გრიგოლეთის საწვრთნელი ბაზის ქონების გასხვისების საკითხი ისევ დადგა დღის წესრიგში _ საქმე ისაა, რომ გასულ წელს, ა(ა)იპ საფეხბურთო კლუბ "გურიას" ხელმძღვანელობამ გრიგოლეთის ბაზიდან, რომელიც 4 235 კვ/მ არასასოფლო-სამეურნეო დანიშნულების მიწის ნაკვეთთან ერთად, სახელმწიფო ქონების ეროვნული სააგენტოს თავმჯდომარის 2013 წლის 12 აგვისტოს ბრძანების თანახმად, ლანჩხუთის მუნიციპალიტეტს დამატებითი ქონების სახით გადაეცა, 31 ათასი ლარის ღირებულების ქონება გაასხვისა. აღნიშნული შემოსავალი კი კლუბმა საკუთარი ინტერესებისამებრ განკარგა.
რახან გრიგოლეთის ბაზა მუნიციპალიტეტის საკუთრებას წარმოადგენს, შესაბამისად, იქ არსებული ქონების განკარგვის უფლებაც მხოლოდ მუნიციპალიტეტს აქვს. საკრებულოს ოპოზიციური სპექტრი ამგვარ ქმედებაში კრიმინალის ნიშნებს ხედავს და შესაბამისი ორგანოებისგან შესაბამის რეაგირებასაც ითხოვს. _მათი მოსაზრებით, ადგილი აქვს ბაზის ქონების განიავებას.
"გურიამ" წარმოგვიდგინა ანგარიში _ ოფიციალურად, აუქციონის წესით, გაასხვისა ბაზაზე არსებული ჯართი, სხვადასხვა სამშენებლო ნარჩენები და შემოსული თანხაც თავად განკარგა, რითაც ადგილობრივმა ბიუჯეტმა 31 ათასი ლარის დანაკლისი განიცადა. გამგეობის ქონების მართვის სამსახურს აქვს ნუსხა, რომელშიც უნდა ყოფილიყო ეს ქონება აღრიცხული და მისი განკარგვაც მუნიციპალიტეტის მიერ უნდა მომხდარიყო. რატომ მოხდა ეს ჩვენი გვერდის ავლით?! თუ სპორტს ყველანაირად ვერგებით, მაშინ რატომ არ მიეცა საშუალება სპორტულ სკოლას, გაეყიდა საკუთარი ძველი შენობა?! ვფიქრობ, ეს კრიმინალია და მას შესაბამისი რეაგირება უნდა მოჰყვეს", _ ამბობს საკრებულოს წევრი გია გოგუაძე.
საფეხბურთო კლუბ "გურიას" იურისტის, ლადო გვარჯალაძის განმარტებით, კლუბის მიერ გრიგოლეთის ბაზიდან მუნიციპალური ქონების გასხვისება მუნიციპალიტეტის ხელმძღვანელობასთან შეთანხმებით მოხდა და თანხაც საჭიროებისამებრ განიკარგა.
გოგუაძის პასუხად გამგეობის ქონების მართვის, ეკონომიკისა და სოფლის მეურნეობის განვითარების სამსახურის უფროსი გოგი ფაცურია მოკლე კომენტარით შემოიფარგლა: "იქედან გამომდინარე, რომ ზემონახსენები ა(ა)იპ-იც და გრიგოლეთის ბაზაც ორივე მუნიციპალიტეტის საკუთრებას წარმოადგენს, შესაბამისად, "გურიას" ხელმძღვანელობას გამგეობისგან მიეცა ბაზაზე არსებული ქონების განკარგვის უფლება".
ეს პირველი შემთხვევა არაა, როცა ოპოზიცია ყურადღებას ბაზის ქონების უკანონო გასხვისებაზე ამახვილებს _ პირველად ამასთან დაკავშირებით სკანდალი ადგილობრივ მედიაში 2013 წელს ატყდა, რის გამოც მუნიციპალიტეტის გამგებელმა ზაზა ურუშაძემ შიდა აუდიტის სამსახურს, რომელსაც მაშინ გოგი ფაცურია ხელმძღვანელობდა, საკითხის შესწავლა დაავალა.
