ახლა თოვლია… თოვლი იყო მაშინაც, როცა ქვეყნის პირველი პირი პირობას დებდა, რომ განახლებულ სეზონზე, ბახმაროს დამსვენებელს ახალი კონოთეატრი, სუპერმარკეტი, აფთიაქი, განახლებული სტადიონი, სასტუმრო და მოწესრიგებული ინფრასტრუქტურა დახვდებოდა.
ბახმარო ზღვის დონიდან 2050 მეტრზე მდებარეობს. უნიკალური ჰავით ცნობილი კურორტით წლების განმავლობაში ხელისუფლება არ დაინტერესებულა. თანამდებობის პირების ინტერესში კურორტი მას შემდეგ მოხვდა, რაც გაირკვა რომ ჩოხატაურის მუნიციპალიტეტის საკრებულოს ლეგალიზაციის კომისიის თავმჯდომარემ და ფრაქცია ნაციონალების ლიდერმა შოთა სირაძემ, ბახმაროში 300-ზე მეტი მიწის საკუთრების მოწმობა გასცა. გამოძიების მტკიცებით, სირაძემ, რომელიც ახლა მიმალვაშია, დოკუმენტაცია გააყალბა. თუმცა, მთავარ კითხვას _ როგორ დაარეგისტრირა საჯარო რეესტრმა ასობით ყალბი დოკუმენტი, პასუხი დღემდე არ გასცემია. ამ საქმეში კიდევ ბევრი კითხვაა, რომელზედაც პასუხის მიღებას სამი წელია, ამაოდ ცდილობს საზოგადოება. მათ შორის ის ადამიანები, რომლებსაც ჯერ მიწები დაუკანონეს, შემდეგ კი წაართვეს, თანაც ერთ კვირაში. საჯარო რეესტრს, 2011 წლის დეკემბერში, მხოლოდ ერთი კვირის განმავლობაში 79 ადამიანმა მიმართა მიწის და ზედ დამაგრებული ქონების მიტოვების მოთხოვნით.
უნდა ითქვას ისიც, რომ ამ ადამიანებს შორის ბევრი ყოფილი და ბევრიც ახლანდელი ჩინოსანია _ სწორედ მათი სახლების ასაშენებლად განადგურდა ბახმაროში რეკრეაციული ზონა.
დღეს ეს ადამიანები კამერასთან საუბარს გაურბიან, კამერის მიღმა კი აღნიშნავენ, რომ ყალბი დოკუმენტები და მხოლოდ ერთი დამნაშავე ხელისუფლებამ პიარისთვის გამოიყენა. ამბობენ იმასაც, რომ ამ ყველაფრის უკან არაბი ინვესტორები დგანან, რომელთაც ხელისუფლება კურორტს მალე გადაულოცავს. თუმცა, ეს ინფორმაცია საჯაროდ არ ხმაურდება. საზოგადოების ფართო მასებისთვის ცნობილია მხოლოდ ის, რომ ბახმაროში ინფრასტრუქტურის განვითარება მიმდინარეობს, თანაც, დიდი ხანია…
პრეზიდენტის, ეკონომიკისა და ინფრასტრუქტურის მინისტრების ბახმაროში სტუმრობის შემდეგ, ნაციონალური არხებით ბახმაროს განვითარების შესახებ რამდენიმე სიუჟეტი გავიდა.
“რუსთავი2”-ის მტკიცებით, ბახმაროში სამშენებლო პროცესი უკვე დაწყებულია და სეზონზე ასულ დამსვენებელს, კურორტი განახლებული სახით უმასპინძლებს. იგივეს ამბობდა ტელეკომპანია “იმედი”, რომლის ეთერში გასულ სიუჟეტში ნათქვამი იყო, რომ სამუშაოები, რომელიც გასული წლის ოქტომბერში დაიწყო, ზაფხულში დასრულდებოდა, ხოლო შემდეგ ხელისუფლება ბახმაროს ზამთრის კურორტად გამოყენებაზე ზრუნავს დაიწყებდა.
