კურორტ "უჯარმის" 100 %-იანი წილის მესაკუთრე თანრივედ კასუმოვს კურორტის დაკარგვის საფრთხე ემუქრება, _ ამის შესახებ თბილისის ადამიანის უფლებათა სახლის მიერ გავრცელებულ ინფორმაციაშია აღნიშული.
თბილისის ადამიანის უფლებათა სახლის პროექტში "ადამიანის უფლებები რეგიონებში" ჩართული ადამიანის უფლებათა ცენტრის იურისტი ეკა ქობესაშვილი ეთნიკურად აზერბაიჯანელი საქართველოს მოქალაქის, თანრივედ კასუმოვის ინტერესებს იცავს.
ორგანიზაციის მიერ გავრცელებული ინფორმაციით, თანრივედ კასუმოვი კურორტ "უჯარმის" 100 %-იანი წილის მესაკუთრეა, რომლის ირგვლივ განვითარებული მოვლენებიდან გამომდინარე, მიგვაჩნია, რომ თანრივედ კასუმოვის მიმართ შესაძლოა, ხორციელდებოდეს ეთნიკური ნიშნით დისკრიმინაციის ფაქტი.
"როგორც თანრივედ კასუმოვი აცხადებს, კურორტის შეძენის შემდეგ ადგილობრივი თვითმმართველობის წარმომადგენლისა და საქმის ზედამხედველი პროკურორის მხრიდან არაერთხელ გაიჟღერა ეთნიკური ნიშნით დისკრიმინაციულმა გამონათქვამებმა. 2016 წელს თანრივედ კასუმოვმა საქართველოს მთავრობისგან პირდაპირი შესყიდვის წესით მიიღო ლიცენზია საკურორტო საქმიანობის განსახორციელებლად, თუმცა, ლიცენზის მიღების მიუხედავად, კურორტის მესაკუთრეს არ ეძლევა საშუალება, განახორციელოს საკურორტო საქმიანობა, რადგან კურორტ "უჯარმის" საქმიანობასთან დაკავშირებით სისხლის სამართლის საქმეა აღძრული. (სოფელ უჯარმაში მდინარე იორის ნავთობ პროდუქტის მცირე ოდენობის შერევით გამოწვეული დაბინძურების ფაქტზე დაწყებულია გამოძიება.) აღსანიშნავია ის ფაქტი, რომ მიუხედავად წარმოებული სისხლის სამართლის საქმისა, კურორტის მეპატრონემ საკურორტო საქმიანობის განსახორციელებლად საქართველოს მთავრობისგან ლიცენზია მიიღო, რაც კიდევ ერთხელ ადასტურებს იმ ფაქტს, რომ გამოძიება უსაფუძვლოდ დაიწყო და დღემდე ხელოვნურად ჭიანურდება.
კახეთის საოლქო პროკურატურის მიერ ხელოვნურად გაჭიანურებული სისხლის სამართლის საქმის გამო დალუქულია კურორტ "უჯარმის" ტერიტორია და საბუღალტრო დოკუმენტაცია, რის გამოც კურორტის მფლობელს შემოსავლების სამსახურთან პრობლემები ექმნება. ამასთან, პრობლემას წარმოადგენს კურორტზე მუდმივად დასაქმებული პირებისთვის ხელფასის გაცემა, რაც შეიძლება გახდეს შრომითი დავის წამოწყების მიზეზი. მუშახელის დაკარგვა კი, როგორც კურორტს, ასევე სოფელს შეუქმნის ეკოლოგიურ პრობლემებს, რადგან ისინი სისტემატურად უზურნველყოფენ, რომ ტერიტორიაზე არსებული ჭაბურღილიდან არ მოხდეს ნავთობპროდუქტის გაჟონვა.
პროკურატურა არღვევს კანონით გათვალისწინებულ ვალდებულებას, მოახდინოს სისხლის სამართლის საქმეზე სწრაფი, ეფექტური და დროული გამოძიება. გარდა საკურორტო საქმიანობის შეზღუდვისა, ეთნიკურად აზერბაიჯანელ თანრივედ კასუმოვს ემუქრება კურორტის დაკარგვის საფრთხე, რადგან კურორტის ინფრასტრუქტურის მოწყობისთვის, ამავე კურორტის უზრუნველყოფით, ბანკიდან ასი ათასობით ლარი აქვს აღებული კრედიტის სახით. იმის გათვალისწინებით, რომ საკურორტო საქმიანობას ვერ ახორციელებს კურორტ "უჯარმის" კანონიერი მესაკუთრე და არ აქვს დამატებითი შემოსავალი, იგი გადახდის უუნაროა. თბილისის ადამიანის უფლებათა სახლის უფლებადამცველთა მობილური ჯგუფი მოუწოდებს კახეთის საოლქო პროკურატურას, შეწყვიტოს უსაფუძვლოდ დაწყებული სისხლის სამართლის საქმე, რის შედეგადაც ეთნიკურად აზერბაიჯანელ თანრივედ კასუმოვს მიეცემა კანონინით მისთვის მინიჭებული უფლებამოსილების განხორციელების შესაძლებლობა", _ აღნიშნულია ორგანიზაციის განცხადებაში.
"გურია ნიუსი" ცდილობს კახეთის საოლქო პროკურატურასთან დაკავშირებას. უახლეს ინფორმაციას აღნიშნულთან დაკავშირებით მიღებისთანავე შემოგთავაზებთ.