2013 წლის 14 ოქტომბერს, გრიგოლეთის ბაზის მმართველად დაინიშნა ო. ჩხაიძე, რომელსაც შრომითი ხელშეკრულება 2014 წლის 31 მაისს შეუწყდა. ამას წინ უძღოდა ბაზის ქონების გასხვისების გამო ადგილობრივ მედიაში ატეხილი სკანდალი, რის გამოც მუნიციპალიტეტის გამგებელმა ზაზა ურუშაძემ აუდიტის სამსახურს საქმის შესწავლა დაავალა, რის დასტური 2014 წლის 27 იანვრით დათარიღებული ზემონახსენები მოხსენებითი ბარათია.
ამ დოკუმენტში აღნიშნულია, რომ "საფეხბურთო მოედნის ღობის და სხვა ობიექტების აღსადგენად ო. ჩხაიძის მიერ ზეპირი შეთანხმების საფუძველზე დაქირავებული ბრიგადის მიერ (სულ _ 4 წევრი, ხელმძღვანელი დ. ტაკიძე), აღდგენილი იქნა ბაზის ტერიტორიის ღობე 26 გრძ/მ; 2მ. სიმაღლის, სასადილოს შენობაში ორ ოთახში გაყვანილი იქნა ელექტროობა და ჩატარდა სამღებრო სამუშაოები. ასევე ზეპირი შეთანხმებით, აღნიშნულ სამუშაოებში უნდა გადახდილიყო 2 100 ლარი. თანხის მაგივრად ბრიგადას გადასცეს 80 გრძ/მ რკინის მილი (1გრძ/მ შეფასდა 12 ლარად), რომლის საერთო ღირებულება შეადგენს 960 ლარს.
ტერიტორიაზე თავმოყრილი ჯართის ჩაბარების შედეგად აიღეს 750 ლარი, ხოლო ჯართადქცეული წყლის ავზის ჯართად ჩაბარებით _ 210 ლარი, სულ დ. ტაკიძის ბრიგადას აღნიშნული ხელფასის სახით გადაუხადეს 1920 ლარი. გადასახდელი დარჩა 180 ლარი. სასადილოს მიმდებარე ტერიტორიაზე არსებული შენობიდან მოხსნილი შიფერის რეალიზაციით მიიღეს 465 ლარი, რითაც ანაზღაურებული იქნა სპორტული ბაზის და საფეხბურთო კლუბ "გურიას" სტადიონის ელექტროენერგიის დავალიანება.
სოფელ გრიგოლეთში მცხოვრები პავლე თევზაძის მიერ, თავისი ძალებით, წაღებული იქნა აზბოცემენტის მილები _ 10 ცალი, თითოეული 6 გრძ/მ, ერთეულის ფასი 60 ლარი, სულ შეფასებული 600 ლარად, აღნიშნული თანხით ანაზღაურებული იქნა საფეხბურთო კლუბ "გურიას" სტუმართა ბინით მომსახურების დავალიანება. სულ სხვადასხვა სახით საამშენებლო მასალებისა და ჯართის რეალიზაციით მიღებულმა თანხამ შეადგინა 3970 ლარი".
აუდიტის სამსახურს, ლანჩხუთის მუნიციპალიტეტის გამგეობის ქონების მართვის სამსახურის მიერ მოწოდებული მონაცემების თანახმად, მიაჩნია, რომ თვითმმართველი ერთეულის დამატებითი ქონების გასხვისება შესაძლებელია საქართველოს კანონმდებლობით დადგენილი წესით, შემდეგი სამართლებრივი პროცედურების დაცვით:
1. სახელმწიფოსაგან გადმოცემული თვითმმართველი ერთეულის ქონების რეგისტრაცია საჯარო რეესტრში;
2. თვითმმართველი ერთეულის ქონების აუდიტორული შემოწმება, საკრებულოს ქონების პრივატიზების შესახებ წინადადებით მიმართვა;
3. პრივატიზების შესახებ საკრებულოს შესაბამისი სამართლებრივი აქტის საფუძველზე ქონების საპრივატიზაციო ნუსხაში შეტანა ქონების აუდიტორული შეფასების შედეგად განსაზღვრული ღირებულებით (საწყისი წლიური ფასი);
4. პრივატიზების შესახებ საკრებულოს შესაბამისი სამართლებრივი აქტის საფუძველზე სააუქციონო კომისიის მიერ აუქციონის მოწყობა.