ეს ინფორმაცია რომ სიმართლეს არ შეესაბამება, კარგად იციან იმ ადამიანებმა, რომლებსაც ბახმაროს მთებში საქონელი ყოველ გაზაფხულზე მოჰყავთ. მათ ისიც იციან, რომ შემოდგმის მიწურულს და ადრიან გაზაფხულზე, კურორტზე, სადაც თოვლის საფარი ხშირად 5 მეტრს აღემატება, სამშენებლო სამუშაოების შესრულება შეუძლებელია: _ გამორიცხულია აქ მარტში და აპრილში სამშენებლო სამUშაოების ჩატარება, დეკემბრის ბოლოსაც ვერ იმუშავებდნენ. შარშან, აქედან რომ წავედით, 2 დეკემბერი იყო _ იმხელა თოვლი მოვიდა, რომ სამაშველო სამსახურმა გადაგვიყვანა. მახსოვს, რომ ვიღაცეები ამოვიდნენ, რაღაც დანადგარები უნდა დაედგათ, თუმცა, მიწა ისე იყო გაყინული, ვერაფერი დადგეს და წავიდნენ, გაზაფხულზე ამოვალთო, _ იხსენებს “გურია ნიუსთან” საუბრისას ამირან ბერიძე და აღნიშნავს, რომ ბახმაროში სამუშაოები არც ახლა მიმდინარეობს.
იგივეს ამბობს თამაზ ვაშაყმაძეც. მისი თქმით, არც სამშენებლო მასალები და არც მშენებლები ბახმაროში ჯერ არ უნახავს:
_ ამბობენ, 10 დღეში დაიწყება მშენებლობებიო. მე არ მაქვს მათთან არანაირი შეხება და ვერაფერს გეტყვით, გარდა იმისა, რომ ამ ეტაპზე არანაირი მშენებლობა არ დაწყებულა, _ გვითხრა ვაშაყმაძემ.
ბევრი მცდელობის მიუხედავად, ბახმაროში ვერ ვიპოვეთ ადამიანი, რომელიც ჩვენს კითხვებს პასუხს გასცემდა. ადგილზე არც პოლიცია აღმოჩნდა. სამართალდამცველებს საპატრულო ავტომანქანა შენობასთან ჰყავდათ დატოვებული, თავად კი უმისამართოდ იყვნენ გაუჩინარებულები.
დაზიანებული წყლის მილები, დანგრეული სახლები, ავარიული გზები _ ეს ის რეალობაა, რომელიც ამ ახლა ბახმაროშია.
ჩოხატაურის მუნიციპალიტეტის ადმინისტრაციულ შენობის შესასვლელში განახლებული ბახმაროს მაკეტის ფოტოები კედელზეა გაკრული. გამგებლის მოადგილე, დიმიტრი კორიფაძე განახლებული კურორტის შესახებ კომენტარს მოუცლელობის მიზეზით არ აკეთებს. ამბობს, რომ ის შენობები, რომლებიც მაკეტების სახით კედელზეა გამოკრული, აუცილებლად აშენდება. თუმცა კითხვაზე როდის, პასუხი არ გააჩნია.
ბახმაროს განვითარების გეგმა, წლების წინ მერაბ ჩხენკელმა შეიმუშავა. ბოლო ინფორმაციით, განვითარების გეგმაზე უცხოელმა სპეციალისტებმა იზრუნეს, თუმცა, როგორც გავიგეთ ბახმაროს განვითარების პროექტი ჯერ დამტკიცებულიც არ არის. ამას ჩვენთან საუბრისას ჩოხატაურის მაჟორიტარი დეპუტატი, კორნელი კუკულავაც ადასტურებს:
_ ბატონო კორნელი, ბახმაროს განვითარების გემის ორი პროექტი არსებობს. ხომ არ იცით, რომელი პროექტია განხილული _ ჩხენკელის გაკეთებული და უცხოელი სპეციალისტების?
_ ხვალ არის განხილვა (საუბარი ჩაწერილია 31 მაისს).
_ გამოდის, რომ განვითარების პროექტი ჯერ დამტკიცებულიც არ არის…
_ როგორ არა. განხილვა მოხდა, მხოლოდ ცვლილებები შევიდა
_ ვისი პროექტის განხილვა მოხდა?
_ ჩხენკელის.
_ ჩხენკელის პროექტით თუ აკეთებენ, რატომ ვრცელდება ოფიციალური ინფორმაცია, რომ ამისთვის უცხოელი არქიტექტორები ჩამოიყვანეს?
