ჩატარებას გეგმავდა. მაშინ მივწერეთ ადგილობრივ ხელისუფლებებს და გვიპასუხეს, რომ ყველა ქვეყნის მოქალაქეს აქვს თავისი პოზიციის დაფიქსირების უფლება, რა თქმა უნდა, მშვიდობიანი პროტესტის ფარგლებში. ამიტომ არავის არ უნდა ჰქონდეს იმის შიში, რომ ევროპაში თუ პროტესტს გამოთქვამს დაიჭერენ და გამოადეპორტებენ.
_ რატომ გაქვთ იმედი, რომ თქვენი აქციები რაიმე შედეგს გამოიღებს? ხშირ შემთხვევაში ქვეყნის შიგნით ჩატარებულ მიტინგებს არ მოჰყვება სასურველი შედეგი, მით უმეტეს ქვეყნის ფარგლებს გარეთ…
_ არც ერთ ევროპულ ქვეყანას არ “აწყობს”, რომ სხვა ქვეყნის მოქალაქეებმა მის ქვეყანაში აქციები ატარონ. ამიტომაც ევროპა ზეწოლას მოახდენს საქართველოს ხელისუფლებაზე, რომ ჩვენი მოთხოვნები დაკმაყოფილდეს.
_ ჩვენი საუბრის დასასრულს, რაიმე კომენტარის გაკეთებას ხომ არ ისურვებდით? იქნებ არსებობს თემა, რომელსაც არ შევეხეთ?
_ ჩვენ ჩვენს ქვეყანაში დაბრუნება და ნორმალურ პირობებში ცხოვრება გვინდა. სააკაშვილი ხშირად იმეორებს _ ემიგრაცია გაბრწყინებულ საქართველოში ბრუნდებაო, თუმცა ის იტყუება _ ჩვენ, ჩვენი აქციებით, სააკაშვილის ტყუილების დემონსტრირების ცოცხალი მაგალითები გავხდებით.