ზემოაღნიშნული 4 პუნქტიდან მოცემულ შემთხვევაში შესრულებულია მხოლოდ პირველი (რეგისტრაცია საჯარო რეესტრში).
ყოველივე ამის გათვალისწინებით, აუდიტის სამსახურს მიაჩნია, რომ "სპორტული ბაზის მმართველმა ო. ჩხაიძემ დაარღვია ხელშეკრულებითა და მოქმედი კანონმდებლობით გათვალისწინებული ნორმები და თავისი შეხედულებით განახორციელა ზემოაღნიშნული კანონშეუსაბამო მოქმედებები".
თავის დროზე გამგებელი ზაზა ურუშაძე იძულებული გახდა ჩხაიძისთვის ხელშეკრულება შეეწყვიტა. უფრო მეტიც, მაშინ ის ამბობდა, რომ თავად იყო დაინტერესებული სიმართლის გარკვევით და ამის დასტური მის მიერ აუდიტის სამსახურისთვის ბაზის საქმიანობის შესწავლის დავალების მიცემა გახლდათ.
თუმცა, ზემონახსენები შრომითი ხელშეკრულების შეწყვეტიდან მალევე, ქონების უკანონო გასხვისებაში ეჭვმიტანილი ჩხაიძე საფეხბურთო კლუბ "გურიას" აღმასრულებელ დირექტორად დაინიშნა, სადაც დღემდე აგრძელებს საქმიანობას.
დეპუტატმა გია გოგუაძემ გასულ წელს საკრებულოს ერთ-ერთ სხდომაზე დასვა საკითხი, იცოდა თუ არა გამგებელმა აუდიტის სამსახურის დასკვნის შესახებ და თუ იცოდა, რატომ დანიშნა ჩხაიძე საფეხბურთო კლუბ "გურიას" აღმასრულებელ დირექტორად.
იმ სხდომაზე ზაზა ურუშაძემ მაშინდელი აუდიტის სამსახურის ხელმძღვანელ გიორგი ფაცურიასკენ მიუთითა, რომ დასკვნაში კანონდარღვევაზე საუბარი არ ყოფილა: "აგერ არის ფაცურია, მის პატიოსნებაში ეჭვი ხომ არ გეპარებათ და ჰკითხეთ, ჰქონდა თუ არა იქ რამე კანონდარღვევას ადგილი?"
ამავდროულად, გამგებელმა საკრებულოს ინფრასტრუქტურის კომისიის ერთ-ერთ ბოლო სხდომაზე გია გოგუაძეს და მასთან ერთად სხვა ადამიანებსაც, რომლებიც მიიჩნევდნენ, რომ ბაზის ქონება უკანონოდ გასხვისდა, შემდეგი სიტყვებით მიმართა: "თქვენ ძალიან გინდათ, რომ ბაზაზე რამე უკანონოდ იყოს, მაგრამ, თქვენდა სამწუხაროდ, ეს ასე არ არის".
აქედან გამომდინარე, მის ოპონენტებს გაუჩნდათ კითხვა _ აფარებს თუ არა ხელს გამგებელი ბაზის ქონების გასხვისების გამო ჩადენილ შესაძლო დანაშაულს და თუ აფარებს, რატომ?
მოხსენებითი ბარათის გახმოვანების შემდეგ, ზაზა ურუშაძემ თქვა, რომ თავის დროზე თავად იყო დაინტერესებული სიმართლის გარკვევით და ხელი არასდროს არავისთვის დაუფარებია: "თუ რამე საპროკურატუროს ხედავთ ამ დასკვნაში, მიმართეთ პროკურატურას", _ განუცხადა მან გია გოგუაძეს.
"მე რა შუაში ვარ?! კაცის დაჭერას არ ვითხოვ, უბრალოდ, მაინტერესებს, რატომ დანიშნეთ ეს ადამიანი ბევრად უფრო საპასუხისმგებლო თანამდებობაზე?" _ იკითხა გოგუაძემ.
"მე ვთვლი, როგორც აუდიტის სამსახური მეუბნება, დანაშაულის ფაქტებს იქ არ ქონდა ადგილი და თუ თვლით, რომ ასე არაა, კი, ბატონო, გადავაგზავნოთ პროკურატურაში. მეტი რა ვთქვა", _ უპასუხა გამგებელმა.