_ ხვალ არის განხილვა და ყველაფერი დაზუსტდება. ბევრი შენიშნვა იყო, ტურიზმის დეპარტამენტიდან ეკონომიკის სამინისტროს გადაეგზავნა, შენიშვნები ჰქონდა პრეზიდენტის ადმინისტრაციასაც. სამუშაოები მიდის და თან პროექტიც ზუსტდება. ეს ჩვეულებრივი მოვლენაა.
_ თუ დამტკიცებული პროექტი არ არსებობს, სამუშაოები როგორ დაიწყეს?
_ თქვენ გინდათ, რომ არ გაკეთდეს?
_ ჩვენ გვეკითხებით, თუ არ არსებობს დამტკიცებული პროექტი, როგორ მიმდინარეობს მშენებლობა?
_ ეგ შეიძლება.
_ რომელ კანონში წერია, რომ დამტკიცებული პროექტის გარეშე მუშაობის დაწყება შესაძლებელია?
_ წერია. შესაძლებელია, პროექტში ცვლილებები შევიდეს და ასეთი რამ ბევრჯერ მოხდება.
_ ახლა ბახმაროში მშენებლობები მიმდინარეობს?
_ ამ წუთას არ ვიცი.
_ ნაციონალური ტელევიზიების ცნობით, სამუშაოები ჯერ კიდევ გასულ წელს დაიწყო.
_ რა თქმა უნდა. მშენებლობები დაწყებულია, _ დაგვიზუსტა კუკულავამ.
ჩოხატაურის მუნიციპალიტეტის საკრებულოს ყოფილი თავმჯდომარე, კოალიცია “ქართული ოცნების” წევრი, ვლადიმერ სიხარულიძე ამბობს, რომ მშენებლობის დაწყებამდე ბევრი პროცედურებია გასავლელი: _ მშენებლობების დაწყებას ბევრი პროცედურა აქვს. ამას სჭირდება ნებართვა, ამისთვის კი აუცილებელია დამტკიცებული პროექტი, მიწათსარგებლობის და განაშენიანების გენერალური გეგმა, ზონირება და ა.შ. ეს არც ერთი არ არის. რომც იყოს, მშენებლობა ვერ დაიწყებოდა კლიმატური პირობებიდან გამომდინარე. თუმცა, იმ ქვეყანაში, სადაც ხელისუფლებამ დაუმთავრებელი პარლამენტის შენობა გახსნა და სხდომა გამართა ისე, რომ შენობა ექსპლუატაციაშიც არ ყოფილა მიღებული, რომელ კანონზე უნდა ვისაუბროთ?! _ ამბობს სიხარულიძე და დასძენს, რომ მაკეტები, რომლებიც მუნიციპალიტეტის შენობაშია განთავსებული, პიარისთვის განკუთვნილი ნახატებია: _ სიცრუეა, რასაც ნაციონალური არხები გადმოსცემენ. ამით შესაძლოა, მოტყუვდნენ ის ადამიანები, რომლებიც ბახმაროს არ იცნობენ. ყველა გურულს კარგად ესმის, რომ ბახმაროში, შემოდგომის მიწურულს და ადრიან გაზაფხულზე, ზამთარზე აღარაფერს ვამბობ, მშენებლობები ვერანაირად ვერ დაიწყებოდა. შესაბამისად, პრეზიდენტის განცხადება, რომ ახალ სეზონზე დამსვენებელს განახლებული ბახმარო დახვდებოდა, მისი მორიგი ტყუილია პიარის გასაკეთებლად. ის, რაც მუნიციპალიტეტის შენობაშია გამოკრული, არ არის პროექტები _ ეს არის ნახატები პიარისთვის, რომლითაც ხალხს ატყუებენ, _ აღნიშნავს სიხარულიძე.
ადგილობრივი ხელისუფლება პირად საუბრებში ამტკიცებს, რომ სეზონის გახსნისთვის ყველაფერი მოგვარდება, თუმცა, ვერ ხსნის როგორ უნდა აშენდეს სასტუმრო, კინოთეატრი და სხვა ობიექტები 22 დღეში, სეზონის გახსნამდე და როგორ უნდა ისიამოვნოს დამსვენებელმა განახლებული ინფასტრუქტურით მაშინ, როცა სამშენებლო სამუშაოები ჯერ დაწყებულიც კი არ არის.
