საქართველოს ქალაქებში, ზუგდიდის გარდა, ქვეყნის დამოუკიდებლობის 25-ე წლისთავი საზეიმო ღონისძიებებით აღინიშნა.
როგორც ცნობილია, ზუგდიდში დაგეგმილი ღონისძიებები 19 მაისს, საოკუპაციო ხაზთან მომხდარი გიგა ოთხოზორიას მკვლელობის გამო გაუქმდა.
"გურია ნიუსი" დაინტერესდა რა იცის მოსახლეობამ 26 მაისის შესახებ და რას ფიქრობენ საქართველოს დედაქალაქის ერთ-ერთ ცენტრალურ ქუჩაზე, რუსთაველის გამზირზე გამართულ საზეიმო ღონისძიებებთან დაკავშირებით, რის გასარკვევადაც, ღონისძიებებზე მოსული მოქალაქეების ნაწილი გამოიკითხა.
ნათელა ოციშვილის თქმით, საზეიმო ღონისძიებების გამართვას დიდი მნიშვნელობა აქვს.
"26 მაისი საქართველოს დამოუკიდებლობის დღეა და, შესაბამისად, ძალიან დიდი მნიშვნელობა აქვს საზეიმო ღონისძიებების გამართვას",_ თქვა ოციშვილმა.
გიორგი ტყეშელაური კი მიიჩნევს, რომ საქართველო რეალურად თავისუფალი არ არის და 26 მაისის აღნიშვნა მოსახლეობას მხოლოდ ახსენებს, რომ დამოუკიდებლობა არსებობს.
"26 მაისი ყოველთვის მნიშვნელოვანი იყო, არის და დარჩება, აუცილებელია თითოეული მოქალაქისთვის, რომ წელიწადში ერთხელ მაინც იგრძნონ და გაიხსენონ, რომ დამოუკიდებელნი არიან. მიმაჩნია, რომ რეალურად, საქართველო დამოუკიდებელი ქვეყანა არ არის. მას ამერიკა და რუსეთი შუაზე იყოფენ, რაც პოლიტიკოსებმა გარკვეული ქმედებით უნდა შეაჩერონ ისე, რომ არც მწვადი დაწვან და არც შამფური",_ ამბობს ტყეშელაური.
თამარ ხურცელიძე კი "გურია ნიუსთან" საუბრისას ამბობს, რომ დამოუკიდებლობას განსაკუთრებული ფასი აქვს და როგორმე წინაპრების იმედები უნდა გამართლდეს.
"26 მაისი ყველა ქართველისთვის, ყველა ახალგაზრდასთვის ძალიან მნიშვნელოვანი დღეა. ეს არის დღე, რომლის შენარჩუნებასაც უნდა ვეცადოთ და როგორმე გავამართლოთ ის იმედები, რაც ჩვენს წინაპრებს დამოუკიდებლობის მოსაპოვებელი ომის დროს ჰქონდათ, რადგან დამოუკიდებლობას თავისი ფასი აქვს", _ ამბობს ხურცელიძე.
ირაკლი სახიაშვილის აზრით, საზეიმო ღონისძიებების გარდა აღლუმიც უნდა ტარდებოდეს.
"დღეს საქართველოს დამოუკიდებლობის 25-ე წლისთავს ვზეიმობთ, რისი მოპოვებაც ჩვენს სახელმწიფოს სისხლის ფასად დაუჯდა, მაგრამ, სამწუხაროა, რომ ბრძოლა ქვეყნის დამოუკიდებლობისა და თავისუფლებისთვის რეალურად ჯერ არ დასრულებულა, მინდა აღვნიშნო, რომ საზეიმო ღონისძიებების გამართვა კარგია, მაგრამ კონცერტებთან ერთად აღლუმიც თუ ჩატარდება და მოსისხლე მტრები ჩვენს ძალას დაინახავენ უკეთესი იქნება",_ თქვა სახიაშვილმა.
ქეთევან თოფურია კი ამბობს, რომ დღეს დამოუკიდებლობის დღეა, მაგრამ საზეიმო განწყობა არ აქვს.
"დღეს საქართველოსთვის უმნიშვნელოვანესი დღეა, ზეიმის გამართვაც კარგია, მაგრამ სამწუხაროდ, საზეიმო განწყობა არ მაქვს. რადგან მთავრობას პენსიონერები არ ახსოვს და მარტო თავიანთი ჯიბეების გასქელებაზე ფიქრობენ. პენსიას ერთი ხელით გვაძლევენ, ხოლო მეორეთი გვართმევენ", _ამბობს თოფურია.
